អ្នកចាត់ការទូទៅក្រុមជម្រើសជាតិកម្ពុជា Keisuke Hondaបានបង្ហាញខ្លួនជាលើកដំបូងជាមួយក្រុមបាល់ទាត់ FK Sūduva ក្នុងលីគពូលនៃប្រទេសលីទុយអានី A Lyga នៅយប់ថ្ងៃអាទិត្យ ទី២៦ ខែកញ្ញា ឆ្នាំ២០២១ ថ្មីៗនេះ ខណៈរូបគេរកបានគ្រាប់បាល់១គ្រាប់ផងដែរ ក្នុងជ័យជម្នះ៤គ្រាប់។
ក្រុមFK Sūduva កំពុងតែឈរកំពូលតារាងបណ្ដោះអាសន្ន ក្រោយយកឈ្នះលើក្រុម Banga ដោយលទ្ធផល ៤-០។ គ្រាប់បាល់ទាំង៤គ្រាប់នេះរកបានដោយកីឡាករ Rommens, Honda, Taravel និងGargalatzidis។ Honda ត្រូវបានលោក Víctor Basadre ដែលជាគ្រូបង្វឹកដាក់ឱ្យចូលលេងបាន ៧៥នាទីនៅប្រកួតដំបូងរបស់ខ្លួននេះ។
ក្លិប FK Sūduva ក្នុងទ្វីបអឺរ៉ុប បានចុះកុងត្រាជាមួយកីឡាករវ័យ៣៥ឆ្នាំរូបនេះ កាលពីពាក់កណ្ដាលខែកញ្ញា ថ្មីៗនេះ ដោយពាក់ឯកសណ្ឋានលេខ៣។ នេះជាប្រទេសទី៩ ហើយដែលបុរសជនជាតិជប៉ុន រូបនេះប្រកបអាជីពជាកីឡាករបាល់ទាត់ដោយក្នុងនោះមាន ជប៉ុន, រុស្ស៊ី, អ៊ីតាលី, ម៉ិចស៊ីកូ, អូស្ត្រាលី, ហុល្លង់, ប្រេស៊ីល,អាហ្សេបៃហ្សង់ និងលីទុយអានី នេះផ្ទាល់។
អត្ថបទពាក់ព័ន្ធ៖៤រឿងពេលអ្នកចាត់ការទូទៅក្រុមកម្ពុជា Keisuke Honda ចូលរួមក្លិបថ្មីនៅលីទុយអានី
ក្រុមបាល់ទាត់ FK Sūduva ប្រកួតបាន២៨លើក ឈ្នះបាន១៩លើក ស្មើ៤លើក និងចាញ់៥លើកមាន៦១ពិន្ទុ។ ពានរង្វាន់ A Lyga តម្រូវឱ្យក្រុមជាសមាជិកទាំង១០ក្រុម ប្រកួតវិលជុំចំនួន៤ជើង គឺ៣៦សប្ដាហ៍ទើបបញ្ចប់៕
