យោងតាមចុះផ្សាយរបស់ L’equipe បានឲ្យដឹងថាកីឡាការិនី Aminata Diallo ត្រូវបានប៉ូលីសចាប់ឃាត់ខ្លួន ក្រោយគេស៊ើបអង្កេតរកឃើញថា នាងបានជួលមនុស្សប្រុសបិទមុខចំនួន ២នាក់ទៅវាយមិត្តរួមក្រុមខ្លួនគឺកីឡាការិនី Kheira Hamraoui នឹងដំបងដែកបណ្តាលឲ្យនាងមានរបួសមិនអាចចូលលេងបាន ដែលជាឱកាសអាចឲ្យ Aminata អាចចូលលេងជំនួស Kheira ក្នុងជំនួបទល់នឹង Real Madrid ក្នុងក្របខណ្ឌ Champion League កាលពីម្សិលមិញ។
ក្លិប PSG បានចេញសេចក្តីថ្លែងការណ៍ថា៖ «ការចាប់ខ្លួនរបស់ខ្សែបម្រើ Aminata Diallo គ្រាន់តែជាផ្នែកមួយនៃការស៊ើបអង្កេតរបស់ប៉ូលីសក្នុងតំបន់ Versailles លើការវាយប្រហារលើកីឡាការិនី Kheira Hamraoui កាលពីថ្ងៃព្រហស្បតិ៍សប្តាហ៍មុន»។
PSG បន្តទៀតថា៖ «យើងសូមថ្កោលទោសក្នុងលក្ខខណ្ឌខ្លាំងបំផុតដែលអាចធ្វើទៅបានចំពោះអំពើហឹង្សាដែលបានប្រព្រឹត្តដូចខាងលើ ប្រសិនបើយើងស្វែងរកឃើញភស្តុតាងដូចគេចោទប្រកាន់មែន»។
កីឡាការិនី Aminata Diallo បច្ចុប្បន្នមានអាយុ២៦ឆ្នាំ ជនជាតិបារាំង, ចូលរួមជាមួយ PSG នៅក្នុងឆ្នាំ២០១៦ ដោយបង្ហាញខ្លួនសរុប៦០ប្រកួត និងធ្លាប់លេងឲ្យក្រុមជម្រើសជាតិបារាំងបាន៧លើកផងដែរ។