នារីម្នាក់បានសម្ដែងការមិនពេញចិត្តចំពោះសមត្ថកិច្ច រឿងវាស់កម្ពស់ធ្វើអត្តសញ្ញាណបណ្ណដូចអ្នកទោស ក៏បានប្រើពាក្យមិនគួរសមចំពោះសមត្ថកិច្ចតាមបណ្ដាញសង្គម ត្រូវបានសមត្ថកិច្ចហៅមកវាស់កម្ពស់សាជាថ្មី។
លោកវរសេនីយ៍ឯក ហួត ចាន់ធី អធិការនគរបាលស្រុក កំពង់សិលា បានបញ្ជាឲ្យកម្លាំងជំនាញចុះស្រាវជ្រាវ ករណីប្រើប្រាស់ពាក្យសម្ដីមិនសមរម្យលើសមត្ថកិច្ច នគរបាលស្រុកកំពង់សិលា ខេត្តព្រះសីហនុ តាមបណ្ដាញសង្គមហ្វេសបុក។
ម្ចាស់ឈ្មោះ វីស្រីហន ភេទស្រីអាយុ១៩ឆ្នាំ មានទីលំនៅបច្ចុបបន្នភូមិស្ទឹងសំរោង ឃុំអូរបាកទេះ ស្រុកកំពង់សីលា ខេត្តព្រះសីហនុ ប្រើប្រាស់អាខោនឈ្មោះ សុខ លីន និងតិកតុកឈ្មោះ ម៉ីម៉ីរៀល បានមកអធិការដ្ឋាននគរបាលស្រុកកំពង់សីលា ដើម្បីសុំផ្តល់អត្តសញ្ញាណបណ្ណសញ្ជាតិខ្មែរ កាលពីថ្ងៃទី២២ ខែវិច្ឆិកា ឆ្នាំ២០២១កន្លងទៅ។
ក្រោយពីបំពេញឯកសាររួច មន្រ្តីជំនាញបានតម្រូវឲ្យវាស់កម្ពស់ ស្របតាមលក្ខខណ្ឌដែលត្រូវផ្ដល់ តែបែរជាម្ចាស់ស្នើសុំធ្វើអត្តសញ្ញាណបណ្ណយល់ថា ការវាស់កម្ពស់ហាក់ដូចជាអ្នកទោស ក្រោយត្រឡប់មកដល់ផ្ទះវិញ ក៏បានធ្វើវីដេអូ និងបញ្ចេញរូបភាព ប្រើប្រាស់ពាក្យមិនសមរម្យលើសមត្ថកិច្ច រួចហើយបង្ហោះលើបណ្ដាញសង្គមទាំងពីររបស់ខ្លួន។
សកម្មភាពខាងលើនេះ សមត្ថកិច្ចជំនាញបានកោះហៅមកសួរនាំ កាលពីថ្ងៃទី២៣ ខែវិច្ឆិកា ២០២១ ហើយនារីខាងលើបានសារភាពថា ខ្លួនពិតជាបានប្រព្រឹត្តមែន ម៉្លោះហើយសមត្ថកិច្ចតម្រូវឲ្យធ្វើវីដេអូសុំទោសជាសាធារណៈ និងធ្វើកិច្ចសន្យាអប់រំណែនាំរួចហើយឲ្យត្រឡប់ទៅវិញ៕
