ជិតពីរឆ្នាំហើយដែលរឿងភាគមនោសញ្ចេតនាស្នេហា Crash landing on You បានបញ្ចាំងនៅលើ Platform Netflix ប៉ុន្តែប្រជាប្រិយភាពរបស់រឿងនេះនៅតែបន្តកើនឡើង និងមានឥទ្ធិពលក្នុងដួងចិត្តអ្នកគាំទ្រ សម្រាប់ប្រទេសកូរ៉េខាងជើងជាកន្លែងដែលសាច់រឿងចាប់ផ្ដើមនៅទីនោះ មានយុវជនជាច្រើនត្រូវបានចាប់ខ្លួននិងចោទប្រកាន់ហើយត្រូវដាក់គុកដោយស្ថានទោសធ្ងន់ធ្ងរ។ ហេតុការណ៍ចាប់យុវជនក្នុងប្រទេសកូរ៉េខាងជើងនេះទោះជាមិនត្រូវបានប្រកាសច្បាស់ តែត្រូវបានមតិសាធារណៈផ្ដោតការចាប់អារម្មណ៍លើបញ្ហាសិទ្ធិមនុស្សរបស់ប្រទេសនេះ។
កាលពីចុងខែសីហា យុវជន៨នាក់ ត្រូវបានចាប់ដាក់គុកដោយសារតែលួចមើលនិងធ្វើត្រាប់តាមតួអង្គផ្សេងៗក្នុងរឿងភាគកូរ៉េខាងត្បូងដោយក្នុងនោះរួមបញ្ចូលទាំងរឿងភាគដ៏ល្បីល្បាញ «Crash Landing on You» នេះបើយើងតាមការផ្សព្វផ្សាយដោយសារព័ត៌មាន The Daily NK។
តារា tiktok ដែលមានឈ្មោះគណនី Priscilla Kwon បានផ្សព្វផ្សាយព័ត៌មាននេះនៅលើគណនីរបស់ខ្លួន ដែលភាគច្រើនគណនីរបស់កញ្ញាច្រើនតែនិយាយរៀបរាប់ពីគ្រប់រឿងរ៉ាវទាំងអស់ពាក់ព័ន្ធនឹងប្រទេសកូរ៉េ។
វីដេអូនោះទទួលបានការចាប់អារម្មណ៍ខ្លាំងដោយមានចំនួនមនុស្ស Like និង Share យ៉ាងច្រើន ដោយសារតែមានយុវជនកូរ៉េខាងជើងចំនួន៦នាក់ត្រូវបានកាត់ទោសនិងដាក់ពន្ធនាគារក្រោយរកឃើញថាលួចមើលនិងត្រាប់តាមរឿងភាគកូរ៉េខាងត្បូង។
រឿងភាគ «Crash Landing on You» ឬ «ចំណតស្នេហ៍ក្នុងបេះដូងបង» ស្ថិតក្នុងចំណោមវីដេអូជាច្រើនទៀតដែលយុវវ័យក្នុងប្រទេសកូរ៉េខាងជើងចូលចិត្តមើលហើយរងការចោទប្រកាន់លួចមើល។ រឿងភាគនេះបរិយាយពីស្នេហារវាងមេបញ្ជាកាកូរ៉េខាងជើងនិងកូនស្រីមហាសេដ្ឋីនៅប្រទេសកូរ៉េខាងត្បូង ដែលជួបឧប្បត្តិហេតុធ្លាក់ចូលក្នុងព្រំដែនប្រទេសកូរ៉េខាងជើង ហើយជាប់នៅក្នុងប្រទេសនោះជាមួយនឹងតួឯកប្រុស ខណៈស្វែងរកផ្លូវមកប្រទេសកំណើតវិញតាមរយៈការជួយពីតួឯកប្រុស បង្កើតបានជាកំណើតស្នេហាហាមឃាត់រវាងទាហានកូរ៉េខាងជើងនិងនារីកូរ៉េខាងត្បូង។
រឿងភាគនេះបានក្លាយជារឿងភាគកូរ៉េទីពីរដែលមានចំនួនទស្សនាច្រើនក្នុងប្រវត្តិសាស្ត្រភាពយន្តរបស់ប្រទេសកូរ៉េខាងត្បូង ហើយរឿងនេះក៏ជារឿងដែលមានការពេញនិយមពីសំណាក់អ្នកទស្សនាទាំងជាតិនិងអន្តរជាតិខ្លាំងផងដែរ។
Crash Landing on You គឺជារឿងភាគមនោសញ្ចេតនារបស់ទូរទស្សន៍ TVN សម្ដែងដោយ តារាសម្ដែងរូបសង្ហាថ្ពាល់ខួច Hyun Bin និងតារាស្រីម្ចាស់រហស្សនាមតារាទឹកភ្នែក Son Ye Jin៕
