តារាសម្ដែងហុងកុងដ៏ល្បីលោក Kenneth Ma និងសង្សារអាយុប្អូនរហូត១៣ឆ្នាំរបស់លោកកាលពីពេលថ្មីៗនេះបាន បណ្ដើរគ្នាចូលរួមក្នុងកម្មវិធីរបស់ទូរទស្សន៍ TVB ធ្វើឱ្យមនុស្សជាច្រើនមានការចាប់អារម្មណ៍ខ្លាំង។
Kenneth Ma បាននិយាយថាមិត្តស្រីខ្លួន Roxanne Tong មានចរិតកូនក្មេង មិនចេះប្រយ័ត្នប្រយែង តែងតែត្រូវរបួសនិងត្រូវការការមើលថែពីអ្នកដទៃ។ ប៉ុន្តែអត្តចរិតបែបនេះលោកបែរជាមើលទៅយល់ថានាងគឺជាមនុស្សម្នាក់គួរឱ្យស្រលាញ់ ដោយលោកបានពោលថា «នាងប្រៀបដូចជាកូនក្មេងដែលមិនទាន់ដឹងក្ដី។ ការមិនទាន់ដឹងក្ដីនេះគឺជាបុគ្គលិកលក្ខណៈមួយល្អ មនុស្សបែបនេះមានគុណសម្បត្តិត្រង់រីករាយហើយវិជ្ជមាន»។
ប៉ុន្តែសាកសួរដល់រឿងរៀបការអ្នកទាំងពីរបែរជាបង្វែរសំនួរហើយឆ្លើយតបត្រឹមថាគ្រួសារទាំងសងខាងបានស្គាល់គ្នាអស់ហើយ។ Kenneth Ma និយាយថាម្ដាយរបស់ Roxanne Tong គឺជាមនុស្សបើកចំហរ ហើយរីករាយ ចំណែក Roxanne វិញក៏បានបង្ហើបឱ្យដឹងដែរថាអនាគតម្ដាយក្មេកជាមនុស្សម្នាក់ងាយស្រួល ព្រោះជាមនុស្សសាមញ្ញ និងស្រួលនៅក្បែរ។
កំណើតស្នេហ៍អ្នកទាំងពីរចាប់ផ្ដើមឡើងនៅខែមិថុនាឆ្នាំ២០២០។ មុននេះ Kenneth បានស្រលាញ់គ្នាជាមួយនឹងអតីតបវរកញ្ញាហុងកុងលេខ២ឆ្នាំ២០១២កញ្ញា jacqueline Wong ប៉ុន្តែបានបែកគ្នាវិញនៅពេលមានលេចចេញវីដេអូអតីតសង្សារឱបថើបជាមួយនឹងតារាចម្រៀង Andy Huiកាលពីឆ្នាំ២០១៩។ ទោះជាបែកគ្នាក្ដីប៉ុន្តែ Kenneth Ma នៅតែលើកទឹកចិត្តនិងកម្លាំងចិត្តចំពោះអតីតមិត្តស្រីថែមទាំងធ្លាប់សុំឱ្យអ្នកទស្សនាផ្ដល់ឱកាសឱ្យនាងម្ដងទៀត។
គួរដឹងថាសង្សារបច្ចុប្បន្នរបស់ Kenneth Ma គឺជានិស្សិតបញ្ចប់ការសិក្សាផ្នែកចិត្តសាស្ត្រនៅសកលវិទ្យាល័យ University College London (UK)។ នាងចាប់ផ្ដើមប្រឡូកចូលវិស័យសិល្បៈដំបូងនៅឆ្នាំ២០១២ បច្ចុប្បន្នជាតារាសម្ដែងមួយដួងរបស់ TVB។