លោកស្រី ម៉ាកដាលីណា អានឌើសសុន (Magdalena Andersson) ដែលជានាយករដ្ឋមន្ត្រីស្រីដំបូងគេនៅក្នុងប្រវត្តិសាស្ត្រស៊ុយអែត បានលាលែងពីតំណែងបន្ទាប់ពីទទួលតំណែងមិនដល់ ១២ម៉ោងផង។
ការលាលែងពីតំណែងនេះបានធ្វើឡើង ក្រោយពេលដែលគណបក្សបៃតង បានដកខ្លួនចេញពីសម្ព័ន្ធភាពចម្រុះដែលមាន ២គណបក្ស និង បានធ្វើឲ្យមានភាពមិនច្បាស់លាស់ខាងនយោបាយ។
ក្រោយលាលែងពីតំណែង លោកស្រី អានឌើសសុន បាននិយាយប្រាប់សភាស៊ុយអែតថា លោកស្រីសង្ឃឹមថានឹងត្រូវបានតែងតាំងជានាយករដ្ឋមន្ត្រីជាថ្មីម្ដងទៀតក្នុងនាមជាប្រមុខរដ្ឋាភិបាលគណបក្សតែមួយ។ គណបក្សបៃតងបានលាលែងពីការចូលរួមបង្កើតរដ្ឋាភិបាលចម្រុះ ដោយសារតែសភាបានច្រានចោលច្បាប់ថវិការបស់ក្រុមសម្ព័ន្ធចម្រុះ។
លោកស្រីអតីតនាយករដ្ឋមន្ត្រីរូបនេះ បាននិយាយប្រាប់សន្និសិទសារព័ត៌មានថា លោកស្រីបានស្នើសុំឲ្យសភាពស៊ុយអែតដកតួនាទីលោកស្រីជានាយករដ្ឋមន្ត្រី។ លោកស្រីបានត្រៀនខ្លួនរួចហើយ សម្រាប់ការធ្វើជានាយករដ្ឋមន្ត្រីដែលមានគណបក្សតែមួយ គឺរដ្ឋាភិបាលគណបក្សសង្គមប្រជាធិបតេយ្យ។
គណបក្សបៃតងបាននិយាយថា ខ្លួននឹងគាំទ្រលោកស្រីក្នុងការបោះឆ្នោតសម្រេចជាថ្មីណាមួយនៅសភា ហើយគណបក្សកណ្ដាលនិយមសន្យាថានឹងបដិសេធ ដែលក្នុងការអនុវត្តជាក់ស្ដែងស្មើនឹងការគាំទ្របេក្ខភាពលោកស្រីជានាយករដ្ឋមន្ត្រី ខណៈគណបក្សឆ្វេងនិយមក៏និយាយថា ពួកគេក៏គាំទ្រលោកស្រីជាថ្មីដែរ។
នៅថ្ងៃបោះឆ្នោតមានអ្នកនយោបាយចំនួន ១១៧នាក់ បានបោះឆ្នោតគាំទ្រលោកស្រី អានឌើសសុន រីឯអ្នកនយោបាយចំនួន ១៧៤នាក់ទៀតច្រានចោលការតែងតាំងលោកស្រី ខណៈដែល ៥៧នាក់ទៀត បានអនុប្បវាទ និង អ្នកនយោបាយម្នាក់អវត្តមាន។
សូមជម្រាបថា នៅក្រោមរដ្ឋធម្មនុញ្ញស៊ុយអែត នាយករដ្ឋមន្ត្រីនីមួយៗអាចត្រូវបានដាក់ឈ្មោះ និង គ្រប់គ្រងបានដរាបណាសមាជិកសភា ១៧៥នាក់ មិនប្រឆាំងនឹងការតែងតាំង។ ប៉ុន្ដែទោះជាយ៉ាងណាការបោះឆ្នោតជាសាកលបន្ទាប់របស់ស៊ុយអែត គ្រោងធ្វើនៅថ្ងៃទី ១១ ខែ កញ្ញា ឆ្នាំ ២០២២៕
ប្រភព៖ Aljazeera