បទចម្រៀងថ្មី Top Of The Lady ( វីរនារី) របស់កញ្ញា ទេព បូព្រឹក្ស បានលេចចេញជាវីដេអូពេញផ្លូវការហើយកាលពីថ្ងៃទី២៧ ខែវិច្ឆិកា ឆ្នាំ២០២១ ក្នុងនោះមហាជននិងអ្នកគាំទ្រជាច្រើននាក់បានសម្តែងការស្ញើចសរសើរ ព្រមទាំងបង្ហាញចំណាប់អារម្មណ៍ពេញចិត្តពេញថ្លើមចំពោះស្នាដៃសមិទ្ធផលថ្មីនេះ។ ផ្ទុយពីប្រជាពលរដ្ឋកម្ពុជាមួយភាគធំ ដែលបង្ហាញការសាទរចំពោះ MV ថ្មីប្រើប្រាស់ខ្ទង់ចំណាយ ៦០០លានរៀល លោក ម៉ៃ សុគន្ធ បែរជាចេញមករិះគន់ធ្ងន់ៗនិងសើចចំអកចំពោះបទចម្រៀងនេះទៅវិញ។
យោងតាមការស្ទង់មតិពីបណ្ដាញសង្គម មានផេកជាច្រើន បានធ្វើការផ្សព្វផ្សាយបន្ត MV ថ្មីមួយនេះ ព្រោះជាស្នាដៃមួយដែលសម្រិតសម្រាំងយ៉ាងពិសេស រំលេចចេញនូវសិល្បៈវប្បធម៌ ប្រវត្តិសាស្ត្រដ៏ឧត្តមរុងរឿង នៃអាណាចក្រខ្មែរបុរាណ ថែមទាំងលើកស្ទួយស្ត្រីខ្មែរ ជាស្ត្រីមានភាពអង់អាចក្លាហានតាំងពីបុរាណសម័យ និយាយជារួមបទចម្រៀងនេះពិតជាស័ក្តិសមនឹងទទួលបានការកោតសរសើរព្រោះជាបទចម្រៀងមួយឆ្លុះបញ្ចាំងពីអត្តសញ្ញាណជាតិខ្មែរយ៉ាងពិតប្រាកដ។
ប៉ុន្តែជាការកត់សម្គាល់នៅថ្ងៃទី២៧ ខែវិច្ឆិកា អតីតតារាចម្រៀង ម៉ៃ សុគន្ធ បែរជាបង្ហាញទស្សនៈផ្ទុយពីមនុស្សខ្មែរមួយចំនួនធំដែលកំពុងតែសាទរចំពោះបទចម្រៀងថ្មី «Top of The Lady» ទៅវិញ។ បុរសដែលត្រូវបានមហាជនផ្ដល់រហស្សនាមឱ្យថាកំពូលទើស បានចេញមកព្រលយសម្ដីតាមបណ្ដាញសង្គមថា បទចម្រៀងរបស់កញ្ញា ទេព បូព្រឹក្សមួយនេះមិនសមនឹងចំណាយប្រាក់ច្រើនសន្ធឹកសន្ធាប់នោះទេ លោកថែមទាំងប្រើសម្ដីឌឺដងផ្លែផ្កាទៀតថា បើសិនជាលោកវិញ ចំណាយត្រឹម៦០លាន ធានាថាបានល្អជាង។
មិនអស់មិនហើយឈានចូលមកដល់ថ្ងៃទី២៨ ខែវិច្ឆិកា ឆ្នាំ២០២១ ម្សិលមិញនេះ អតីតតារាចម្រៀងមានកេរ្តិ៍ឈ្មោះបង្គួររូបនេះបានចេញមកបង្ហាញប្រតិកម្មជាថ្មីម្ដងទៀត ពាក់ព័ន្ធនឹងបទចម្រៀង «Top Of the Lady» ដោយលើកនេះលោកបានសរសេរចោទប្រកាន់ថាបទថ្មីរបស់ កញ្ញា ទេព បូព្រឹក្សចម្លងពីបទបរទេស។ សំណេរដែលលោកបានបង្ហោះលើបណ្ដាញសង្គមមានអត្ថន័យទាំងស្រុងយ៉ាងដូច្នេះ៖ «ពិតជាអស្ចារ្យមែន គាត់អត់ Copy ទេ តែចម្លងហ្មងម៉េចដែរ Original Song Bodia (និយាយពីសាច់ភ្លេងនិងការច្រៀង) មិនមែនទើសទេ តែចង់បានរបស់ពិតៗជារបស់យើងតែម្ដង កុំចាប់ពីនេះ ម៉ាចុប ចាប់ពីនោះម៉ាចុប ហើយថាជារបស់យើង ទាន់!!!»
តែនៅមិនទាន់ចប់ទេនៅល្ងាចថ្ងៃទី២៨ នេះដដែលតារាកំពូលទើសម្នាក់នេះបានចេញមកប្រតិកម្មម្តងទៀតអំពីការសម្តែងក្នុងវីដេអូចម្រៀងថ្មីរបស់ កញ្ញា ទេព បូព្រឹក្ស ថាជាបទចម្លងស្តាយពីបរទេសសុទ្ធសាធគ្មានត្រង់ណាជាការផលិតរបស់ខ្លួនឯងនោះទេ ដោយតារាប្រុសខាងលើបានសរសេរថា៖ «ពិតជាអស្ចារ្យមែន គាត់អត់ Copy ទេ តែចម្លងហ្មងម៉េចដែរ Original Song Bodia (និយាយពីសាច់ភ្លេងនិងការច្រៀង) មិនមែនទើសទេ តែចង់បានរបស់ពិតៗជារបស់យើងតែម្តង កុំចាប់ពីនេះ ម៉ាចុប ចាប់ពីនោះម៉ាចុប ហើយថារបស់យើង ទាន់!!!»។
ក្រោយពីលោក ម៉ៃ សុគន្ធចេញមកប្រតិកម្មចំពោះបទចម្រៀង «Top of the Lady» ម្ដងជាពីរដង មិនទាន់មានការឆ្លើយតបណាមួយពីសំណាក់កញ្ញា ទេព បូព្រឹក្ស ឬក្រុមការងាររបស់កញ្ញានៅឡើយនោះទេ ប៉ុន្តែបណ្ដាអ្នកគាំទ្ររបស់កញ្ញា ទេព បូព្រឹក្ស និងបណ្ដាសាធារណជនបានចូលមកជេរ និងចំអកឡកឡឺយ ឱ្យលោក ម៉ៃ សុគន្ធ យ៉ាងធ្ងន់ធ្ងរ ថែមទាំងច្រានចោលចំពោះការចោទប្រកាន់របស់លោកថាបទនេះជាបទចម្លងពីបរទេសថែមទៀតផង៕
