នៅរសៀលថ្ងៃទី១៨ ខែតុលា ឆ្នាំ២០២១ នេះតារាកំប្លែងដ៏ល្បីមួយរូបនៅក្នុងព្រះរាជាណាចក្រកម្ពុជាអ្នកនាង ស្រេង សុកាន់ដា ហៅ ស្រីខ្ញុង វ័យ៣៧ឆ្នាំ បានដាច់ចិត្តចេញមក Live ផ្ទាល់លើផេករបស់ខ្លួននៅមុខសាលាដំបូងរាជធានីភ្នំពេញ ប្រកាសថាពេលនេះខ្លួនក្ស័យធុនហើយ មានបំណុលជាប់ខ្លួន និងចង់មកប្ដឹងខ្លួនឯងចូលទៅកាន់តុលការ។
អ្នកនាងស្រីខ្ញុង ក្រោយបៀមទុក្ខអស់រយៈពេល៣ឆ្នាំ ពេលនេះអ្នកនាងបានដាច់ចិត្តទម្លាយឱ្យមហាជននិងអ្នកគាំទ្រ បានដឹងហើយថាអ្នកនាងជំពាក់បំណុលសរុបទាំងម្ចាស់បំណុលខ្មែរនិងជនជាតិចិនជាង៥៧ម៉ឺនដុល្លារ។
នៅក្នុងការ Live នោះ អ្នកនាងបានរៀបរាប់ថាបំណុលដ៏ច្រើនមហាសាលនេះផ្ដើមឡើងចេញពី ការរកស៊ីដំបូងរបស់ខ្លួន ហើយខាតដើមខាតចុងធ្វើឱ្យអ្នកនាងដាច់ចិត្តរកប្រាក់មកទប់ទល់សងគេស្ងាត់ៗ និងលាក់បាំងស្វាមីព្រោះខ្លាចប្ដីដឹងខឹងនិងលែងលះខ្លួន ទើបធ្វើឱ្យបំណុលនេះកាន់តែកើនឡើងរហូតរាប់សិបម៉ឺនដុល្លារ មួយវិញទៀតបំណុលនោះក៏កើតឡើងពីការលេងតុងទីនត្រូវគេបោកប្រាស់និងរត់ចោលការបង់ផងដែរ។
ងាកមកការជំពាក់ប្រាក់ច្រើនឡើងៗ តាំងពីតិចរហូតដល់ច្រើននេះព្រោះតែអ្នកនាង ស្រលាញ់មុខមាត់ស្រលាញ់ កិត្តិយសពេក ទើបធ្វើឱ្យអ្នកនាងព្យាយាមលាក់បាំង មិនប្រាប់ឱ្យអ្នកណាបានដឹង សុខចិត្តបៀមទុក្ខតែម្នាក់ឯង រហូតមកដល់ពេលនេះទប់លែងជាប់ទើបអ្នកនាងដាច់ចិត្តចេញមកទម្លាយការពិតនិងអំពាវនាវសុំការយោគយល់អធ្យាស្រ័យពីម្ចាស់បំណុលទាំងអស់ទុកឱកាសឱ្យអ្នកនាងដកដង្ហើមនិងបានរកប្រាក់សងបណ្ដើរៗ អ្នកនាងសន្យាថាអ្នកនាងមិនរត់ចោលការទទួលខុសត្រូវជាដាច់ខាត ប៉ុន្តែបើសិនជាម្ចាស់បំណុលទាំងអស់មិនយល់ស្របហើយចង់ប្ដឹងអ្នកនាងចូលពន្ធនាគារក៏អ្នកនាង មិនប្រកែកតវ៉ាដែរ គឺអ្នកនាងសុខចិត្តទទួលខុសត្រូវចំពោះមុខច្បាប់។
អ្នកនាងខ្ញុង បានសុំអង្វរករដែរថា បើសិនអ្នកនាងមានរឿងអ្វីកើតឡើង អ្នកនាងសុំការចិត្តសុំឱ្យបងប្អូនដែលស្រលាញ់និងអាណិតអ្នកនាង មេត្តាជួយឧបត្ថម្ភដល់កូនអ្នកនាងម្នាក់មួយដុល្លារផង ដើម្បីឱ្យកូនតូចអ្នកនាងមានទឹកដោះគោបៅ និងកូនច្បងបានរៀនសូត្របន្តផង។
សម្រាប់បំណុលរបស់អ្នកនាង ស្រេង សុកាន់ដានេះត្រូវបានអ្នកនាងលាក់ជិតមិនឱ្យស្វាមីលោកកៃដបានដឹងនោះឡើយ រហូតដល់ពេលស្វាមីបានដឹងរឿងគ្រប់យ៉ាងបានហួសមិនអាចកែច្នៃបាននោះ។
ខណៈដែលផ្ទះនិងឡាន របស់អ្នកនាងសុទ្ធតែបង់រំលោះប៉ុណ្ណោះ និយាយសរុបរួមក្នុងមួយខែៗអ្នកនាងបង់ការប្រាក់វិញជាង៤ម៉ឺនដុល្លារអាមេរិក ដូច្នេះទោះជាអ្នកនាងរកស៊ីចំណេញប៉ុណ្ណាក៏មិនអាចទប់ជាប់ដែរ។
