ខណៈដែលរឿងភាគថ្មីចាប់ដៃគូសម្ដែងជាបុរសសង្ហា Jang Ki Yong កំពុងចាក់បញ្ចាំងនៅពេលនេះមានដំណឹងថ្មីៗក្ដៅមួយទៀតបានផ្សាយឱ្យដឹងថាអ្នកមេម៉ាយចាយសម្រស់ Song Hye Kyo ហៅ ហាន់ ជីអ៊ុន កំពុងតែត្រៀមថតរឿងភាគថ្មីជាមួយនឹងតួឯកប្រុសក្មេងវ័យ មានអាយុប្អូនរហូតដល់ទៅ១៨ឆ្នាំ។
សម្រាប់រឿងភាគថ្មីដែល Song Hye Kyo ទទួលសម្ដែងនេះមានចំណងជើងថា «The Glory» ចាប់ដៃគូសម្ដែងជាមួយនឹងបុរសសង្ហា Lee Do-hyeon ដោយរឿងភាគថ្មីនេះបានកំណត់កាលបរិច្ឆេទថតនៅក្នុងខែមករា ឆ្នាំ២០២២ ខាងមុខនេះហើយ។
រឿងភាគថ្មីរបស់តារាស្រីសាច់ចាំរូបនេះស្ថិតនៅក្នុងប្រូចេក (Project) Original Series របស់ Netflix ដែលមានចំនួនសរុប៨ភាគ។ រឿងនេះគឺជាស្នាដៃសរសេរអត្ថបទរឿងដោយអ្នកនិពន្ធល្បី Kim Eun-sook (김은숙) ម្ចាស់ស្នាដៃរឿងភាគល្បីៗជាច្រើនដូចជា «Secret Garden» «Descendants of the Sun» «Goblin» និង «The King: Enternal Monarch»។
អ្នកដឹកនាំរឿងដែលនឹងមកដឹកនាំរឿងនេះគឺជាអ្នកដឹកនាំរឿងពីភាពយន្តភាគជាស៊េរី «Record of Youth» និង «Secret Forest S.1» គឺលោក Ahn Gil-ho (안길호)។
រឿងនេះត្រូវបានប្រភពខាងក្នុងបង្ហើបឱ្យដឹងថាសាច់រឿង និយាយពី «នារីម្នាក់បានប្រែក្លាយខ្លួនជាគ្រូរបស់កូនប្រុស មនុស្សប្រុសដែលធ្លាប់ធ្វើបាបខ្លួន ហើយរឿងរ៉ាវសងសឹកក៏បានចាប់ផ្ដើមឡើង»៕
