នៅព្រឹកថ្ងៃចន្ទ ទី២៧ ខែកញ្ញា ឆ្នាំ២០២១ នេះក្លិបកីឡាបាល់ទាត់ វិសាខា បានប្រកាសសម្រេចតែងតាំងគ្រូជំនួយលោក Tunji Ayoyinka Akeeb ជាគ្រូបង្គោលស្ដីទី ដើម្បីដឹកនាំគ្រប់ការប្រកួតសេសសល់ ក្នុងរដូវកាលឆ្នាំ២០២១ នេះ។
ក្លិបវិសាខា បញ្ជាក់ថាលោក Tunji Ayoyinka បានចូលរួមជាមួយក្រុមមួយនេះជាច្រើនឆ្នាំមកហើយ ពិសេសគ្រូបង្វឹកកាន់សញ្ញាបត្រ B-License រូបនេះ ក៏ធ្លាប់ដឹកនាំក្លិបកីឡាបាល់ទាត់វិសាខា ម្តងក្នុងនាមគ្រូបង្គោលស្ដីទីម្ដងរួចមកហើយ កាលពីឆ្នាំ២០១៩។ នេះជាមូលហេតុដែលថ្នាក់ដឹកនាំក្លិបសម្រេចផ្ដល់សេចក្ដីទុកចិត្តឲ្យលោកដឹកនាំក្រុមបន្ដ សម្រាប់ការប្រកួតសេសសល់ ក្នុងពានរង្វាន់មិត្តហ្វូនខេមបូឌានលីគ ឆ្នាំ២០២១ ក៏ដូចជាការប្រកួតពានរង្វាន់សម្ដេចតេជោ ហ៊ុន សែន លើកទី១៥ (ថ្នាក់ជាតិ) ឆ្នាំ២០២១ នេះផងដែរ។
អត្ថបទពាក់ព័ន្ធ៖ក្រុមបាល់ទាត់វិសាខា ប្រកាសចែកផ្លូវជាមួយគ្រូបង្វឹក ក្នុងដំណាក់កាលតានតឹង
ប្រកួតដែលនៅសេសសល់របស់វិសាខា ក្នុងពានរង្វាន់លីគកំពូលកម្ពុជា មានដូចជាត្រូវជួបក្រុមគីរីវង់សុខសែនជ័យ នៅថ្ងៃទី២៧ខែកញ្ញ ឆ្នាំ២០២១ នៅកីឡដ្ឋានព្រីនស៍ ហើយបន្តជួបក្រុមម្ចាស់ផ្ទះព្រះខ័នរាជស្វាយរៀង នៅថ្ងៃទី៣ខែ តុលា ឆ្នាំ២០២១។ ចំណែកប្រកួតជាមួយក្រុមភ្នំពេញក្រោន និងកងយោធពលខេមរភូមិន្ទ នៅមិនទាន់កំណត់ពេលវេលានៅឡើយ៕
