បើតាមការបញ្ជាក់របស់ក្លិបបាល់ទាត់ខេត្តកោះកុង នៅព្រឹកថ្ងៃអង្គារ សប្ដាហ៍នេះមានក្រុមចំនួន៨ នឹងចូលរួមប្រកួតក្នុងពានរង្វាន់លីគកម្រិតទី២ (Cambodian League 2) ឆ្នាំ២០២១ នេះ ដោយការប្រកួតចាប់ពីថ្ងៃទី២៧ ខែវិច្ឆិកា ដល់ថ្ងៃទី២៥ ខែធ្នូ ឆ្នាំ២០២១។
ក្រុមទាំង៨ នោះមាន កោះកុងអែហ្វស៊ី, ISI ដង្កោសែនជ័យ,TIFFY Army U21,ក្លិបបាល់ទាត់ខេត្តសៀមរាប, សមាគមកីឡាបាល់ទាត់ខេត្តត្បូងឃ្មុំ,ក្លិបបាល់ទាត់ឬទ្ធីសែន,សាលាបាល់ទាត់ជាតិបាទីនិងក្លិបបាល់ទាត់ខេត្តបន្ទាយមានជ័យ។
យ៉ាងណាក្ដីរង់ចាំមើលសេចក្ដីប្រកាសជាផ្លូវការពីសហព័ន្ធកីឡាបាល់ទាត់កម្ពុជា ថាតើនឹងជ្រើសរើសយកប៉ុន្មានក្រុមពីលីគទី២ នេះឡើងទៅលេងលីគកំពូលកម្ពុជា រដូវកាលឆ្នាំ២០២២ ខាងមុខ។
ក្រោយពីពានរង្វាន់ក្របខ័ណ្ឌ«ក១» របស់ក្រសួងអប់រំយុវជននិងកីឡា រំសាយចោលទៅ សហព័ន្ធកីឡាបាល់ទាត់កម្ពុជា បានបង្កើតពានរង្វាន់លីគទី២ ដើម្បីស្វែងរកក្រុមឡើងមកចូលលីគកំពូលកម្ពុជា ក្រោយក្រុមនៅបាតតារាង ១ ឬ២ ក្រុមត្រូវកាត់ចេញ ប្រចាំរដូវកាលនីមួយៗ។ ឆ្នាំដំបូង២០១៦ ក្រុមគីរីវង់សុខសែនជ័យ និងអគ្គីសនីកម្ពុជា ជាក្រុមឡើងទៅលីគកំពូលកម្ពុជា ហើយឆ្នាំ២០១៧ ក្រុមវិសាខា ឡើងមកលីគកំពូលកម្ពុជា ឆ្នាំ២០២០ ក្រុមខេត្តព្រៃវែង ឡើងមកលីគកំពូលកម្ពុជា៕