សុនខមេមួយក្បាលបានកើតកូនប្រមាណជា៦ក្បាល បានក្លាយជាសុនខឈាមថ្មីបន្ដវេន នៅលើសមរភូមិ រុករកគ្រាប់មីន និងសំណល់យុទ្ធភណ្ឌសង្គ្រាមទៅមុខទៀត។ នេះបើតាមលោក ហេង រតនា អគ្គនាយកមជ្ឈមណ្ឌលសកម្មភាពកំចាត់មីនកម្ពុជា (CMAC) បានសរសេរនៅលើផេក កាលពីថ្ងៃទី១០ ខែ១១ ២០២១។
គួរបញ្ជាក់ថា សុនខហិតមីននេះ គឺត្រូវបង្កើតឡើងតាំងពីឆ្នាំ១៩៩៦ ដោយមានការនាំចូលនិងផ្តល់ការគាំទ្រ ដល់អង្គភាពស៊ីម៉ាក់ដោយកងទ័ពប្រទេសស៊ុយអែត ក្នុងកម្រិតហ្វឹកហ្វឺន សាកល្បងប្រើប្រាស់នូវសុនខហិតមីន នៅកម្ពុជា។
អ្នកជំនាញរបស់អង្គភាពស៊ីម៉ាក់ ត្រូវបានបញ្ជូន ទៅហ្វឹកហ្វឺននៅប្រទេសស៊ុយអែត ព្រមទាំងយកសុនខមួយចំនួនពីប្រទេសស៊ុយអែតមកកម្ពុជា និងក្រោយៗមកបាននាំយកមកពីប្រទេសអាល្លឺម៉ង់ ហូឡង់ ប៊ែលហ្សិក និងបូស្នី ជាដើម។ ក្រោយបញ្ចប់គម្រោង ស៊ីម៉ាក់ មានទស្សនៈ និងការប្តេជ្ញាចិត្ត យ៉ាងមុតស្រួចថា ខ្មែរគឺអាចធ្វើបាន ទើបបច្ចុប្បន្ននេះ អង្គភាពស៊ីម៉ាក់ មានសមត្ថភាពគ្រប់គ្រាន់ លើបច្ចេកទេស ជំនាញសុនខហិតមីន និងបានពង្រីកសមត្ថភាពសុនខហិតមីន លើការងារជាច្រើនទៀត៕
