ប្រកួតពាក់កណ្ដាលផ្ដាច់ព្រ័ត្រ នៃពានរង្វាន់សម្តេចតេជោ ហ៊ុន សែន (Hun Sen Cup) លើកទី១៥ ឆ្នាំ២០២១ រវាងក្រុមម្ចាស់ផ្ទះបឹងកេត ជាមួយវិសាខា នៅល្ងាចថ្ងៃចន្ទ ទី២២ ខែវិច្ឆិកា ឆ្នាំ២០២១ នេះត្រូវបានគណៈកម្មការរៀបចំការប្រកួត លើកពេលទៅធ្វើនៅថ្ងៃអង្គារ ទី២៣ ខែវិច្ឆិកា ឆ្នាំ២០២១ លើទីលានកីឡដ្ឋានខេមបូឌាអ៊ែវេ ដដែល។
ការប្រកួតគូនេះដំណើរការដល់នាទីទី៥៣ នៃម៉ោងប្រកួតពេញ៩០នាទី ទើបលោកអាជ្ញាកណ្ដាល ជួប វិសាល ពន្យារការប្រកួត៣០នាទី ចំនួន២ដង ដោយសារតែភ្លៀងធ្លាក់ខ្លាំង ហើយមិនអាចបន្តការប្រកួតទៀតបានទើបសម្រេចលើកការប្រកួតទៅថ្ងៃបន្ទាប់តែម្ដង។ ចំណែកឯលទ្ធផលនៃការប្រកួតគឺក្រុមម្ចាស់ផ្ទះបឹងកេត នាំមុខវិសាខា ដោយលទ្ធផល១ទល់០ ហើយកីឡាករ សឿត ណាវ៉ា ជាអ្នករកគ្រាប់បាល់នាំមុខបណ្តោះអាសន្ននេះ។
ដូច្នេះការប្រកួតរវាងបឹងកេត និងវិសាខា នឹងបន្តចាប់ពីនាទី៥៣ រហូតដល់នាទី៩០ ដែលនៅសេសសល់ ដើម្បីរកអ្នកឈ្នះឡើងទៅវគ្គផ្ដាច់ព្រ័ត្រជាបន្ត។
ចំណែកការប្រកួតវគ្គពាក់កណ្ដាល១គូទៀតក្រុមព្រះខ័នរាជស្វាយរៀង បើកទ្វាកីឡដ្ឋានទទួលក្រុមភ្នំពេញក្រោន នៅវេលាម៉ោង៦ល្ងាចលើទីលានកីឡដ្ឋានខេត្តស្វាយរៀង នៅល្ងាចថ្ងៃចន្ទ ទី២២ វិច្ឆកា នេះដែរ៕
