ប្រិយមិត្តអ្នកអានប្រហែលជានៅចាំបាន កម្មវិធី Miss Grand Cambodia ក្រុមការងាររបស់កម្មវិធីនេះបានចេញមកប្រកាសមិនឱ្យផេក Universe Pageant ធ្វើការបង្ហោះអ្វីពាក់ព័ន្ធនឹងកម្មវិធីខ្លួន ហើយមកដល់ថ្ងៃទី២៨ ខែកញ្ញា ឆ្នាំ២០២១នេះ កម្មវិធីស្ថិតក្រោមការគ្រប់គ្រងរបស់ម្ចាស់ផលិតកម្ម មហាហង្ស លោក អ៊ិន សុភិន បានព្រមាននិងហាមមិនឱ្យ Admin page Support Beauty Pageant ធ្វើការឃោសនាផ្សព្វផ្សាយ ឬក៏ប្រើប្រាស់សំណេរណាមួយពាក់ព័ន្ធនឹងកម្មវិធីរបស់ខ្លួនឡើយ។
យោងតាមសេចក្ដីប្រកាសរបស់ផេកផ្លូវការ Miss Grand Cambodia បានឱ្យដឹងថាអ្នកកាន់ផេកដែលត្រូវបានហាមនេះមានឈ្មោះថានិមល គឺជាគណៈកម្មការ Miss Cambodia កុំយកឈ្មោះកម្មវិធី Miss Grand Cambodia ទៅផុសលេងសើចលក្ខណៈជាន់ពន្លិច ហើយចាប់ពីពេលនេះតទៅគឺហាមមិនឱ្យ Admin page ផុសអ្វីដែលពាក់ព័ន្ធនឹងកម្មវិធីខ្លួនទៀតឡើយ។
«តាងនាមយើងខ្ញុំជាអ្នកគ្រប់គ្រងកម្មវិធី Miss Grand Cambodia សូមព្រមានជាផ្លូវការថាម្ចាស់កាន់ផេកនេះឈ្មោះ កញ្ញា និមល ដែលជា គណៈកម្មការ Miss Cambodia សូមមេត្តាកុំយកឈ្មោះ Miss Grand Cambodia ទៅលេងសើចដើម្បីជាការជាន់ពន្លិចហើយពីថ្ងៃនេះទៅឈប់យកការងារណាដែលពាក់ពន្ធ័នឹង Miss Grand Cambodia ទៅចុះផ្សាយទៀត ប្អូនស្រីមិនបានលើកស្ទួយអ្វីទេនិស្ស័យនិងសណ្ដានគំនិតរបស់ប្អូនមានតែការច្រណែនឈ្នានីសមិនចង់អោយកូនខ្មែរដើរទៅមុខទេ ឈប់ពីពេលនេះតទៅបើមិនឈប់ទេ Miss Grand Cambodia និងចាត់ការតាមផ្លូវច្បាប់ហើយ. សូមអរគុណ !»
កន្លងមកកម្មវិធី Miss Grand Cambodia បានធ្វើការហាមឃាត់ផេក Universe Pageant ដែលជាផេកដ៏ធំនិងល្បីមានអ្នកគាំទ្រ (Follower) ជាង ៥១K និង ចំនួនចុច Like គាំទ្រជាង៤១K ក៏ធ្លាប់រងនូវការព្រមានដូចគ្នាដែរ គឺហាមឃាត់មិនឱ្យ Admin ធ្វើការផុសផ្សព្វផ្សាយពាក់ព័ន្ធនឹងកម្មវិធីខ្លួននោះឡើយ។
ងាកមក Admin Page Universe Pageant ក្រោយត្រូវបានកម្មវិធីព្រមាន ក៏មិនបានខ្វល់ខ្វាយអង្វរកម្មវិធីនោះដែរ ដោយលោកបានបញ្ជាក់ថានៅក្នុងនោះគឺជារឿងភាន់ច្រឡំទាំងស្រុង ប៉ុន្តែលោកមិនចង់បកស្រាយឱ្យកាន់តែអូសបន្លាយពេលទៅមុខដែរ បើគេមិនឱ្យលោកគាំទ្រនិងជួយផុសផ្សព្វផ្សាយ លោកក៏មិនផុសផ្សព្វផ្សាយជាបន្តទៀតដែរ សំខាន់ហ្វេនៗដែលតាមដានផេករបស់លោកបានយល់និងដឹងពីមូលហេតុពិតប្រាកដទៅគ្រប់គ្រាន់ហើយ ចំណែកលោកនឹងនៅតែបន្តធ្វើការផ្សព្វផ្សាយកម្មវិធីប្រកួតផ្សេងៗជាបន្តទៀត ព្រោះមានអ្នកតាមដាននិងគាំទ្រលោកជាច្រើននៅតែបន្តលើកទឹកចិត្តនិងកម្លាំងចិត្តសម្រាប់លោក ម្យ៉ាងនោះគឺជាក្ដីស្រលាញ់ចូលចិត្តផ្ទាល់ខ្លួនរបស់លោកផងដែរ។
គួរដឹងថាបន្ទាប់ពីទទួលបានការព្រមានរួច Admin Page Universe Pageant បានឈប់ផុសអ្វីដែលពាក់ព័ន្ធជាមួយនឹងកម្មវិធី Miss Grand Cambodia ហើយងាកមកផ្ដោតការផុសផ្សព្វផ្សាយកម្មវិធីផ្សេងៗជាច្រើនទៀត ដោយបច្ចុប្បន្នផេកមួយនេះកាន់តែពង្រីកខ្លួនដោយចាប់ផុសបន្ថែមលើសពីកម្មវិធីប្រកួតបវរកញ្ញា តែមានជាការផុសផ្សព្វផ្សាយភាពយន្ត បទចម្រៀង និងតារាបរទេសបន្ថែមទៀត ហើយនៅតែមានសន្ទុះគាំទ្រពីបណ្ដាអ្នកគាំទ្រខ្លាំងដដែល។
