ថ្វីបើសមត្ថកិច្ចបានអប់រំផ្សព្វផ្សាយជាច្រើនលើក ច្រើនសារហើយក្ដី ប៉ុន្ដែករណីឡានដឹកដី ដឹកខ្សាច់ ក្រួសថ្ម នៅតែដឹកលើស ឬការដឹកហ៊ុំព័ទ្ធឲ្យបានត្រឹមត្រូវបច្ចេកទេស នៅតែកើតមាន។
ជាក់ស្ដែងថ្មីៗនេះ វីដេអូខ្លីមួយដែលផ្ញើមកសារព័ត៌មានត្រយង ប្រជាពលរដ្ឋបានថតរូបឡានដឹកក្រួសថ្ម នៅតាមបណ្ដោយផ្លូវជាតិលេខ៤ បានដឹកជញ្ជូនដោយពុំបានហ៊ុំព័ទ្ធឲ្យបានត្រឹមត្រូវ ជាហេតុនាំឲ្យកម្ទេចថ្ម ឬខ្សាច់ជ្រុះតាមផ្លូវ ញាំងឲ្យប៉ះពាល់ដល់អ្នកបើកបរដទៃទៀត។
កន្លងមកអាជ្ញាធររមែងចុះផ្សព្វផ្សាយណែនាំជុំវិញ ឡានដឹកដី ដឹកខ្សាច់ ក្រួសថ្ម ឲ្យដឹកតាមចំណុះ កុំដាក់រហូតដល់ពេញហៀរហូរ ជ្រុះតាមផ្លូវ។ នៅទ្រុងឡានទាំងនោះ ក៏ត្រូវបិទបាំងតង់កៅស៊ូត្រឹមត្រូវ ការពារកុំឲ្យដី ខ្សាច់ ក្រួស ថ្ម ធ្លាក់នៅពេលដឹកជញ្ជូនតាមផ្លូវ។
ទន្ទឹមគ្នានេះ មុនពេលចេញពីដេប៉ូលក់ខ្សាច់ ក្រួស ថ្ម ឬក៏មុនពេលចេញពីរណ្តៅដី ក៏ត្រូវតែបាញ់ទឹក លាងកង់ឡានឲ្យស្អាត។ នៅពេលទម្លាក់ខ្សាច់ ដី ក្រួស ថ្ម នៅការដ្ឋានហើយ មុននឹងចេញពីការដ្ឋាន ក៏ត្រូវបាញ់លាងសម្អាតឡាននោះម្តងទៀត៕