តារាសម្ដែងឯកប្រុស ជា លាងឈែ កំពុងធ្វើឱ្យអ្នកគាំទ្រភ្ញាក់ផ្អើលមិនស្ទើទេ ខណៈដែលនៅ លើបណ្ដាញសង្គមហ្វេសប៊ុក លោកបានបង្ហាញរូបភាពស្និទស្នាលជាមួយតារាស្រី នួន ណាតាយ៉ា ដែលមើលទៅ ដូចជាថត Pre- Wedding ត្រៀមរៀបការអ៊ីចឹង។ នៅ លើហ្វេសប៊ុកផេក Photo City Studio បញ្ចេញរូបជាច្រើនសន្លឹក ស្ដែងឱ្យឃើញតារាប្រុសសង្ហា និងតារាស្រីសាច់សខ្ចីរូបនេះ មានកាយវិការផ្អែមល្ហែមយ៉ាងស្អិតរមួតដាក់គ្នា រហូតធ្វើឱ្យអ្នកគាំទ្រលើសជាតិស្ករ។
កន្លងមកនេះ មានដំណឹងលេចលឺខ្សឹបខ្សៀវពីចង្កោមអ្នកសិល្បៈថា លោក ជា លាងឈែ ថា លោកនឹងតារាស្រីរូបនេះកំពុងទំនាក់ទំនងជិតស្និទ ហើយមើលចិត្តគ្នាជាយូរណាស់មកហើយ តែនៅ ឡើយតែរង់ចាំពេលវេលាល្អមកដល់តែប៉ុណ្ណោះ។ ទន្ទឹមនឹងនោះ មួយរយៈចុងក្រោយនេះ គេឧស្សាហ៍ឃើញអ្នកទាំងពីរទៅ ណាមកណាជាមួយគ្នាណាស់ ហើយស្រាប់តែពេលនេះបញ្ចេញរូបថតលក្ខណៈ Pre-Wedding តែម្ដង។ តើអ្នកទាំងពីរគ្រោងនឹងរៀបការនៅ ពេលណា?
បកស្រាយប្រាប់អ្នកសារព័ត៌មានត្រយង លោក ជា លាងឈែ បានបកស្រាយថា មនុស្សស្រីដែលលោកស្រម៉ៃចង់បានជាអនាគតភរិយា គឺជាមនុស្សស្រីដូចតារាស្រី ណាតាយ៉ា ព្រោះកញ្ញាមានលក្ខណៈពិសេសដែលចាក់បេះដូងរបស់លោកឱ្យលង់ស្រឡាញ់។ លោកថា មនុស្សស្រីលោកពេញចិត្តគឺមានលក្ខណៈសម្បត្តិជាមនុស្សស្មោះត្រង់ មិនអត្មានិយម រឹងមាំ ហើយក៏ជាមេផ្ទះដ៏ល្អផងដែរ។
លោក ជា លាងឈែ បកស្រាយប្រាប់អំពីរូបថតស្និតស្នាលរវាងលោក ជាមួយនិងកញ្ញា ណាតាយ៉ា ដែលមើលទៅ ដូច Pre-Wedding នោះ គឺពិតជារូបថត Pre- wedding មែន ប៉ុន្ដែជារូបថត Pre- wedding សម្រាប់ Studio Photo City ប៉ុណ្ណោះ មិនមែនជា Pre- wedding ពិតប្រាកដរបស់អ្នកទាំងពីរនោះទេ។ លោកថា ប្រសិនបើ Pre- wedding របស់លោកពិតមែន គឺពិតជាផ្ចិតផ្ចង់បន្ដិច ហើយអាចនឹងប្រណិតជាងនេះបន្ដិច។ សម្រាប់ខ្លួនលោកផ្ទាល់ លោកស្រលាញ់ការថតសម្លៀកបំពាក់បែប Classic របៀប Western តែយ៉ាងណាលោកក៏មិនចោលសម្លៀកបំពាក់ប្រពៃណីបុរាណខ្មែរឡើយ ព្រោះជាទំនៀមទម្លាប់របស់ខ្មែរយើង។ លោកបញ្ជាក់ទៀតថា រូបទាំងដែល Page Photo City បានបង្ហោះ គឺទៅ ថតនៅ កំពតវិលល្ងាចប៉ុណ្ណោះ ហើយសម្លៀកបំពាក់ក៏ខាង Studio ជាអ្នករៀបចំឱ្យដែរ។
ពាក់ព័ន្ធរឿងសិរីមង្គលនេះ លោក ជា លាងឈែ អះអាងថា នៅ មិនទាន់មានគម្រោងច្បាស់នៅ ឡើយទេ ព្រោះត្រូវការច្រើនទៀត។ ទំនាក់ទំនងស្នេហាលោកនិងកញ្ញា ណាតាយ៉ា ជាការពិតឬយ៉ាងណានោះ ទុកឱ្យអ្នកគាំទ្រ និងមហាជនតាមដានដោយខ្លួនឯងតែម្ដង។
សូមជម្រាបថា លោក ជា លាងឈែ និងកញ្ញា នួន ណាតាយ៉ា គឺជាតារាម្ដែងដែលមានទេពកោសល្យដូចគ្នា និងមានជំនួញក្រៅ សិល្បៈដូចគ្នា។ អ្នកគាំទ្របន់ឱ្យតែអ្នកទាំងពីរបានចូលរោងការនាពេលឆាប់ៗនេះតែម្ដង៕