សហព័ន្ធកីឡាបាល់ទះកម្ពុជា បានរៀបចំវគ្គសិក្សាអាជ្ញាកណ្ដាលនិងចៅក្រមបាល់ទះក្នុងសាលកម្រិតមូលដ្ឋាន (ខ ឬ B) ពីថ្ងៃទី២២ ដល់២៤ ខែវិច្ឆិកា ឆ្នាំ២០២១ នៅពហុកីឡដ្ឋានព្រីនស៍ ដោយមានសិក្ខាកាមចូលរួមប្រមាណ២៨នាក់។
លោក បឹង គឹមតោ អគ្គលេខាធិការសហព័ន្ធកីឡាបាល់ទះកម្ពុជា លើកឡើងថា ការបើកវគ្គបណ្តុះបណ្តាលនេះក្នុងគោលបំណងបណ្ដុះបណ្ដាលអាជ្ញាកណ្ដាលនិងចៅក្រមកីឡាបាល់ទះកម្ពុជា ដែលមានសមត្ថភាពស្របតាមតម្រូវការដើម្បីត្រៀមរៀបចំការប្រកួតស៊ីហ្គេមលើកទី៣២ឆ្នាំ២០២៣ ដែលកម្ពុជា ធ្វើជាម្ចាស់ផ្ទះផង ក៏ដូចជាជ្រើសរើសអាជ្ញាកណ្ដាលដែលមានសមត្ថភាពភាសាអង់គ្លេសដើម្បីបន្តចូលរៀនវគ្គអាជ្ញាកណ្ដាលអន្តរជាតិ ព្រមទាំងបណ្តុះបណ្តាលអាជ្ញាកណ្ដាលឱ្យមានកម្រិតស្តង់ដារជាតិនិងអន្តរជាតិផង។
វគ្គសិក្សានេះមានលោក ទែន ឡន អាជ្ញាកណ្ដាលបាល់ទះអន្តរជាតិប្រចាំកម្ពុជា និងលោក កួន គន្ធី ជាគ្រូឧទ្ទេស ខណៈមេរៀនផ្ដោតលើចំណុចសំខាន់ៗចំនួន៧ក្នុងនោះនិយាយពី ១ ទីកន្លែងនិងបរិក្ខារ, ទី២ Protocol, ទី៣ តួរនាទីអាជ្ញាកណ្ដាល,ទី៤ ការប្រព្រឹត្តិទៅនៃអ្នកចូលរួម,ទី៥ កីឡាករ Libero, ទី៦ សន្លឹកកត់ត្រាពិន្ទុនិងទី៧ ច្បាប់ល្បែងកីឡាបាល់ទះ។
នៅក្នុងពិធីបើកវគ្គបណ្តុះបណ្តាល ព្រឹកថ្ងៃចន្ទ សប្ដាហ៍នេះឯកឧត្តម ស សុខា អនុប្រធានសហព័ន្ធកីឡាបាល់ទះកម្ពុជា បានមានប្រសាសន៍ថា នេះជាវគ្គសិក្សាកម្រិត-ខ ខណៈកន្លងមកសហព័ន្ធធ្លាប់បានបើកវគ្គសិក្សាកម្រិត-គ តាមរយៈប្រព័ន្ធ Zoom ដោយជោគជ័យ២វគ្គហើយ ទាំងក្នុងស្ថានភាពកូវីដ-១៩។
ឯកឧត្តមបន្តថា៖«ខ្ញុំសង្ឃឹម និងជឿជាក់ថា អស់លោក លោកស្រី សិក្ខាកាមទាំងអស់ ប្រាកដជានឹងយកចំណេះ ជំនាញដែលទទួលបានពីការសិក្សា រយៈពេល ៣ថ្ងៃនេះ ដើម្បីអភិវឌ្ឍនៅតាមមូលដ្ឋាន ឬសមាគមន៍ ឬក្លិបបាល់ទះ ឬស្ថាប័ន ដែលខ្លួនធ្វើការ នាពេលខាងមុខ ជាមិនខាន»៕
