លោកស្រី ម៉េកដាលីណា អេនឌ៊ើសុន (Magdalena Andersson) ដែលជានាយករដ្ឋមន្ត្រីស្រីដំបូងគេរបស់ប្រទេសស៊ុយអែតបានវិលមកកាន់តំណែងជាថ្មីកាលពីថ្ងៃច័ន្ទ ទី ២៩ ខែ វិច្ឆិកា ឆ្នាំ ២០២១។ នេះជាការតែងតាំងលើកទី ២ បន្ទាប់ពីលោកស្រីធ្លាប់បានលាលែងពីតំណែងក្រោយពីប្រកាសជាប់ជានាយករដ្ឋមន្ត្រីកាលពីថ្ងៃពុធ សប្ដាហ៍មុន និងកាន់តំណែងបានមិនដល់ ១២ម៉ោង ផងនោះ។ លោកស្រីបានប្រាប់រដ្ឋសភាលាឈប់ពីតួនាទីជានាយករដ្ឋមន្ត្រី ដោយសារតែគណបក្សបៃតងដែលចូលរួមជាសម្ព័នចម្រុះជាមួយលោកស្រីបានដកខ្លួន ព្រោះតែរដ្ឋសភាមិនអនុម័តថវិកាសម្រាប់ក្រុមសម្ព័ន្ធចម្រុះ។
សមាជិកសភាបានបោះឆ្នោតតែងតាំងលោកស្រីជានាយករដ្ឋមន្ត្រីលើកទី២ក្នុងរយៈពេលមិនដល់ ១សប្តាហ៍ផង បន្ទាប់ពីលោកបានរៀបចំផែនការបង្កើតរដ្ឋាភិបាលឯកបក្សដែលមានតែគណបក្សសង្គមប្រជាធិបតេយ្យតែ១គត់ ដោយគណបក្សរបស់លោកស្រីម៉េកដាលីណា អេនឌ៊ើសុន (Magdalena Andersson)ទទួលបាន ១០០អាសនៈក្នុងចំណោមអាសនៈសភា៣៤៩។
ដោយឡែកមេដឹកនាំគណបក្សប្រឆាំងស្តាំនិយម Moderate Party លោក Ulf Kristersson បានចាត់ទុករដ្ឋបាលដែលនឹងកើតខាងមុខគឺជារដ្ឋាភិបាលចាំផ្ទះ៩ខែ និងនិយាយថា វានឹងមិនអាចទទួលបានជោគជ័យសម្រាប់ការបោះឆ្នោតនាខែកញ្ញា ឆ្នាំ២០២២ទេ។ ហើយថា ការដឹកនាំរដ្ឋាភិបាលរបស់លោកស្រី Andersson នឹងទន់ខ្សោយបំផុតក្នុងចំណោមរដ្ឋាភិបាលទន់ខ្សោយរបស់ស៊ុយអែតក្នុងរយៈពេលប៉ុន្មានទសវត្សរ៍ចុងក្រោយនេះ និងអាចត្រូវប្រឈមបញ្ហាជាច្រើនទៀតផងដែរ៕
ប្រភព៖ Aljazeera