កូនខ្មែរមួយរូបបាននាំមកនូវមោទកភាពសម្រាប់ជាតិខ្មែរ ដោយយុវជនដែលត្រូវបានអ្នកគាំទ្រស្គាល់ថាជាតារាបង្ហាញម៉ូដនិងជាតារាសម្ដែង កាលពីថ្ងៃទី០១ ខែ សីហា ឆ្នាំ២០២១ បានចុះកិច្ចព្រមព្រៀងជាសិល្បករប្រចាំក្រុមហ៊ុនគ្រប់គ្រងសិល្បៈដ៏ធំមួយនាប្រទេសសិង្ហបុរី។
កាលពីពេលថ្មីៗនេះ យុវជនដែលមានឈ្មោះពិត អ៊ឹង ហាវ ហៅ ដេវីត វ័យ ១៩ឆ្នាំ បានប្រកាសតាមរយៈបណ្ដាញសង្គមថាលោកបានចុះកិច្ចព្រមព្រៀងជាសិល្បករក្នុងក្រុមហ៊ុន TCP Media Group ដើម្បីបន្តក្ដីសុបិនជាតារាសម្ដែងរបស់ខ្លួន។
កូនប្រុសអ្នកខេត្តបាត់ដំបងរូបនេះបច្ចុប្បន្នជានិស្សិតកំពុងសិក្សាឆ្នាំទីបី ជំនាញគ្រប់គ្រងពាណិជ្ជកម្ម លោកបានមកបន្តការសិក្សានៅប្រទេសសិង្ហបុរី តាំងពីអាយុ ៨ឆ្នាំ តាមរយៈការផ្ចុងផ្ដើមពីក្រុមគ្រួសារ។ នៅក្នុងវិស័យសម្ដែងសម្រាប់ Devid មិនចាត់ទុកថាខ្ចីសេចក្ដីនោះទេ ព្រោះកន្លងមកបុរសញញឹមស្រស់រូបនេះធ្លាប់បានច្រៀងចម្រៀង Cover បង្ហោះលើ Instgram ក៏ដូចជាហ្វេសប៊ុក ជាពិសេសនោះលោកថែមទាំងធ្លាប់សម្ដែងជាតួឯងប្រុសក្នុងរឿងភាគបែបយុវវ័យ «ក្ដីប្រាថ្នាខួប១៨ឆ្នាំ» របស់ផលិតកម្មហង្សមាសផងដែរ។
ងាកមកអាជីពសម្ដែងនាប្រទេសសិង្ហបុរីវិញដោយមានទុនសិល្បៈស្រាប់ រួមផ្សំនឹងរូបសម្បត្តិស្រស់សង្ហាសមសួន ពេញដោយភាពក្លាហានផងនោះ Devid បានក្លាយជាតារាជនជាតិខ្មែរទីមួយ បានចុះកិច្ចព្រមព្រៀងជាមួយនឹងក្រុមហ៊ុន TCP Media Group។
សម្រាប់ការងារថ្មីជាមួយនឹងក្រុមហ៊ុន TCP Media Group នេះ Devid ក្ដោងបានតំណែងជាតួឯកប្រុសរឿងភាគចំនួនពីររឿង ដោយរឿងភទីមួយផលិតដោយ TCP Media មានចំណងជើងថា «What We Could Be» និងរឿងទីពីរមានចំណងជើង «ធ្លាក់ក្នុងអន្លុងស្នេហ៍ក្នុង100វិនាទី» បញ្ចាំងនៅលើ Platform VIU Singapore ។
គួរដឹងថា Devid បច្ចុប្បន្នមានអាយុ ១៩ឆ្នាំ មានស្រុកកំណើតនៅខេត្តបាត់ដំបង ជាកូនប្រុសច្បងក្នុងចំណោមបងប្អូន៣នាក់ ប្រុសម្នាក់ស្រីពីរនាក់ ស្ថិតក្នុងក្រុមគ្រួសារជាអ្នកជំនួញ៕