ក្រុមវាយកូនបាល់ជម្រើសជាតិកម្ពុជា បានយកឈ្នះក្រុមយេមែន ក្នុងប្រកួតបើកឆាកពូល C នៃពានរង្វាន់វាយកូនបាល់អន្តរជាតិប្រចាំទ្វីបអាស៊ីនិងមហាសមុទ្រប៉ាស៊ីហ្វិក Davis Cup 2021 កម្រិតទី៤ (Asia/Oceania Group IV) ឪនៅទីលាន Bahrain Tennis Federation Courts ក្នុងទីក្រុង Isa Town ប្រទេសបារ៉ែន។
ក្រុមជម្រើសជាតិវាយកូនបាល់កម្ពុជា ស្ថិតក្នុងពូល C ជាមួយក្រុមជម្រើសជាតិអ៊ីរ៉ង់,គីជីស្ថាន និងយេមែន ខណៈពូល A មានអារ៉ាប់រួម, អារ៉ាប៊ីសាអ៊ូឌីត,ម្ចាស់ផ្ទះបារែន និងហ្គាម ខណៈពូល B មានទួរមេនីស្ថាន,អូម៉ង់,ម៉ុងហ្គោលី និងអ៊ីរ៉ាក់។ ក្រុមតាមពូលនីមួយៗត្រូវប្រកួតវិលជុំសន្សំពិន្ទុ ហើយក្រុមដែលមានចំណាត់ថ្នាក់លេខ១និងលេខ២ មានឈ្មោះឡើងទៅប្រកួតជម្រុះដើម្បីរកក្រុមខ្លាំងចំនួន៣ឡើងទៅលេង Asia/Oceania Group III។
ជ័យជម្នះរបស់កម្ពុជា លើក្រុមយេមែន ក្នុងលទ្ធផល ៣ប្រកួតទល់០៖
ប្រកួតទី១៖ ឡុង សំនៀង ឈ្នះ Nawras Hussein ៦-២,៦-៤ (១:៣៣នាទី)
ប្រកួតទី២៖ ប៊ុន កេន្នី ឈ្នះ Halil Sallam ៦-០,៦-១ (០:៥០នាទី)
ប្រកួតទី៣៖ ឃ្លាំង ពន្លង / ទេព ធីម៉ូធី ឈ្នះ Nawras Hussein / Halil Sallam ៦-១,៦-០ (០:៤៧នាទី)
សម្រាប់ការប្រកួតបន្ទាប់ក្នុងពូល C របស់កម្ពុជា ត្រូវជួបក្រុមគីជីស្ថាន នៅល្ងាចថ្ងៃអង្គារ នេះ ខណៈប្រកួតចុងក្រោយប៉ះអ៊ីរ៉ង់ ខណៈការប្រកួតធ្វើឡើងពីថ្ងៃទី១៨ ដល់២៣ ខែតុលា ឆ្នាំ២០២១។
ក្រុមវាយកូនបាល់របស់កម្ពុជា ធ្លាប់មានឈ្មោះឡើងទៅលេងកម្រិត Asia/Oceania Group III បានបានប៉ុន្មានឆ្នាំគឺចន្លោះឆ្នាំ២០១៣ ដល់ឆ្នាំ២០១៦ ទើបធ្លាក់ចេញទៅ Asia/Oceania Group IV វិញមកទល់សព្វថ្ងៃ៕