សម្រាប់ប្រទេសជាច្រើនលើពិភពលោកដែលតម្រូវឱ្យព្រះរាជបុត្រាជាអ្នកស្នងបល្ល័ង្កប៉ុន្តែក៏មានប្រទេសមួយចំនួនបានកែប្រែច្បាប់ដោយអនុញ្ញាតឱ្យព្រះនាងម្ចាស់អាចស្នងព្រះរាជបល្ល័ង្កបន្តពីព្រះបិតាបានដូចគ្នា។ ថ្ងៃនេះត្រយងសូមណែនាំ ព្រះនាងម្ចាស់តូច Leonor ឬ Leonor de Todos los Santos de Borbón y Ortiz អនាគតក្សត្រីនៃប្រទេសអេស្ប៉ាញ ដែលមានព្រះឆោមលោមពណ៌ល្អល្អះ ស្រស់ស្អាតទាក់ភ្នែកដែលបានឃើញទ្រង់គ្រប់ៗគ្នា ដូច្នេះហើយព្រះកិត្តិយសរបស់អនាគតក្សត្រីតូចនេះ មានភាពល្បីល្បាញខ្លាំងមិនចាញ់បណ្ដាតារាល្បីៗនៅលើពិភពលោកនោះឡើយ
ព្រះនាងម្ចាស់តូច Leonor កើតនៅថ្ងៃទី៣១ តុលា ឆ្នាំ២០០៥ បច្ចុប្បន្នមានព្រះជន្ម ១៦ព្រះវស្សា ទ្រង់ជាព្រះបុត្រីច្បងរបស់ស្ដេច Felipe VI និងម្ចាស់ក្សត្រី Letizia ព្រះនាងមានម្ចាស់ប្អូនមួយអង្គទៀតមានវ័យប្អូនទ្រង់ ២ព្រះវស្សាគឺព្រះនាងម្ចាស់ Infanta Sofia។ សព្វថ្ងៃព្រះនាងម្ចាស់បានចេញទៅបន្តការសិក្សានៅប្រទេស Wale កាលពីខែសីហា ទើបតែពីរថ្ងៃមុននេះប៉ុណ្ណោះដែលទ្រង់បានត្រលប់មកមាតុប្រទេសដើម្បីសួរសុខទុក្ខព្រះមាតានិងព្រះបិតា។
មនុស្សភាគច្រើនបាននិយាយថាទ្រង់កើតនៅក្នុងបរមរាជវាំង ប៉ុន្តែជីវិតរបស់ទ្រង់បែរជាគួរឱ្យអាណិតជាពន់ពេក ព្រោះទ្រង់ត្រូវស្ពាយសម្ពាយមហាធ្ងន់តាំងពីព្រះជន្មនៅក្មេង ខណៈព្រះមាតារបស់ទ្រង់មានភាពតឹងតែងយ៉ាងខ្លាំងចំពោះទ្រង់។ ព្រះនាង Leonor និងម្ចាស់ប្អូនទៅសាលារៀនតែមិនអាចលេងជាមួយមិត្តភក្ដិដូចជាក្មេងដទៃ មិនអាចទទួលអំណោយ ហើយទ្រង់ក៏មិនអាចលេងទូរស័ព្ទឬមើលទូរទស្សន៍កម្សាន្តដូចជាក្មេងដទៃទៀតដែរ។
