យោងតាមសារព័ត៌មានកូរ៉េបានចេញផ្សាយនៅពេលថ្មីៗនេះ CJ ENM ជាអ្នករៀបចំកម្មវិធី Mnet Asian Music Awards (MAMA) 2021 នេះ បានចេញសេចក្ដីអះអាងថា ក្រុមចម្រៀង BTS នឹងមិនអាចចូលរួមកម្មវិធីនេះបានទេ ដោយសារតែតម្រូវឱ្យធ្វើចត្តាឡីស័កក្នុងអំឡុងពេលការរីករាលដាលវីរ៉ុសបំប្លែងខ្លួនថ្មី Omicron។
សូមរំលឹកជូនបន្ដិចថា តាមរយៈការចេញផ្សាយ CNA នៅពេលថ្មីៗនេះ បានឱ្យដឹងថា នៅប្រទេសកូរ៉េខាងត្បូង បានរកឃើញករណីដំបូងនៃវីរុសក្លាយពូជថ្មីឈ្មោះថា Omicron កាលពីថ្ងៃពុធមានចំនួន៥ករណី ខណៈដែលចំនួនអ្នកឆ្លងជំងឺកូវីដ១៩ ប្រចាំថ្ងៃបានកើនឡើងលើសពី៥០០០នាក់ ជាលើកដំបូង។ បញ្ហាប្រឈមនេះបានធ្វើឱ្យកូរ៉េខាងត្បូង មានក្តីបារម្ភយ៉ាងខ្លាំងចំពោះការកើនឡើងដែលអ្នកជំងឺមានរោគសញ្ញាជាច្រើនបានលេចឡើង ។ រដ្ឋាភិបាលកូរ៉េខាងត្បូងបានដាក់បទបញ្ជាថ្មីសម្រាប់អ្នកធ្វើដំណើរពីក្រៅប្រទេសចូលមកកាន់ប្រទេសកូរ៉េ គឺនឹងត្រូវតម្រូវឱ្យធ្វើចត្តាឡីស័ករយៈពេល ១០ ថ្ងៃ ចាប់ពីថ្ងៃទី៣ ខែធ្នូ នេះតទៅ។
នេះជាមូលហេតុមួយដែលធ្វើឱ្យក្រុមចម្រៀង BTS ខកខានមិនបានចូលរួមដណ្ដើមពានក្នុងកម្មវិធីដ៏ធំមួយនេះ។ បើទោះបីជាមិនបានចូលរួមក៏ពិតមែន តែខាង CJ ENM ជាអ្នករៀបចំកម្មវិធី បានអះអាងបន្ថែមថា ក្រុមចម្រៀង BTS នឹងធ្វើវីដេអូសុំទោស និងអរគុណទៅកាន់អ្នកគាំទ្រ ដោយសារតែក្រុមនេះមិនមានពេលវេលាគ្រប់គ្រាន់ក្នុងការថតទុកការសម្ដែងជាមុន។
សូមជម្រាបបន្ថែមថា កម្មវិធីធំប្រចាំ Mnet Asian Music Awards (MAMA) 2021 នឹងប្រព្រឹត្តិទៅថ្ងៃទី ១១ ខែធ្នូ វេលាម៉ោង ៦ ល្ងាច (ម៉ោងក្នុងប្រទេសកូរ៉េ) ត្រូវនឹងម៉ោង ៤រសៀលក្នុងប្រទេសកម្ពុជា។ ហើយហ្វេនអ្នកគាំទ្រទាំងអស់អាចបោះឆ្នោតជូនតារា K-pop ក្នុងដួងចិត្ត នៅលើគេហទំព័រ mama.mwave.me/en/vote ចាប់ពីថ្ងៃនេះ ដល់ថ្ងៃទី ៩ ខែធ្នូ ត្រឹមម៉ោង ៤:៥៩ នាទី រសៀល(ម៉ោងក្នុងប្រទេសកូរ៉េ)៕