នៅថ្ងៃទី៧ ខែវិច្ឆិកា ឆ្នាំ២០២១ នេះ ក្រសួងវប្បធម៌និងវិចិត្រសិល្បៈបានបង្ហោះសារអបអរសាទរខួបលើកទី ១៨ នៃការដាក់បញ្ចូល «របាំព្រះរាជទ្រព្យ» ចូលក្នុងបញ្ជីបេតិកភណ្ឌវប្បធម៌អរូបីនៃមនុស្សជាតិ។
«របាំព្រះរាជទ្រព្យ» គឺជាសម្បត្តិបេតិកភណ្ឌដ៏មានតម្លៃមិនអាចកាត់ថ្លៃបានរបស់ព្រះរាជាណាចក្រកម្ពុជាតែមួយគត់ ដែលបានថែរក្សានាដកម្មបុរាណមួយនេះ អស់រយៈពេលដ៏យូរលង់ណាស់មកហើយ។ កាលពី១៨ឆ្នាំមុន ពោលគឺនៅថ្ងៃទី៧ ខែវិច្ឆិកា ឆ្នាំ២០០៣ របាំព្រះរាជទ្រព្យ ត្រូវ
បានចុះក្នុងបញ្ជីជាសម្បត្តិបេតិកភណ្ឌវប្បធម៌អរូបីនៃមនុស្សជាតិនៅទីក្រុងអ៉ីស្តង់ប៊ុល ប្រទេសតួកគី។
របាំក្បាច់ខ្មែរបុរាណ ឬ របាំព្រះរាជទ្រព្យនេះ ជាទម្រង់របាំសក្ការ:មានភាពល្បីល្បាញខាងកាយវិការទន់ភ្លន់ គួរឱ្យចង់គយគន់ និង មានទ្រង់គ្រឿងចាំងភ្លឺផ្លេកៗគួរជាទីពេចន៍ពិលរមិលមើល។ របាំព្រះរាជទ្រព្យ (របាំក្បាច់បុរាណខ្មែរ) ជាប្រភេទរបាំ ដែលនាដករ ប្រើចលនាកាយវិការក្បាច់ និងមនោសញ្ចោតនា យ៉ាងប៉ិនប្រសប់ទៅតាមការវិវត្តនៃសាច់រឿង ដែលរៀបរាប់បញ្ជាក់ដោយទំនុកច្រៀងនៃក្រុមចម្រៀងជាពួក នឹងត្រូវបានប្រគំដោយវង់ភ្លេងពិណពាទ្យ ដែលមានតួនាទីប្រគំជូនរបាំនេះផងដែរ។
ក្នុងនាមជាកូនខ្មែរដែលមានឈាមជ័រជាអ្នកស្នេហាជាតិ ស្រលាញ់និងការពារសម្បត្តិវប្បធម៌ជាតិ ចង់មានការអភិវឌ្ឍ តែមិនភ្លេចអភិរក្សរាល់ស្នាដៃតន្ត្រី សិល្បៈ របាំបុរាណ ជាដួងព្រលឹងជាតិ ជាអត្តសញ្ញាណនៃជាតិ ដែលដូនតាខ្មែរ បុព្វបុរសខ្មែរបាន យកសាច់ស្រស់ឈាមស្រស់ការពារដើម្បីទុកជាកេរ្តិ៍តំណែលសម្រាប់កូនចៅជំនាន់ក្រោយឱ្យបានគង់វង្សយូរអង្វែងដើម្បីជាមរតកសម្រាប់ក្មេងៗជំនាន់ក្រោយៗទៀត៕