កម្ពុជា-ជប៉ុន បានរៀបចំពិធីប្រគល់-ទទួលផ្លូវរត់អត្តពលកម្ម អាងហែលទឹក និងអគារលំហាត់ប្រាណដោយមានបំពាក់សម្ភារៈបរិក្ខារ នៅវិទ្យាស្ថានជាតិអប់រំកាយ និងកីឡា ក្រោមអធិបតីភាពដ៏ខ្ពង់ខ្ពស់ឯកឧត្តមបណ្ឌិតសភាចារ្យ ហង់ជួន ណារ៉ុន រដ្ឋមន្ត្រីក្រសួងអប់រំ យុវជន និងកីឡា និងឯកឧត្តម MIKAMI Masahiro ឯកអគ្គរាជទូតវិសាមញ្ញ និងពេញសមត្ថភាពនៃប្រទេសជប៉ុន ប្រចាំព្រះរាជាណាចក្រកម្ពុជា ព្រមទាំងមន្រ្តីក្រោមឱវាទជាច្រើនរូបទៀត។
ផ្លូវរត់អត្តពលកម្ម ៨ខ្សែបន្ទាត់ អាងហែលទឹក និងអគារធ្វើលំហាត់ប្រាណ នៅវិទ្យាស្ថានជាតិអប់រំកាយ និងកីឡា ជាអំណោយរបស់រដ្ឋាភិបាលនិងប្រជាជនជប៉ុន តាមរយៈ ជំនួយឥតសំណង “គូសាណូណិ” និងជំនួយឥតសំណង សម្របសម្រួលដោយអង្គការក្រៅរដ្ឋាភិបាល “បេះដូងមាស”។
បើតាមការបញ្ជាក់របស់ឯកឧត្តមបណ្ឌិតសភាចារ្យ ហង់ជួន ណារ៉ុន តាមរយៈគម្រោង “គូសាណូណិ” និងអង្គការក្រៅរដ្ឋាភិបាល “បេះដូងមាស” ការកសាងហេដ្ឋារចនាសម្ព័ន្ធមាន ផ្លូវអត្តពលកម្មចំនួន៨ខ្សែបន្ទាត់ តម្លៃជាង៩ម៉ឺនដុល្លារអាមេរិក ព្រមទាំង អាងហែលទឹក អាគារធ្វើលំហាត់ប្រាណ និងបំពាក់គ្រឿងបរិក្ខារ សម្ភារៈកីឡា និងការរៀបចំកម្មវិធីសិក្សាថ្នាក់បរិញ្ញាប័ត្រមនុស្សសាស្ត្រឯកទេសអប់រំកាយនិងកីឡា និងការអភិវឌ្ឍន៍ធនធានមនុស្ស អស់ថវិការជាង៧សែនដុល្លារអាមេរិក។
ឯកឧត្តមរដ្ឋមន្ត្រីចាត់ទុកថាសមិទ្ធផលថ្ងៃនេះគឺជានឹងបម្រើដល់ការបណ្តុះបណ្តាលធនធានមនុស្សអប់រំកាយនិងកីឡា និងបង្ហាត់បង្រៀនដល់សិស្សានុសិស្ស គរុសិស្សក្នុងមុខវិជ្ជាអប់រំកាយនិងកីឡា បានត្រឹមត្រូវតាមបទដ្ឋានកីឡា ដើម្បីក្លាយជាគ្រូអប់រំកាយនិងកីឡា ពោរពេញដោយសមត្ថភាព មុនទៅបម្រើការងារតាមរាជធានី-ខេត្ត។
ឯកឧត្តម បន្ថែមថា៖«លើកទឹកចិត្តដល់គរុសិស្សខិតខំប្រឹងប្រែងរៀនសូត្រ ជាពិសេសចាប់យកមុខវិជ្ជាកីឡាណាមួយជាជំនាញ ដូចជាបាល់ទាត់ បាល់ទះ បាល់បោះ…ដោយមិនអាចបណ្តុះបណ្តាលតែផ្នែកអប់រំកាយនិងកីឡា នោះទេតែថែមទាំងអាចបង្រៀនពីជំនាញកីឡាដែលយើងនេះថែមទៀតផង»។
ឯកឧត្តមរដ្ឋមន្ត្រីបានលើកឡើងពីប្រសាសន៍របស់សម្តេចអគ្គមហាសេនាបតីតេជោ ហ៊ុន សែន បានដាក់ចេញគោលនយោបាយ មួយថាការងារអប់រំកាយនិងកីឡា ដើរតួនាទីយ៉ាងសំខាន់ និងជាយាន្តក្នុងការអភិវឌ្ឍន៍សង្គម ព្រោះកីឡាកសាងមនុស្ស មនុស្សកសាងសង្គម ចំណែកវិស័យអប់រំកាយនិងកីឡានាំមុនសុខភាពផ្លូវកាយនិងផ្លូវចិត្ត។
ជាមួយគ្នានេះដែរឯកឧត្តមរដ្ឋមន្ត្រី សង្កេតឃើញថា កម្ពុជា ជួបបញ្ហាប្រឈម កង្វះខាតហេដ្ឋារចនាសម្ព័ន្ធ សម្ភារៈកីឡា និងសមត្ថភាពនៅមានកម្រិត។ តែក្រសួងមានទិសដៅបន្ថែមពង្រឹងការអភិវឌ្ឍន៍ និងបន្តយន្តការដែលមានសម្រាប់ដើម្បីជំរុញការងារអប់រំកាយនិងកីឡាឱ្យមានប្រសិទ្ធភាពដូចជា៖
១) ពង្រឹងនិងពង្រីកវិស័យអប់រំកាយនិងកីឡាតាមសាលារៀន
២) ពង្រឹងនិងពង្រីក វិស័យអប់រំកាយនិងកីឡា២ម៉ោងក្នុង១សប្ដាហ៍ និងសកម្មភាពកីឡាក្រៅម៉ោងសិក្សា
៣) រៀបចំបណ្ដុះបណ្ដាលគ្រូអប់រំកាយនិងកីឡាឱ្យដល់កម្រិតបរិញ្ញាប័ត្រ
៤) ជម្រុះមហាជនហាត់ប្រាណជាប្រចាំ
៥) វិទ្យាស្ថានអប់រំកាយនិងកីឡា ត្រូវតែសហការជាមួយអង្គការ និងដៃនានា ដើម្បីពង្រឹងវិទ្យាស្ថានអប់រំកាយនិងកីឡាទៅជាគ្រឹះស្ថានឧត្តមសិក្សា ជាដើម៕