បន្ទាប់ពីវះកាត់កែសម្ផស្សរួច យាយគ្រវី បានប្រកាសថាមុខខ្លួនប្រៀបដូចជាតារាសម្ដែងល្បីរបស់ប្រទេសចិន Fan Bingbing ប៉ុន្តែពិធីករ និងជាផលិតករដ៏ល្បីផលិតរឿង «ខ្មោចត្រឡោកបែក» បែរជានិយាយចំអន់ឱ្យយាយគ្រវីថាបែបនេះទៅវិញ។
នៅក្នុងសន្និសីទសារព័ត៌មានរឿងថ្មីរបស់ខ្លួនដែលមានយាយគ្រវីជាតួអង្គសំខាន់ ដែលអាចនិយាយបានថាជារឿង «ខ្មោចត្រឡោកបែក» វគ្គថ្មីលោក Poj Arnon បានពោលបែបលេងសើចឱ្យយាយគ្រវីថាមុខដូច Fan Bingbing ឬមុខដូចគេទះចូលក្នុងដីឱ្យប្រាកដ?
លោកបាននិយាយនៅក្នុងសន្នីសីទកាសែតប្រូម៉ូតផ្សព្វផ្សាយរឿងថ្មីរបស់លោកថា លោកមានក្ដីបារម្ភខ្លាំង ដោយសារតែ យាយគ្រវី បានទៅធ្វើមុខកែសម្ផស្សពាក់កណ្ដាលទី ដូច្នេះហើយលោកក្រែងថាពេលធ្វើរួចមុខនិងផ្លាស់ប្ដូរច្រើនធ្វើឱ្យមើលទៅអ្នកទស្សនាអាចនឹងប្លែកមុខ ប៉ុន្តែក្រោយពីវះកាត់កែសម្ផស្សរួចដូចជាមិនឃើញមានអ្វីផ្លាស់ប្ដូរច្រើនគួរឱ្យព្រួយបារម្ភនោះទេ។ ហើយនេះគឺជាអ្វីដែលធ្វើឱ្យលោកបាននិយាយឌឺចំអន់ឱ្យយាយគ្រវីថា មុខដូច Fan Bingbing ឬដូចមុខដូចគេទះខ្ទប់ចូលដី (ភាសាថៃសំនៀងឈ្មោះ Fan Bingbing ស្រដៀងនឹងការបញ្ចេញសំឡេងទះខ្ទប់ចូលដី)
រឿងខ្មោចត្រឡោកបែកវគ្គថ្មី នឹងបញ្ចាំងឱ្យទស្សនានៅតាមរោងភាពយន្តចាប់ពីថ្ងៃទី២ ខែតុលា ឆ្នាំ២០២១ ខាងមុខនេះហើយ ដោយផលិតករនិងជាអ្នកដឹកនាំរឿងល្បីរូបនេះមានសង្ឃឹមថានឹងទទួលបានការស្រលាសញ់ចូលចិត្តនិងគាំទ្រច្រើន ព្រោះរឿង ខ្មោចត្រឡោកបែកគឺជារឿងដែលហ្វេនគាំទ្រខ្លាំងនិងរកចំណូលបានច្រើនខ្លាំងមួយ៕