លោកBojan Hodak អតីតគ្រូបង្វឹកក្រុមបាល់ទាត់ភ្នំពេញក្រោន របស់កម្ពុជា អំឡុងឆ្នាំ២០១១ បានជួយក្រុមបាល់ទាត់ Kuala Lumpur City FC កក់កៅអីវគ្គចែកពូលនៃពានរង្វាន់បាល់ទាត់ទ្វីបអាស៊ី AFC Cup 2022 ខាងមុខ ក្រោយក្លាយជាម្ចាស់ជើងឯកពានរង្វាន់ 2021 Malaysia Cup នៅរាត្រីថ្ងៃអង្គារ សប្ដាហ៍នេះបន្ទាប់ពីយកឈ្នះលើក្រុមអភិជន Johor Darul Ta’zim នៅវគ្គផ្ដាច់ព្រ័ត្រ ២-០។
អត្ថបទពាក់ព័ន្ធ៖ក្រុម JDT ឈ្នះជើងឯកពានរង្វាន់លីគកំពូលម៉ាឡេស៊ី ៨ឆ្នាំជាប់ៗគ្នាគិតពីឆ្នាំ២០១៤មក
ក្រោមក្រសែភ្នែកទស្សនិកជនជិត២ម៉ឺននាក់លើទីលានកីឡដ្ឋាន Bukit Jalil National Stadium ក្នុងទីក្រុងកូឡាឡាំពួរ ក្រុមKuala Lumpur City FC បានទាត់បាល់បញ្ជូលទីបានដោយកីឡាករ Yahya នៅនាទី៦៦ និងកីឡាករប្រេស៊ីល Paulo Josué នៅនាទី៧៤។
នេះជាលើកទី៤ ហើយដែលក្រុម Kuala Lumpur City FC ឈ្នះពានរង្វាន់ Malaysia Cup ខណៈ៣លើកកន្លងមកក្រុមនេះឈ្នះនៅឆ្នាំ១៩៨៧,១៩៨៨និង១៩៨៩។
លោកBojan Hodak ធ្លាប់ដឹកនាំក្រុម UPB-MyTeam FC នៅឆ្នាំ២០០៦ ខណៈនៅឆ្នាំ២០១០-២០១១ លោកបានដឹកនាំក្រុមភ្នំពេញក្រោន ព្រមទាំងឈ្នះជើងឯកពានរង្វាន់លីគកំពូលកម្ពុជា នៅឆ្នាំ២០១១ ផងដែរ។ ក្រោយមកលោកបានចេញទៅធ្វើជាគ្រូជំនួយប្រចាំក្លិប Shandong Luneng Taishan នៅលីគកំពូលចិន។ តែក្រោយមកលោកត្រឡប់ទៅម៉ាឡេស៊ី វិញដោយដឹកនាំក្រុម Kelantan, Johor Darul Ta’zim ក្នុងនាមជាគ្រូបង្វឹក និងធ្វើជា CEO ក្រុម Penang និងដឹកនាំក្រុម U19 ម៉ាឡេស៊ី ផងដែរ។ នៅឆ្នាំ២០២០ កន្លងទៅលោកដឹកនាំក្រុម PSM Makassar នៅឥណ្ឌូណេស៊ី និងឆ្នាំ២០២១ នេះត្រឡប់មកម៉ាឡេស៊ី វិញដឹកនាំក្រុម Kuala Lumpur City FC។
អត្ថបទពាក់ព័ន្ធ៖Ronaldo លេងឱ្យក្រុមជម្រើសជាតិតិចជាង Ramos!តែអ្នកទាំង២នៅចាញ់កីឡាករអាស៊ានម្នាក់នេះ
ម៉ាឡេស៊ី មានកៅអី៣ក្រុមចេញទៅប្រកួតក្នុងពានរង្វាន់កម្រិតទ្វីបអាស៊ី ដោយក្នុងនោះក្រុមជើងឯកពានរង្វាន់លីគកំពូល ជាប់ឈ្មោះចេញទៅប្រកួតវគ្គចែកពូលពានរង្វាន់ AFC Champion League ហើយក្រុមជើងឯករង និងក្រុមជើងឯកពាន Malaysia Cup មានឈ្មោះឈរចាំវគ្គចែកពូលពានរង្វាន់ AFC Cup ផងដែរ៕
