ម្ចាស់បទចម្រៀង «My Heart Will Go On» ពីភាពយន្តល្បីល្បាញជាអមតៈ «Titanic» លោកស្រី Celine Dion បានប្រកាសនៅបណ្ដាញសង្គម Instagram របស់ខ្លួនថាពេលនេះលោកស្រីត្រូវបង្ខំចិត្តពន្យារពេលរៀបចំកម្មវិធី Concert ថ្មីរបស់លោកស្រី ដោយសារតែបញ្ហាជំងឺដ៏រ៉ាំរ៉ៃកំពុងធ្វើទុក្ខខ្លាំង។
តារាចម្រៀងល្បីអ្នកស្រី Celine Dion បច្ចុប្បន្នកំពុងតែឈឺជំងឺរមួលសាច់ដុំធ្ងន់ធ្ងរដែលបណ្ដាលឱ្យអ្នកស្រីត្រូវសំរាកនិងផ្អាករាល់សកម្មភាពច្រៀងនិងសម្ដែងទាំងអស់។
យោងតាមការផុសរបស់លោកស្រីនៅលើ Instagram អ្នកម្ដាយកូន៣រូបនេះក៏បានរៀបរាប់បន្តទៀតថា៖ «រឿងនេះធ្វើឱ្យខ្ញុំខូចចិត្តណាស់។ ក្រុមការងារខ្ញុំនិងខ្ញុំបានព្យាយាមធ្វើការងារដើម្បីកម្មវិធីថ្មីរបស់យើងរយៈពេល៨ខែកន្លងមកនេះ តែបែរជាមិនអាចដំណើរការកម្មវិធីនៅក្នុងខែវិច្ឆិកាខាងមុខនេះបាន ខ្ញុំរកពាក្យអ្វីមកថ្លែងជំនួសឱ្យការសោកស្ដាយនេះមិនបាននោះទេ។ ខ្ញុំពិបាកចិត្តណាស់ដែលខ្ញុំធ្វើឱ្យក្រុមការងារពិបាក ហើយខ្ញុំក៏សុំទោសជាពិសេសចំពោះអ្នកគាំទ្រដែលធ្វើឱ្យអ្នកទាំងអស់គ្នាខកខានចំពោះផែនការមកកាន់ទីក្រុងឡាវែហ្គាស។ ពេលនេះខ្ញុំចាំបាច់ត្រូវផ្ដោតលើការព្យាបាលឱ្យបានធូរស្បើយជាមុនសិន…ខ្ញុំចង់ឆ្លងកាត់ដំណាក់កាលដ៏អាក្រក់មួយនេះឱ្យបានក្នុងពេលឆាប់ៗនេះ។
គួរដឹងថា ក្រុមការងារផ្នែកឱសថរបស់លោកស្រី Celine Dion បានតាមដាននិងព្យាបាលឈឺជំងឺរមួលសាច់លោកស្រី ប៉ុន្តែអាការៈជំងឺលោកស្រីធ្ងន់ធ្ងរខ្លាំងធ្វើឱ្យលោកស្រីមិនអាចចូលរួមហាត់សមសម្រាប់ Concert ថ្មីបាន៕