«បុព្វេសន្និវាស» រឿងភាគបុរាណថៃដែលមានការល្បីល្បាញខ្លាំងមួយរបស់ប្រទេសថៃ និងមានការចាប់អារម្មណ៍ច្រើនគួរសមក្នុងព្រះរាជាណាចក្រកម្ពុជា ពិសេសក្នុងចំណោមអ្នកដែលនិយមទស្សនារឿងភាគថៃ ខណៈនេះក្រុមផលិតកំពុងតែដុតដៃដុតជើងខ្លាំង បន្ទាប់ពីរង់ចាំអស់ជាង៣ឆ្នាំដើម្បីទស្សនាវគ្គទីពីរនោះ ពេលនេះសាច់រឿងវគ្គទីពីរកំពុងតែចាប់ផ្ដើមថតបណ្ដើរៗហើយ។
សម្រាប់វគ្គទីពីរនេះដូចទស្សនិកជននិងប្រិយមិត្តអ្នកគាំទ្របានដឹងហើយថា Pope Thanawat និង Bella Ranee នឹងត្រលប់មកសម្ដែងទាំងជាតួអង្គ ភីម៉ឺន ការ៉ាកេត ក៏ដូចជាសម្ដែងជាតួអង្គជំនាន់កូនៗដែរ ព្រោះកូនភ្លោះរបស់ភីម៉ឺន មានមុខមាត់ដូចឪពុក ចំណែកតួឯកស្រីដែលឆ្លងភពមកពីអនាគតក៏មានមុខមាត់ដូចជាតួឯកស្រីប្រៀបដូចជាកូនភ្លោះ។
ខណៈដែលតួអង្គសំខាន់ៗ ទាំងតួឯកប្រុសស្រី ភីម៉ឺន (Pope) ម៉ែការ៉ាកេត (Bella) តួអង្គគាំទ្រសំខាន់ៗ ដូចជា Prama Imanotai , Kannarun Wongkajornklai ប៉ុន្តែបែរជាអវត្តមានតួអង្គសំខាន់ពីររូបពីវគ្គទីមួយគឺ តួអង្គ ភីភីម និង តួអង្គ ភីយ៉ែម ខ្ញុំបម្រើដ៏ស្មោះត្រង់របស់ម៉ែការ៉ាកេតទៅវិញ ព្រោះនៅក្នុងរូបភាព Poster និងរូបភាពលឈុតសំលៀកបំពាក់មិនមានវត្តមានរបស់តួអង្គទាំងពីរនោះឡើយ ដែលធ្វើឱ្យហ្វេនៗមានការសោកស្ដាយយ៉ាងខ្លាំង។
យ៉ាងណាមិញការបង្ហាញរូបភាពផ្សេងៗនោះគ្រាន់តែមួយផ្នែកប៉ុណ្ណោះ ចាំមើលនៅក្នុងសាច់រឿង នឹងមានវត្តមានខ្ញុំបម្រើដ៏ស្មោះស្ម័គ្ររបស់ការ៉ាកេតឬក៏យ៉ាងណានោះមានតែរង់ចាំតាមដាននៅពេលរឿងនេះបញ្ចាំងប៉ុណ្ណោះ។
ចំពោះកាលបរិច្ឆេទបញ្ចាំងរឿងភាគថ្មី «ព្រហ្មលិខិត» ឬ «បុព្វេសន្និវាស២» នៅមិនទាន់ត្រូវបានខាងផលិតកម្ម ឬក្រុមផលិតបង្ហើបឱ្យដឹងថានឹងបានទស្សនានៅលើកញ្ចក់ទូរទស្សន៍ប៉ុស្ដិ៍លេខ៣ នៅពេលណានោះឡើយ៕
