តារាសម្ដែងស្រី ហ្វាហ្វា បន្ទាប់ពីបែកបាក់ទំនាក់ទំនងស្នេហាមក កញ្ញាដូចជាមិនទាន់បើកភ្លើងខៀវទទួលយកបុរសថ្មីចូលនៅក្នុងជីវិតនៅឡើយ។ តែនៅថ្ងៃម្សិលមិញនេះ ស្រាប់តែបានឃើញតារាស្រីស្អាតសាច់សខ្ចីរូបនេះបង្ហាញខ្លួនគ្រងឈុតកូនក្រមុំយ៉ាងស្រស់ស្អាត ទំនងដូចជាចង់ប្រាប់អ្នកកាន់អ្នកគាំទ្រខ្លួនថា កញ្ញាជិតមានដំណឹងល្អអ៊ីចឹង។
ជួបសម្ភាសន៍ជាមួយអ្នកសារព័ត៌មានត្រយង តារាស្រីរាងតូចច្រលឹង ហ្វាហ្វា បានប្រាប់និយាយ« ថ្ងៃនេះជាថ្ងៃពិសេសរបស់ខ្ញុំ ខ្ញុំគ្រងឈុតកូនក្រមុំ តែមិនមែនជិតរៀបការទេ។ ថ្ងៃនេះគឺខ្ញុំត្រូវបានអញ្ជើញឱ្យចូលរួមបង្ហាញម៉ូដឈុតកូនក្រមុំ ដែលជាស្នាដៃរបស់ហាង Chao Khon Tailor ជាហាងកាត់ដេរសម្លៀកបំពាក់ល្បីឈ្មោះ មកពីប្រទេសថៃ»។
កញ្ញាបានបន្ដរៀបរាប់ទៀតថា កញ្ញាពិតជារំភើបខ្លាំងមែនទែន នៅពេលបានគ្រងឈុតនេះហើយ ព្រោះនេះជាក្ដីស្រម៉ៃរបស់កញ្ញា ដែលចង់បានពេលវេលាពិសេសសម្រាប់ជីវិតក្នុងពេលឆាប់។ តែយ៉ាងណាមិញ រហូតមកទល់ពេលនេះ បេះដូងរបស់កញ្ញាសុំពេលចាក់សោរទុកមួយរយៈសិន រហូតទាល់តែមានវិរៈបុរសជិះសេះសរកកូនសោរនោះឃើញ ទើបកញ្ញាព្រមបើកបេះដូងវិញ។ កញ្ញាបន្ដថា បើមានថ្ងៃនេះមែន កញ្ញាក៏មិនរំលងឈុតជាច្រើនដែលមានក្នុងហាង Chao Khon Tailor នេះដែរ។
ជាមួយគ្នានោះដែរ មិនមែនមានតែកញ្ញា ហ្វាហ្វា ម្នាក់ទេដែលបានបង្ហាញឈុតកូនក្រមុំដែលមានតម្លៃខ្ទង់ម៉ឺនដុល្លារនេះ។ នៅក្នុងនោះគេឃើញមានតារាប្រុសស្រី ៥ដួងផ្សេងទៀត ចាប់ដៃគូគ្នាម្នាក់មួយគូៗ គ្រងឈុតកូនកំលោះកូនក្រមុំ ដើរបង្ហាញមហាជន រួមមាន៖ កញ្ញា ព្រះកាយច័ន្ទ លោក មុំ សុធារ៉ា កញ្ញា អែម គន់ថង លោក ចូអ៊ី និងលោក វឌ្ឍនៈ។
នាយិកាហាងកាត់ដេរសម្លៀកបំពាក់ Chao Khon Tailor អ្នកនាង សេរីណាត់ ស៊ុងប្រៈសីទ បានរៀបរាប់អ្នកសារព័ត៌មានត្រយងថា ដោយសម្លឹងឃើញទីផ្សារនៅប្រទេសកម្ពុជា មានការចូលចិត្តបែបប្រណីតភាព ហាយសូ មិនឆើតឆាយ ទើបអ្នកនាងសម្រេចចិត្តនាំប្រ៊េនហាងកាត់ដេរសម្លៀកបំពាក់ដ៏ល្បីនៅប្រទេសថៃមួយនេះ មកបើកសេវាកម្មជូនប្រជាជនខ្មែរ។ នាងបន្ដថា អតិថិជនរបស់ហាង Chao Khon Tailor មិនត្រឹមតែជាមហាជនទូទៅទេ តែក៏មាន មន្ត្រី ថ្នាក់ដឹកនាំប្រទេសថៃ ធ្លាប់មានការគាំទ្រសម្លៀកបំពាក់របស់ហាងមួយនេះ តាំងពីឆ្នាំ ១៩៦៥ មកម្លេះ។ អ្នកនាងជឿថា នៅក្នុងប្រទេសកម្ពុជាក៏មានការពេញនិយមសម្លៀកបំពាក់បែបប្រណិតភាពដូចនៅប្រទេសថៃដែរ ហើយហាង Chao Khon Tailor នឹងចូលមកខ្លួនមកបំពេញតម្រូវការប្រជាជនខ្មែរចាប់ពីថ្ងៃនេះតទៅ៕