សាលាដែលទ្រង់រៀនមិនពេញចិត្តជាខ្លាំងដែលម្ចាស់ក្សត្រី Letizia បញ្ជាឱ្យសាលាប្ដូរមុខម្ហូបសម្រាប់សិស្សមកជាបន្លែនិងត្រីទាំងអស់ ពួកគេបានយករឿងនេះទៅប្ដឹងនិងទូលថ្វាយស្ដេច Felipe VI តែនៅពេលនិយាយដល់រឿងព្រះបិតា ព្រះអង្គបានតែនៅស្ងៀមទុកឱ្យព្រះមហេសីជាអ្នកចាត់ចែងដដែល។ យ៉ាងណាមិញបើប្រៀបជាម្ចាស់ប្អូនរបស់ព្រះនាងម្ចាស់ ព្រះនាងតូច Infanta Sofia អាចលេងសើចធ្វើចរិតដូចជាក្មេងស្រីទូទៅ មិនចាំបាច់ខ្វាយខ្វល់ឬរៀបចំខ្លួនឱ្យធំជាងវ័យដើម្បីត្រៀមខ្លួនធ្វើជាក្សត្រីនោះ តែព្រះនាង Leonor ត្រូវតែប្រយ័ត្នប្រយែងគ្រប់វិនាទី ទ្រង់មិនអាចធ្វើឱ្យកើតមានកំហុសណាមួយដែលធ្វើឱ្យល្អក់កករដល់ទឹកចិត្តប្រជានុរាស្ត្រប្រទេសអេស្ប៉ាញនោះឡើយ ព្រោះទ្រង់គឺជាអនាគតអ្នកគ្រប់គ្រងដែនដីមួយនេះ។
រំលឹកឡើងវិញ ចាប់តាំងពីបើកព្រះនេត្រឃើញពិភពលោកនិងធំដឹងក្ដី ព្រះនាងតូចត្រូវទទួលអំរែកជាអ្នកស្ដាររាជវង្សអេស្ប៉ាញ ដែលកំពុងបាត់បង់ប្រជាប្រិយភាពដោយសារតែអតីតស្ដេចអេស្ប៉ាញសម្បូរស្រីស្នេហ៍និងកូនក្រៅបរមរាជវាំងច្រើនសន្ធឹកសន្ធាប់ ចំណែកព្រះកន្និដាររបស់ព្រះបិតាព្រះនាងមានជាប់ពាក់ព័ន្ធនឹងរឿងអាស្រូវមិនបង់ពន្ធចូលរដ្ឋ។ ប៉ុន្តែវត្តមានរបស់ព្រះនាងដ៏គួរឱ្យស្រលាញ់រូបនេះនៅលើផែនដី បានធ្វើឱ្យបេះដូងប្រជារាស្ត្រអេស្ប៉ាញទន់ចិត្តហើយគោរពស្រលាញ់ព្រះនាងម្ចាស់តូចដ៏បរិសុទ្ធរូបអស់ពីដួងចិត្ត។
ថ្វីត្បិតតែព្រះនាងម្ចាស់តូច Leonor គឺជាបេះដូងនៃប្រជារាស្ត្រអេស្ប៉ាញ ប៉ុន្តែក៏មានអ្នកខ្លះសម្ដែងការមិនពេញចិត្តចំពោះព្រះមាតាទ្រង់ដែលតឹងរឹងហួសហេតុចំពោះទ្រង់ យ៉ាងណាមិញក៏មានមតិមួយចំនួនបានលើកមកបង្ហាញពីច្បាប់ដ៏តឹងរឹងនេះថា ដោយសារម្ចាស់ក្សត្រី Letizia មិនមែនកើតចេញពីព្រះរាជវង្ស មុនអភិសេកជាមួយស្ដេច Felip VI ទ្រង់គ្រាន់តែជាអ្នកកាសែតម្នាក់ប៉ុណ្ណោះដូច្នេះទ្រង់ទទួលរងការរិះគន់យ៉ាងខ្លាំង ហើយនេះគឺជាមូលហេតុដែលទ្រង់ព្យាយាមធ្វើយ៉ាងណាកុំឱ្យបុត្រីទាំងពីររបស់ទ្រង់រងគ្រោះដូចទ្រង់ តាមរយៈការបង្រៀនឱ្យបុត្រីឆ្លាតវៃ ចេះពឹងពាក់ខ្លួនឯងនិងរឹងមាំ៕
