ក្រុមបាល់ទាត់ជម្រើសជាតិក្នុងសាលរបស់ថៃ និងជម្រើសជាតិវៀតណាម ក្នុងតំបន់អាស៊ាន បានឈានជើងឡើងដល់វគ្គ១៦ក្រុមចុងក្រោយ ក្នុងពានរង្វាន់បាល់ទាត់ជើងឯកបាល់ទាត់ក្នុងសាលពិភពលោក 2021 FIFA Futsal World Cup ហើយក្រុមធ្វើបានល្អរៀងខ្លួនក្នុងវគ្គជម្រុះតាមពូល។
ទាំងថៃ និងវៀតណាម ជាប់ឈ្មោះជាក្រុមលេខ៣ល្អតាមពូលរៀងៗខ្លួន ខណៈថៃ ប្រកួតជម្រុះតាមពូល៣លើក ឈ្នះ១លើក ស្មើ១លើក និងចាញ់១លើក ទាត់ចូលទីគេបាន១១គ្រាប់ និងគេទាត់ចូលវិញ៩គ្រាប់។ ថៃ បានចាញ់ព័រទុយហ្គាល់ ៤-១ ហើយស្មើម៉ូណាកូ ១-១ និងឈ្នះSolomon Islands ៩-៤។
អត្ថបទពាក់ព័ន្ធ៖អាជ្ញាកណ្ដាល៣៩រូបមកពីទ្វីបទាំង៦ នឹងដឹកនាំប្រកួត 2021 FIFA Futsal World Cup
ចំណែកវៀតណាម ប្រកួត៣លើក ឈ្នះ១លើក ស្មើ១លើក និងចាញ់១លើកដូចគ្នា តែទាត់ចូលគូប្រកួតបាន៥លើក និងគេទាត់ចូលវិញ១២លើក។ វៀតណាម ចាញ់ប្រេស៊ីល ៩-១ តែឈ្នះប៉ាណាម៉ា ៣-២ និងស្មើគ្នាជាមួយសាធារណៈរដ្ឋឆែក ១-១។
សម្រាប់កម្មវិធីប្រកួតវគ្គ៨ក្រុមចុងក្រោយ គឺក្រុមវៀតណាម ត្រូវជួបរុស្ស៊ី នៅថ្ងៃទី២២ កញ្ញា ២០២១ ក្នុងទីលាន Avia Solutions Group Arena ទីក្រុង Vilnius។ ដោយឡែកក្រុមថៃ ត្រូវជួបកាហ្សាក់ស្ថាន នៅថ្ងៃទី២៣ កញ្ញា ២០២១ លើទីលាន Žalgiris Arena ក្នុងទីក្រុង Kaunas។
ទន្ទឹមនឹងគ្នានេះដែរកីឡាករ Ferrão របស់ប្រេស៊ីល រកបានគ្រាប់បាល់ច្រើនជាងគេគឺ៦គ្រាប់ម្នាក់ឯង ច្រើនជាងកីឡាករដទៃក្នុងពានរង្វាន់នេះ។ សម្រាប់កម្មវិធីប្រកួតវគ្គ១៦ក្រុមចុងក្រោយរកឃើញក្រុមបណ្តើៗហើយដោយក្នុងនោះមាន៖
គូទី១៖ វេណេហ្ស៊ុយអេឡា Vs ម៉ូណាកូ
គូទី២៖ ប្រេស៊ីល Vs លេខ៣ពូល E/F
គូទី៣៖ រុស្ស៊ី Vs វៀតណាម
គូទី៤៖ លេខ១ពូល F Vs លេខ២ពូល E
គូទី៥៖ លេខ១ពូល E Vs ឆែក
គូទី៦៖ ព័រទុយហ្គាល់ Vs លេខ៣ពូល A/F
គូទី៧៖ អ៊ូបេគីស្ថាន Vs ជើងឯករងពូល F
គូទី៨៖ កាហ្សាក់ស្ថាន Vs ថៃ
សូមបញ្ជាក់ថាវៀតណាម និងថៃ ស្ថិតក្នុងក្រុមបាល់ទាត់ហ្វូតសាលជម្រើសជាតិ៥ប្រទេស តំណាងឱ្យទ្វីបអាស៊ី ទៅចូលរួមប្រកួតក្នុងពានរង្វាន់ហ្វូតសាលជើងឯកពិភពលោក 2021 FIFA Futsal World Cup នៅប្រទេសលីទុយអានី ក្នុងទ្វីបអឺរ៉ុប ចាប់ពីថ្ងៃទី១២ ខែកញ្ញា ដល់៣ ខែតុលា ឆ្នាំ២០២១ ដោយក្នុងនោះមាន ជប៉ុន អ៊ីរ៉ង់ អ៊ូបេគីស្ថាន ថៃ និងវៀតណាម៕
