ក្រុមវាយកូនបាល់ជម្រើសជាតិកម្ពុជា មានឈ្មោះចូលរួមប្រកួតពានរង្វាន់វាយកូនបាល់អន្តរជាតិប្រចាំទ្វីបអាស៊ីនិងមហាសមុទ្រប៉ាស៊ីហ្វិក Davis Cup 2021 កម្រិតទី៤ (Asia/Oceania Group IV) ដែលរៀបចំនៅទីលាន Bahrain Tennis Federation Courts ក្នុងទីក្រុង Isa Town ប្រទេសបារ៉ែន។
ក្រុមចូលរួមប្រកួតមានម្ចាស់ផ្ទះបារ៉ែន, កម្ពុជា, កោះហ្គាម, អ៊ីរ៉ង់, អ៊ីរ៉ាក់,គីហ្ស៊ីស្ថាន,ម៉ុងហ្គោលី,អូម៉ង់,អារ៉ាប៊ីសាអ៊ូឌីត,សិង្ហបុរី,តាហ្ស៊ីគីស្ថាន,ទួរមេនីស្ថាន,យេមែន និងអារ៉ាប់រួម។ ចំណែកក្រុមបង់ក្លាដេស និងមីយ៉ាន់ម៉ា បានសុំដកខ្លួនពីការប្រកួត។
ក្រុមដែលចូលរួមត្រូវចាប់ឆ្នោតជា២ពូល ហើយប្រកួតវិលជុំសន្សំពិន្ទុ។ ការប្រកួតធ្វើឡើងពីថ្ងៃទី១៨ ដល់២៣ ខែតុលា ឆ្នាំ២០២១។ ក្រុមខ្លាំងចំនួន២ក្រុមតាមពូលនីមួយៗមានឈ្មោះឡើងទៅវគ្គពាក់កណ្ដាលផ្ដាច់ព្រ័ត្រ ហើយក្រុមចំណាត់ថ្នាក់ល្អ៣ក្រុមមានឈ្មោះឡើងទៅប្រកួតកម្រិត Asia/Oceania Group III ឆ្នាំ២០២២។
ចំពោះក្រុមកម្ពុជា ដឹកនាំដោយលោក ទេព រិទ្ធីវិត អគ្គលេខាធិការសហព័ន្ធកីឡាវាយកូនបាល់កម្ពុជា ហើយកីឡាករមានកីឡាករ ទេព ធីម៉ូធី ឃ្លាំង ពន្លក, ប៊ុន កេន្នី និង ឡុង សំនៀង។
ពានរង្វាន់ Davis Cup 2021 បែងចែកជាច្រើនផ្នែក ដោយកម្រិតខ្ពស់មានវគ្គជុំផ្ដាច់ព្រ័ត្រ Davis Cup Finalsក្នុងនោះសមាជិក១៨ប្រទេស, ផ្នែកកម្រិតពិភពលោកផ្នែកទី១ World Group Iមានសមាជិក២៤ប្រទេស, វគ្គជម្រុះ World Group I Play Off មានសមាជិក២៤ប្រទេស, វគ្គប្រកួត World Group II មានក្រុមចំនួន២៤ប្រទេស, វគ្គប្រកួត World Group II Play Off មាន២៤ប្រទេស និងការប្រកួត Group III គឺធ្វើឡើងតាមទ្វីបនីមួយៗ។
ក្រុមវាយកូនបាល់របស់កម្ពុជា ធ្លាប់មានឈ្មោះឡើងទៅលេងកម្រិត Asia/Oceania Group III បានបានប៉ុន្មានឆ្នាំគឺចន្លោះឆ្នាំ២០១៣ ដល់ឆ្នាំ២០១៦ ទើបធ្លាក់ចេញទៅ Asia/Oceania Group IV វិញមកទល់សព្វថ្ងៃ៕
