ក្លិបបាល់ទាត់ Aston Villa ប្រកាសតែងតាំងលោក Steven Gerrard ជាអ្នកចាត់ការទូទៅថ្មីរបស់ពួកគេរយៈពេល៣ឆ្នាំកន្លះ ពោលគឺរហូតដល់ខែមិថុនា ឆ្នាំ២០២៤ ក្រោយបណ្តេញលោក Dean Smith ចេញពីតំណែង។
អតីតប្រធានក្រុមជម្រើសជាតិអង់គ្លេស មានបទពិសោធន៍ដឹកនាំជាមួយក្រុមយុវជន Liverpool ក្រោយមកបន្តទៅដឹកនាំក្រុម Rangers របស់ប្រទេសស្កុតឡែន ជំនួសលោក Graeme Murty។
បុរសវ័យ ៤១ឆ្នាំរូបនេះបានជួយឲ្យក្រុម Rangers ឈ្នះជើងឯកលីគកំពូល Scottish Premiership ជាលើកដំបូងក្នុងរយៈពេល ១០ឆ្នាំ ទាំងនៅសល់ការប្រកួត ៦ដងទៀតក្នុងដៃ។
Aston Villa ក្រោយបណ្តេញលោក Dean Smith ចេញពីតំណែងបច្ចុប្បន្នកំពុងស្ថិតនៅលេខរៀងទី១៦ នៃក្របខណ្ឌ Premier League 2021-22 ក្រោយលេង១១ប្រកួត ឈ្នះបានត្រឹមតែ៣ ស្មើ១ និងចាញ់ចំនួន៧ប្រកួត មាន១០ពិន្ទុ លើសក្រុមបាតតារាង៥ពិន្ទុប៉ុណ្ណោះ។