ភ្នំពេញ៖ បុរសម្នាក់ជិះម៉ូតូលឿងបោះពួយជ្រុលទៅបុករថយន្ត ហាយលែនឌ័របើកឆ្លងផ្លូវ យ៉ាងពេញទំហឹងបណ្ដាលឱ្យរងរបួសធ្ងន់ត្រូវបានបញ្ជូនទៅសង្រ្គោះភ្លាមៗ។ ហេតុយការណ៍គ្រោះថ្នាក់ចរាចរណ៍បានកើតឡើង ទល់មុខច្រកចូលបុរីក្បែរ ឬស្សីសាញ់ស្ថិតតាមបណ្ដោយផ្លូវបេតុង៥០ម៉ែត្រភូមិប្រការ សង្កាត់ព្រៃស ខណ្ឌដង្កោ រាជធានីភ្នំពេញ កាលពីវេលាម៉ោង៨ព្រឹក ថ្ងៃទី២៦ ខែកញ្ញា ឆ្នាំ២០២១ ។
តាមប្រភពពីបងប្អូនប្រជាពលរដ្ឋ ដែលឃើញហេតុការណ៍ បានឱ្យដឹងថា មុនពេលកើតហេតុ គេបានឃើញបុរសម្នាក់រួមដំណើរជាមួយប្រពន្ធបើករថយន្តម៉ាក ហាយលែនឌ័រ ពណ៌ប្រផេះ ពាក់ស្លាកលេខ ភ្នំពេញ 2BK 5407 ដោយមានដឹកកង់ពីក្រោយផងនោះ បានបើករថយន្តចេញពីក្នុងបុរី ទិសដៅពីលិចទៅកើត លុះមកដល់ចំណុចកើតហេតុ បានបើកឆ្លងផ្លូវ៥០ម៉ែត្រ លក្ខណៈបញ្ឆិតឡើងរកស្តាំរបស់ខ្លូនដល់ចំណុចទ្រូងផ្លូវជិតផុតទៅ ហើយគាប់ជួនមានបុរសម្នាក់ បានជិះម៉ូតូម៉ាក ZOOMERX ពណ៌សលាយទឹកក្រូច ពាក់ស្លាកលេខ ភ្នំពេញ 1FU 3564 បានជិះបោះពួយតាមបណ្ដោយផ្លូវ៥០ម៉ែត្រ ក្នុងទិសដៅ ពីជើងជើងទៅត្បូង ក្នុងល្បឿនលឿន ក៍ជ្រុលទៅបុករថយន្ត ចំហៀងក្រោយខាងឆ្វេង ទាំងកំរោលពេញទំហឹង បណ្តាលឲ្យអ្នកជិះម៉ូតូ ហោះទៅផ្ទុបកញ្ចក់រថយន្ត ខាងរថយន្ត បែកខ្ចាយរងរបួសបាក់ដៃបាក់ជើង ត្រូវបានបញ្ជូនតាមរថយន្តសង្គ្រោះ ដឹកយកទៅសង្គ្រោះនៅ គ្លីនិកឯកជនភ្លាមៗ រីឯម៉ូតូវិញរងការខូចខាតផែ្នកខាងមុខ ។ ចំណែករថយន្តវិញ រងការខូចខាត ក្រពិតផ្នែកខាងក្រោយចំហៀងខាងឆ្វេង និងបែកកញ្ចក់ក្រោយ តែមិនមានគ្រោះថ្នាក់ដល់អ្នកជិះក្នុងរថយន្តនោះទេ ។
ក្រោយពេលកើតហេតុ ដោយសារខាងម៉ូតូ រងរបួសធ្ងន់ពេក មិនទាន់ដោះស្រាយគ្នាបាន សមត្ថកិច្ចជំនាញ ចុះទៅធ្វើការវាស់វែងយក រថយន្តនិងម៉ូតូ រួមទាំងអ្នកបេីកបរ ទៅរក្សាទុកនៅ ការិយាល័យនគរបាលចរាចរណ៍ជើងគោកនៃស្នងការដ្ឋានរាជធានីភ្នំពេញ រងចាំធ្វើការដោះស្រាយ នៅពេលក្រោយជាបន្តទៀត ៕