តាមរយៈការចេញផ្សាយរបស់គេហទំព័រព័ត៌មានថៃ Matichon បានឱ្យដឹងថា ការប្រកួត Miss Grand International 2021 បានបញ្ចប់ដោយជោគជ័យ និងបានរកឃើញម្ចាស់មកុដ ដែលបានទៅលើបវរកញ្ញា Nguyen Thuc Thuy Tien ជា Miss Grand Vietnam មានវ័យ ២៣ឆ្នាំ។
អ្វីដែលកំពុងធ្វើឱ្យមានកំដៅលើបណ្ដាញសង្គម TikTok និង Facebook គឺពាក់ព័ន្ធទៅនឹងកាយវិការបស់បវរកញ្ញារូបនេះ ព្រោះកញ្ញាហ៊ានលើកសញ្ញាម្រាមដៃ ៣ ដែលមានបង្ហាញអត្ថន័យថា «stop the war and violence » ជាសញ្ញាដែលក្រុមអ្នកតវ៉ានៅប្រទេសថៃបានចាប់ផ្តើមប្រើវាក្នុងការតវ៉ាប្រឆាំងជាមួយនឹងរដ្ឋាភិបាលថៃ បន្ទាប់ពីមានរដ្ឋប្រហារយោធាកាលពីខែឧសភា ឆ្នាំ ២០១៤ ។
នៅក្នុងវគ្គសំណួរចម្លើយ Top 10 កញ្ញា Nguyen Thuc Thuy Tien ជា Miss Grand Vietnam បានឆ្លើយថា ៖«ខ្ញុំបានតាមដានពីស្ថានការណ៍ប្រទេសថៃប្រមាណ ២-៣ ខែមុន ពាក់ព័ន្ធជាមួយបញ្ហាប្រជាជនចេញមកតវ៉ា និងប្រឆាំងជាមួយនយោបាយក្នុងប្រទេសថៃ។ ដូច្នោះហើយ ខ្ញុំចាំបាច់ត្រូវតែលើកម្រាមដៃ៣ឡើង ជាមួយអត្ថន័យជាភាសាថៃថា “ធ្វើឱ្យពិភពលោកពេញលេញ ដែលល្អប្រសើរឡើងសម្រាប់អ្នកគ្រប់គ្នា” ។ ខ្ញុំគិតថា អ្វីដែលបានកើតឡើងអំឡុង២-៣ ខែកន្លងមកនេះ និងពេលវេលានេះ ក៏សមរម្យនឹងនិយាយឡើង ដែលចង់ដាស់តឿនដល់មនុស្សម្នាជាច្រើននាក់ទៀតថា ឱ្យជួយគ្នាកសាងពិភពលោកដែលមានសភាពប្រសើរឡើង»។
តែយ៉ាងណាក៏ដោយ ក្រោយពេលដណ្ដើមបានមកុដ Miss Grand International 2021 កញ្ញា Nguyen Thuc Thuy Tien បាននិយាយបកស្រាយពីអារម្មណ៍របស់ខ្លួនថា «ពិតប្រាកដណាស់ ខ្ញុំមានសេចក្ដីសុខខ្លាំងៗ និងខ្លាំងបំផុត។ ជាមួយគ្នានោះដែរ ក៏មានអារម្មណ៍ព្រួយបារម្ភបន្ដិចដែរ ព្រោះខ្ញុំស្ទើតែមិនជឿថា ខ្ញុំអាចមកឈរបានត្រង់ចំនុចនេះបាន និងមានគេសួរថា ហេតុអ្វីបានជាចង់មករស់នៅប្រទេសថៃ? ខ្ញុំបានឆ្លើយប្រាប់លោក Nawatt ថា ខ្ញុំចង់រស់នៅប្រទសថៃ ព្រោះខ្ញុំត្រូវការមកុដ ខ្ញុំស្រឡាញ់វាណាចា៎»។
បើទោះជាមានការបកស្រាយបែបនេះក៏ពិតមែន ក៏ប៉ុន្ដែអ្នកលេងបណ្ដាញសង្គម ពិសេសជនជាតិវៀតណាម នៅតែមិនពេញចិត្តចំពោះប្រយោគដែលបវរកញ្ញារូបនេះធ្លាប់បានឆ្លើយនៅលើវេទិកាថា នាងមិនបានទទួលការគាំទ្រចេញពីប្រទេសខ្លួនឯងឡើយ សូម្បីតែក្រុមគ្រួសារនាងផ្ទាល់។ ប្រយោគមួយនេះ ហាក់ដូចបញ្ជាក់ពីពាក្យកុហករបស់នាង ទាំងដែលលោក Nawat ធ្លាប់បានអះអាងនៅលើ Live ថា «ខាងភាគីវៀតណាម គឺតែងតែមានសកម្មភាពគាំទ្រ និងបង្ហោះគ្រប់សកម្មភាពរបស់បវរកញ្ញាខ្លួនមិនចេះដាច់ ដែលទង្វើនេះគប្បីបវរកញ្ញាគ្រប់ប្រទេសមិនគួរមើលរំលង ដូច្នេះទើបបវរកញ្ញាវៀតណាម ស័ក្ដសមនឹងទទួលបានមកុដ»។
យោងតាមសម្ដីរបស់មេ Miss Grand International ខាងលើនេះ គឺផ្ទុយទៅនឹងអ្វីដែលកញ្ញាធ្លាប់បានលើកឡើង បើដូច្នេះតើការពិតគឺជាអ្វីទៅវិញ?៕
