ភ្នំពេញ៖ តូបលក់ដូររងការខូចខាតស្ទើរទាំងស្រុង ដោយសារតែអគ្គិភ័យ បានលេបត្របាក់ នៅវេលាម៉ោង ១២និង១០នាទីយប់រំលងអាធ្រាតឈានចូលថ្ងៃទី១៩ ខែកញ្ញា ឆ្នាំ២០២១ ដែលស្ថិតនៅចំណុចផ្សារដំបូលខៀវ តាមបណ្តោយផ្លូវបេតុង ក្នុងភូមិត្រពាំងថ្លឹងទី១ សង្កាត់ចោមចៅទី១ ខណ្ឌពោធិ៍សែនជ័យ រាជធានីភ្នំពេញ។
បើតាមសន្ដិសុខ ដែលបានយាមនៅផ្សារនោះបានឲ្យដឹងដំបូងគេឃើញអណ្ដាតភ្លើងបានឆាបឆេះចេញពីតូបមួយនៅក្នុងផ្សារ ក៏បានរាយការណ៍ទៅការិល័យបង្ការនឹងពន្លត់អគ្គីភ័យ នៃស្នងការនរគបាលរាជធានីភ្នំពេញ ឲ្យមកជួយអន្ដរាគមន៍បាញ់ពន្លត់ភ្លាមៗ។ ហេតុការណ៍នេះបានបំផ្លាញតូបលក់ដូរអស់ចំនួន ៦តូប និងសម្ភារៈក្នុងតូបទាំងស្រុង។
បើតាមលោកវរសេនីយ៍ឯក ព្រហ្ម យ៉ន នាយការិយាល័យបង្ការពន្លត់អគ្គិភ័យ និងសង្គ្រោះ នៃស្នងការដ្ឋាននគរបាលរាជធានីភ្នំពេញបានប្រាប់ឲ្យដឹងថា ម្ចាស់ទីតាំងដែលមានអគ្គីភ័យ គឺលោកឧកញ៉ា កាំង ឡេង ភេទប្រុស អាយុ ៣៩ឆ្នាំ ដែលមានអ្នកគ្រប់គ្រងផ្សារឈ្មោះ សុង គឹមហួរ ភេទប្រុស អាយុ ៥២ឆ្នាំ។ចំពោះមូលហេតុនៃការឆាបឆេះ គឺបណ្តាលមកពីការ ឆ្លងចរន្ដអគ្គិសនី។
ក្នុងហេតុការណ៍មួយនេះ បានឆេះបំផ្លាញ តូបថ្មប្រក់ស័ង្កសី ដែលមានទំហំ ២០០ម៉ែត្រ x ១២ម៉ែត្រ ឆេះអស់តូបចំនួន ៦តូប នឹងសម្ភារៈក្នុងតូបអស់ទាំងស្រុង នឹងពុំបណ្តាលឲ្យឆេះរាលដាលដល់ផ្ទះអ្នកជិតខាងឡេីយ។ ក្នុងករណីគ្រោះអគ្គីភ័យនេះ មិនមានអ្នករងរបួសទេ។ ចំពោះប្រតិបត្តិការបាញ់ពន្លត់អគ្គីភ័យវិញ សមត្ថកិច្ចប្រើប្រាស់រថយន្ដការិយាល័យបង្ការ និងពន្លត់អគ្គិភ័យ ចំនួន ២៤គ្រឿង ប្រើប្រាស់ទឹកអស់ ២៣ឡាន ស្មើរនឹង ៩២ម៉ែត្រគូប, រថយន្តជំនួយមកពីក្រសួងមហាផ្ទៃចំនួន ២គ្រឿង ប្រេីប្រាស់ទឹកអស់ ២ឡាន ស្មេីរនឹង ១២ម៉ែត្រគូប, រថយន្តរបស់ក្រុមហ៊ុន ស្រាបៀរកម្ពុជា ចំនួន ១គ្រឿង ប្រេីប្រាស់ទឹកអស់ ១ឡាន ស្មេីរនឹង ៦ម៉ែត្រគូប និងរថយន្តរបស់ក្រុមហ៊ុន ISI ចំនួន ១គ្រឿង ប្រើប្រាស់ទឹកអស់ ១ឡាន ស្មើរនឹង ៤ម៉ែត្រគូប ទើបគ្រប់គ្រងស្ថានការណ៍បានទាំងស្រុង នៅវេលាម៉ោង ១និង១០នាទីយប់រំលងអាធ្រាតនាថ្ងៃដដែរ៕