ទីបំផុតក្រុមបាល់ទាត់វិសាខា ក្លាយជាម្ចាស់ជើងឯកពានរង្វាន់បាល់ទាត់សម្តេចតេជោ ហ៊ុន សែន ឆ្នាំទី១៥ ឆ្នាំ២០២១ និងជាការឈ្នះលើកទី២ ក្នុងប្រវត្តិសាស្រ្តរបស់ខ្លួន ក្រោយយកឈ្នះលើក្រុមបាល់ទាត់ម្ចាស់ជើងឯក៤សម័យកាលព្រះខ័នរាជស្វាយរៀង នៅវគ្គផ្ដាច់ព្រ័ត្រដោយបាល់ប៉េណាំងទីកាត់សេចក្ដីដោយលទ្ធផល ៥ទល់៤ លើទីលានកីឡដ្ឋាន Smart RSN Stadium នៅល្ងាចថ្ងៃព្រហស្បត្តិ៍ ទី២៥ ខែវិច្ឆិកា ឆ្នាំ២០២១ នេះ។
ដំបូងឡើយលទ្ធផលនៃការប្រកួតរវាងក្រុមទាំង២គឺស្មើគ្នា ២ទល់២ ពោលគឺកីឡាករ ប្រាក់ មុន្នីឧត្តម បានរកគ្រាប់បាល់ឱ្យព្រះខ័នរាជស្វាយរៀង នាំមុខមុននៅនាទី៥៣ ហើយនៅនាទី៧១ ម្ចាស់ស្បែកជើងមាសឆ្នាំចាស់ វុធ តុលា រកគ្រាប់បាល់ឱ្យវិសាខា តាមស្មើវិញ។ លទ្ធផលនេះបានរក្សារហូតដល់នាទី៩០ពេញ ទើបលោកអាជ្ញាកណ្ដាល ឃិន ឧសីហា បានថែមម៉ោង១៥នាទីចំនួន២ដងដើម្បីបន្តការប្រកួត។ ចូលដល់នាទី៩០+១០ កីឡាករ ជូ ស៊ិនទិ បានរកគ្រាប់បាល់អោយព្រះខ័នរាជស្វាយរៀង បន្តនាំមុខ តែត្រូវកីឡាករ អ៊ុក សុវណ្ណ រកបានគ្រាប់បាល់តាមស្មើទៀតនៅនាទី៩០+១៦។
លទ្ធផលស្មើគ្នានេះត្រូវឱ្យក្រុមទាំង២ ទាល់បាល់ប៉េណាំងទីកាត់សេចក្ដី ម្ខាង៥បាល់ម្នាក់ ហើយជាលទ្ធផលក្រុមវិសាខា បានយកឈ្នះលើក្រុមព្រះខ័នរាជស្វាយរៀង ដោយលទ្ធផល ៥ទល់៤។
អត្ថបទពាក់ព័ន្ធ៖Hun Sen Cup៖ បឹងកេត ជាម្ចាស់មេដាយសំរឹទ្ធិ ក្រោយឈ្នះម្ចាស់ផ្ទះភ្នំពេញក្រោន ២-០
នេះជាឆ្នាំទី១៥ ហើយដែលពានរង្វាន់សម្តេចតេជោ ហ៊ុន សែន បង្កើតឡើងពោលគឺគិតពីឆ្នាំ២០០៧ មក ដោយព្រះខ័នរាជស្វាយរៀង ឈ្នះជើងឯក៤លើក ហើយក្រុមកងយោធពលខេមរភូមិន្ទ ឈ្នះបាន៣លើក ក្រុមភ្នំពេញក្រោន និងវិសាខា ឈ្នះម្នាក់២លើក ហើយក្រុមណាហ្គាវើល អគ្គស្នងការដ្ឋាននគរបាលជាតិ បឹងកេត និងខេមរាកីឡា ឈ្នះម្នាក់១លើក។
ដូច្នេះក្រុមវិសាខា ជាក្រុមទី២តំណាងឱ្យកម្ពុជា ចេញទៅប្រកួតក្នុងពានរង្វាន់បាល់ទាត់កម្រិតទ្វីបអាស៊ី AFC Cup 2022 ខាងមុខ ក្នុងវគ្គជម្រុះ បន្ទាប់ពីក្រុមភ្នំពេញក្រោន ម្ចាស់ជើងឯកពានរង្វាន់លីគកំពូលកម្ពុជា មានឈ្មោះទៅលេងនៅវគ្គចែកពូលប្រចាំតំបន់អាស៊ាន៕