ក្រុមវាយកូនបាល់ជម្រើសជាតិកម្ពុជា បានចាញ់អ៊ីរ៉ង់ ក្នុងប្រកួតបិទពូល C នៃពានរង្វាន់វាយកូនបាល់អន្តរជាតិប្រចាំទ្វីបអាស៊ីនិងមហាសមុទ្រប៉ាស៊ីហ្វិក Davis Cup 2021 កម្រិតទី៤ (Asia/Oceania Group IV) នៅទីលាន Bahrain Tennis Federation Courts ក្នុងទីក្រុង Isa Town ប្រទេសបារ៉ែន នាល្ងាចថ្ងៃព្រហស្បតិ៍ ទី២១ ខែតុលា ឆ្នាំ២០២១នេះ។
កម្មវិធីប្រកួតពូល C បណ្ដោះអាសន្នគឺ៖
-កម្ពុជា ៣-០ យេមែន
-អ៊ីរ៉ង់ ៣-០ កៀហ្ស៊ីស៊ីស្ថាន
-កម្ពុជា ២-១ កៀហ្ស៊ីស៊ីស្ថាន
-អ៊ីរ៉ង់ ៣-០ យេមែន
-អ៊ីរ៉ង់ ៣-០ កម្ពុជា
-កៀហ្ស៊ីស៊ីស្ថាន Vs យេមែន
កម្ពុជា ដឹកនាំដោយលោក ទេព រិទ្ធីវិត អគ្គលេខាធិការសហព័ន្ធកីឡាវាយកូនបាល់កម្ពុជា មានកីឡាករមានកីឡាករ ទេព ធីម៉ូធី ឃ្លាំង ពន្លក, ប៊ុន កេន្នី និង ឡុង សំនៀង។
ពានរង្វាន់ Davis Cup 2021 កម្រិតទី៤ (Asia/Oceania Group IV) នេះបានកំណត់ក្រុមដែលចូលរួមទាំង១២ បែងចែកជា៣ ពូល ដោយក្នុងនោះក្រុមតាមពូលនីមួយៗត្រូវប្រកួតវិលជុំគ្នា ហើយក្រុមលេខ១និងលេខ២ មានឈ្មោះឡើងទៅវគ្គជម្រុះ រកក្រុមខ្លាំងជាងគេ៣ក្រុម ឡើងទៅលេងកម្រិតទី៣ (Asia/Oceania Group III)។
ដូច្នេះក្រុមអ៊ីរ៉ង់ និងកម្ពុជា ដឹកដៃគ្នាទៅជុំបន្តដើម្បីជម្រុះរកក្រុមខ្លាំងប្រចាំកម្រិតទី៤ Asia/Oceania Group IV ចំនួន៣ក្រុម ទៅលេងក្នុងការប្រកួតកម្រិតទី៣ Asia/Oceania Group III ឡើងវិញ។ ប៉ុន្តែអ្វីៗនៅរង់ចាំការប្រកួតបញ្ចប់នៅពូលផ្សេងៗសិន មុនគណៈកម្មការចាប់គូប្រកួតជាបន្ត៕
