ទំព័រស្នេហាឆ្លងប៉ុស្ដិ៍ទូរទស្សន៍រវាងតារាស្រី Bella Ranee តារាប្រចាំប៉ុស្ដិ៍លេខ៣ថៃ និងតារាប្រុស Weir sukollawat តារាប្រុសប្រចាំប៉ុស្ដិ៍លេខ៧ថៃ ត្រូវបានបិទទំព័រសេ្នហាចប់ជាស្ថាពរ។ ដំណឹងដ៏រសើបនេះ ធ្វើឱ្យអ្នកគាំទ្ររបស់តារាទាំងពីរដួងនេះ មានអារម្មណ៍ស្រងោះស្រងោចចិត្តជាខ្លាំង និងជូនពរឱ្យអ្នកទាំងពីររកសេចក្ដីសុខរៀងខ្លួនបានសម្រេចដូចប្រាថ្នា។
បើទោះបីជាយ៉ាងណាក៏ដោយ ថ្មីៗនេះ តារាស្រី Bella Ranee បានធ្វើបទសម្ភាសន៍ប្រកាសឱ្យមហាជនដឹងថា នាងពិតជាសល់តែពាក្យថាជាបងប្អូនល្អនឹងគ្នា ជាមួយតារាប្រុស Weir sukollawat ពិតមែន។ ហើយនាងក៏អរគុណចំពោះអ្នកគាំទ្រទាំងអស់ នូវពាក្យលើកទឹកចិត្តជាច្រើន ដែលបានផ្ដល់កម្លាំងចិត្តឱ្យនាងតាំងពីដើមមកម្លេះ។
យ៉ាងណាមិញ រងើកស្នេហ៍ចាស់បានរលត់ហើយ តែឡើយតារាស្រី Bella Ranee ត្រូវអ្នកគាំទ្រសង្ស័យថា មានក្លិនស្នេហ៍ថ្មីកំពុងភាយឡើង។ នៅអំឡុងពេលនេះ តារាស្រី Bella Ranee និងលោក Pope Thanavat កំពុងធ្វើការរួមគ្នាមួយ គឺការថតរឿង «ព្រហ្មលិខិត» ដែលជារឿងបន្ទាប់ពីរឿង «បុព្វេសន្និវាស»។ អ្នកទាំងពីរមានឱកាសជាច្រើននឹងនៅកៀកកិតជិតគ្នាណាស់ ហើយអ្វីដែលសំខាន់គឺ អ្នកទាំងពីរគឺសុទ្ធតែជាតួប្រុសតួស្រីដែលបេះដូងកំពុងទំនេរនៅពេលនេះដូចគ្នាតែម្ដង។ មួយវិញទៀត អ្នកទាំងពីរក៏ជាតារាជ្រកក្រោមទ្រនំប៉ុស្ដិ៍លេខ៣ថៃរួមគ្នាទៀតផង។
កាលពីលើកមុន អ្នកគាំទ្រតារាស្រី Bella Ranee និងលោក Pope Thanavat ធ្លាប់បានគូសផ្គងនិងបន់ឱ្យអ្នកទាំងពីរក្លាយជាគូស្នេហ៍ពិត តាំងពីអំឡុងពេលបញ្ចប់រឿង«បុព្វេសន្និវាស» មកម្លេះ។ ក៏ប៉ុន្ដែ Bella គឺជាប់បេះដូងជាមួយលោក Weir sukollawat នៅឡើយ ។ ដោយសារតែរឿងភាគ«បុព្វេសន្និវាស»មានភាពល្បីល្បាញខ្លាំងពេក បូករួមទាំងការគូសផ្គងរបស់អ្នកគាំទ្រនាង Bella Ranee និងលោក Pope Thanavat ទៀតផងនេះ ទើបធ្វើឱ្យលោក Weir sukollawat មានការអាក់អន់ចិត្តបន្ដិច។ ដូចមិនមានបញ្ហាចោទ លោក Weir បានចេញមុខឆ្លើយបដិសេធប្រាប់មហាជនវិញថា លោកគិតថារឿងនេះគឺជាការងារសិល្បៈច្រើនជាងដែលថា Bella Ranee មានចិត្តឱ្យលោក Pope Thanavat។
មកទល់ពេលនេះ ហាក់បីដូចជារងើកស្នេហ៍ពីបុព្វេ បានកក្រើកមកវិញទៀតហើយ ដោយអ្នកគាំទ្រតារាស្រី Bella Ranee និងលោក Pope Thanavat កំពុងបន់ស្រន់ឱ្យអ្នកទាំងពីរក្លាយជាគូស្នេហ៍ពិតម្ដងទៀត និងបានបង្កើត Hashtag ថា #โป๊ปเบลล่า (#ប៉ូបបេឡា) ដើម្បីក្លាយជា Hashtag លំដាប់ទី១នៅលើបណ្ដាញសង្គម Twitter និង Instagram ៕
