សហព័ន្ធកីឡាបាល់ទះកម្ពុជា បានជូនដំណឹងពីការរៀបចំវគ្គបណ្តុះបណ្តាលនិងចៅក្រមកីឡាបាល់ទះក្នុងសាលកម្រិតមូលដ្ឋាន (គ.C) ចាប់ពីថ្ងៃទី២១ ដល់ថ្ងៃទី២៣ ខែកញ្ញា ឆ្នាំ២០២១ នេះតាមប្រព័ន្ធ Zoom ដែលនេះស្របតាមផែនការរបស់ខ្លួន។
សហព័ន្ធបានជូនដំណឹងដល់មន្ទីរអប់រំយុវជននិងកីឡា រាជធានីខេត្តក្នុងការបញ្ជូនមន្រ្តីរបស់ខ្លួនមកចូលរួមក្នុងវគ្គបណ្តុះបណ្តាលនេះដើម្បីបង្កើនបរិមាណអាជ្ញាកណ្ដាលនិងចៅក្រម ឆ្ពោះទៅរកគុណភាពតាមស្តង់ដារជាតិនិងអន្តរជាតិ ជាពិសេសសម្រាប់ធ្វើការជ្រើសរើសចូលរួមដឹកនាំការប្រកួតកីឡាអាស៊ីអាគ្នេយ៍លើកទី៣២ឆ្នាំ២០២៣ ដែលកម្ពុជា ធ្វើជាម្ចាស់ផ្ទះក៏ដូចជាការប្រកួតលក្ខណៈអន្តរជាតិនានា។
កាលពីខែសីហា ឆ្នាំ២០២១ ថ្មីៗនេះសហព័ន្ធក៏បានរៀបចំបើកវគ្គបណ្ដុះបណ្ដាលអាជ្ញាកណ្ដាលកីឡាបាល់ទះកម្រិតមូលដ្ឋាន នេះបាន១លើកមកហើយ ដោយជោគជ័យ ដោយមានសិក្ខាកាមចូលរួមជិត៥០នាក់៕