កាលពីថ្ងៃពុធ សប្ដាហ៍នេះ យោធាមីយ៉ាន់ម៉ាបានចាប់ខ្លួនពេទ្យចំនួន ១៨នាក់ ដោយសារតែបានព្យាបាលជំងឺឲ្យសមាជិកនៃ អង្គការភេវរករ ដោយសំដៅទៅលើក្រុមប្រឆាំងរដ្ឋាភិបាលខុសច្បាប់។ កងទ័ពបានធ្វើការចាប់ខ្លួន អំឡុងពេលវាយឆ្មក់ក្នុងព្រះវិហារមួយកន្លែងក្នុងទីក្រុង ឡាយក័រ (Loikaw) ភាគខាងកើតរដ្ឋ ក្យ៉ា (Kayah)។
គ្រូពេទ្យទាំងអស់នោះបានព្យាបាលអ្នកជំងឺចំនួន ៤៨នាក់ ក្នុងនោះអ្នកជំងឺចំនួន ៧នាក់ វិជ្ជមានកូវីដ១។ កាសែត Global New Light of Myanmar ជាកាសែតនាំពាក្យរបស់យោធានមីយ៉ានម៉ាបានចុះផ្សាយថា វាត្រូវបានយោធាដឹងថា ការព្យាបាលក្រៅផ្លូវការ កំពុងត្រូវបានផ្ដល់ជូនអ្នករបួស និង អ្នកជំងឺមកពីអង្គការភេវរករ។ ទោះជាយ៉ាងណា របាយការណ៍នេះមិនបានបញ្ចេញឈ្មោះអង្គការនោះទេ ហើយគ្រូពេទ្យទាំង ១៨នាក់នេះ នឹងត្រូវដោះស្រាយតាមច្បាប់។
គួរដឹងថា ប្រព័ន្ធថែទាំសុខភាពរបស់មីយ៉ាន់ ជិតដួលរលំទៅហើយ ចាប់តាំងពីកងទ័ពផ្ដួលរំលំរដ្ឋាភិបាលជាប់ឆ្នោតក្នុងរដ្ឋប្រហារថ្ងៃទី ១ ខែ កុម្ភៈ កន្លងទៅ។ បុគ្គលិកពេទ្យជាច្រើនបានចូលរួមចលនាមិនគោរពច្បាប់ស៊ីវិល ហើយបានបដិសេធមិនធ្វើការនៅក្នុងមន្ទីរពេទ្យដែលគ្រប់គ្រងដោយរបបយោធា។
យោងតាមក្រុមសិទ្ធិមនុស្សបានឲ្យដឹងថា កន្លែងថែទាំសុខភាព និង គ្រូពេទ្យជាច្រើនត្រូវបានក្រុមសន្តិសុខក្នុងប្រទេសមីយ៉ាន់ម៉ាកំណត់គោលដៅ។ ប៉ុន្ដែយោធាមីយ៉ាន់ម៉ាបានអំពាវនាវដល់គ្រូពេទ្យទាំងអស់ចូលមកធ្វើការជាធម្មតាវិញ។ របាយការណ៍ក្នុងប្រទេសបានប្រកាសថា គ្រូពេទ្យចំនួន ៤នាក់ គិលានុបដ្ឋាយិកា ៤នាក់ និង ជំនួយការគិលានុបដ្ឋាយិកាចំនួន ១០នាក់ ដែលត្រូវបានចាប់ខ្លួននៅក្នុងព្រះវិហារទាំងអស់នោះ និងត្រូវបានចោទប្រកាន់ពីបទញុះញង់ជុំវិញការបដិសេធមិនធ្វើការ៕
ចាប់តាំងពីការធ្វើរដ្ឋប្រហារផ្ដួលរំលំរដ្ឋាភិបាលនៃប្រទេសមីយ៉ាន់ម៉ា ជនស៊ីវិលជិត ១ពាន់៣រយនាក់ ត្រូវបានសម្លាប់ និង ជាង ១ម៉ឺននាក់ ត្រូវបានចាប់ខ្លួន នេះបើយោងតាមសមាគមជំនួយសម្រាប់អ្នកទោសនយោបាយក្នុងប្រទេស(AAPP) ដែលបានតាមដានព្រឹត្តិការណ៍ក្រោយរដ្ឋប្រហារពីយោធាមីយ៉ាន់ម៉ា។ ប៉ុន្ដែទោះជាយ៉ាងណារបបយោធាមីយ៉ាន់ម៉ា បានច្រានចោលទន្និន័យពីសមាគមខាងលើ ហើយបានចោទប្រកាន់ថាវាលម្អៀង៕
ប្រភព៖ CNN