បេក្ខនារី Suni Lee (ម្ចាស់មេដាយមាសកីឡាអូឡាំពិកផ្នែកកីឡាកាយសម្ព័ន្ធ) បានបង្ហាញឱ្យអ្នកទស្សនានិងអ្នកគាំទ្រកម្មវិធី «Dancing with the Stars» ជឿថាក្មេងស្រីម្នាក់នេះប្រាកដជាមានឱកាសអាចឈ្នះពានក្នុងកម្មវិធីនេះ តាមរយៈការសម្ដែងជាមួយនឹងដៃគូ Sasha Farber។ ថ្វីត្បិតតែបេក្ខនារីរូបនេះទទួលបានការស្រលាញ់និងសរសើរពីហ្វេនប៉ុន្តែផ្ទុយមកវិញសម្រាប់ Tyra Banks ពិធីការិនីក្នុងកម្មវិធីនេះបែរជាកំពុងរងព្យុះភ្លៀងពីមតិរិះគន់ពីសំណាក់អ្នកទស្សនាកម្មវិធីនេះទៅវិញ។
ក្រោយបង្ហាញសមត្ថភាពចប់ភ្លាម បេក្ខនារីវ័យ១៨ឆ្នាំ Suni Lee បានប្រញាប់ប្រញាល់រត់ចុះពីលើឆាកភ្លាមៗ ដែលទង្វើរបស់កញ្ញាបានធ្វើឱ្យអ្នកទស្សនាមានការឆ្ងល់ជាខ្លាំងសូម្បីតែគណៈកម្មការក្នុងកម្មវិធីដូចជា Carrie Ann Inaba, Len Goodman, Bruno Tonioli និង Derek Hough ក៏មិនខុសគ្នាដែរ ប៉ុន្តែនៅពេលដែលពិធីការិនី Tyra Banks បង្ហើបពីមូលហេតុដែលធ្វើឱ្យបេក្ខនារីរូបនេះប្រញាប់រត់ចុះពីលើឆាក រឹតតែធ្វើឱ្យអ្នកគ្រប់គ្នាភ្ញាក់ផ្អើលនិងតក់ស្លុត។
ថ្វីត្បិតតែពិធីការិនីវ័យ៤៧ឆ្នាំរូបនេះមានចេតនាល្អប៉ុន្តែការដែលលោកស្រីបង្ហើបទាំងអស់បែបនេះមនុស្សមួយចំនួនធំយល់ថាមិនស័ក្ដិសមនោះទេ ប្រៀបដូចចាំហែកកេរ្តិ៍បេក្ខនារីទៅវិញ។ Tyra បានឱ្យដឹងថា Suni មិនស្រួលខ្លួនខ្លាំងតែមិនមែនជាជំងឺ Covid-19 នោះទេ ប៉ុន្តែរត់ចុះទៅក្អួត។
ក្រោយពេលដែល Suni ត្រលប់មកលើឆាកវិញ Tyra បានលើកយកបញ្ហាឈឺរបស់ Suni មកនិយាយម្ដងទៀត ដោយនិយាយថា «Suni, ខ្ញុំចាំបាច់ត្រូវតែសួរប្អូន ខ្ញុំដឹងថាប្អូនអត់ទ្រាំមកពេញមួយថ្ងៃហើយ ខ្ញុំដឹងថាប្អូនទៅក្អួត តែនេះជាកម្មវិធីទូរទស្សន៍ប្អូនស្រាប់តែរត់ទៅដោយបែបនេះ»។
សាមីខ្លួនបានឆ្លើយតបថា «ខ្ញុំពិតជាខ្លាចណាស់ ព្រោះពីមុនមកខ្ញុំមិនដែលមានរឿងបែបនេះទេ ខ្ញុំពិតជាខ្មាសណាស់ ខ្ញុំដឹងថាបើសិនជាខ្ញុំមិនត្រលប់មកវិញទេ ខ្ញុំច្បាស់ជាខកចិត្តចំពោះខ្លួនឯងយ៉ាងខ្លាំង»
ងាកមកបណ្ដាញសង្គម Twitter ឯណេះវិញ ហ្វេនមួយចំនួនធំហាក់មិនសប្បាយចិត្តនិងពេញចិត្តចំពោះការនិយាយរបស់ Tyra ដើម្បីកែប្រែស្ថានការនោះទេ ដោយអ្នកទាំងនោះបានបញ្ចេញមតិរបស់ខ្លួនផ្សេងៗពីគ្នាថា៖ «តើ Tyra ចាំបាច់ប្រកាសឱ្យគេដឹងថា Suni ប្រញាប់រត់ទៅបន្ទប់ទឹក? មិនសមជាពិធីការិនីមានវិជ្ជាជីវៈសោះ» ហ្វេនម្នាក់ទៀតសរសេរថា៖ «Tyra, ពួកយើងដឹងហើយ Suni មិនសូវស្រួលខ្លួន» «ខ្ញុំពិតជាមិនយល់ទេ ហេតុអី Tyra គិតថាការដែលខ្លួននិយាយរឿង Suni រត់ទៅក្អួតនៅក្នុងកម្មវិធី Live ទូរទស្សន៍ជាតិជារឿងធម្មតា។ ហេតុអីទៅនិយាយរឿងផ្ទាល់ខ្លួនរបស់គេពេលកំពុងផ្សាយ?
ជាការកត់សម្គាល់អ្នកគាំទ្រភាគច្រើនបានបង្ហោះសារជូនពរនិងសង្ឃឹមថា Suni Lee ឆាប់ជាសះស្បើយ ខណៈដែលសាមីខ្លួនបានចេញមកអរគុណចំពោះពាក្យជូនពរនិងលើកទឹកចិត្តចំពោះខ្លួន៕
