បាត់ដំបង៖ ក្រុមក្មេងស្ទាវ ២ក្រុមដោយសារទំនាស់ពាក្យសម្តីកន្លងមកជាមួយគ្នា ក៏ដេញកាប់គ្នាបណ្តាលឲ្យរបួសធ្ងន់ធ្ងរចំនួន ២នាក់នៅរំលងអាធ្រាត។
លោកវរសេនីយ៍ឯក ឈឿង គឹមសុង នាយការិយាល័យ នគនគរបាលព្រហ្មទណ្ឌកម្រិតស្រាល នៃស្នងការដ្ឋាននគរបាលខេត្តបាត់ដំបងបានប្រាប់ឲ្យដឹងថា ក្រោយពីជនរងគ្រោះបានដាក់ពាក្យបណ្តឹងរបស់ក្រុមគ្រួសារជនរងគ្រោះ លោកក៏បានប្រើប្រាស់កម្លាំងអន្តរាគមន៍បង្កាបង្ក្រាប ចុះបង្ក្រាបករណីប៉ុនប៉ងឃាតកម្ម និងធ្វេីឱ្យខូចខាតដោយចេតនាមានស្ថានទម្ងន់ទោសប្រើកាំបិតកាប់មួយករណីខាងលើ ក្នុងនោះបាននាំខ្លួនជនសង្ស័យចំនួន ០៦នាក់មកសាកសួរនៅស្នងការដ្ឋានខេត្ត។
ជនសង្ស័យឈ្មោះសុង សុភារម្យ ភេទប្រុស អាយុ ២៦ឆ្នាំ, ឈ្មោះរិទ្ធ មេសា ភេទប្រុស អាយុ ១៩ឆ្នាំ, ឈ្មោះសុខ រីហ្វី ភេទប្រុស អា យុ ២៣ឆ្នាំ, ឈ្មោះរី សារ៉ាក់ ភេទប្រុស អាយុ ២១ឆ្នាំ, ឈ្មោះជួន វ៉ាន់ឌីន ភេទប្រុស អាយុ ២១ឆ្នាំ និងម្នាក់ទៀតឈ្មោះចេង សារ៉េតប្រាថ្នា ទាំងអស់គ្នាមានទីលំនៅក្នុងក្រុងបាត់ដំបង ខេត្តបាត់ដំបង ចំណែកឯជនរងគ្រោះឈ្មោះឯល អ៊ូម៉ើត ភេទប្រុស អាយុ ២០ឆ្នាំ រស់នៅភូមិនរា ឃុំនរា ស្រុកសង្កែ រងរបួសធ្ងន់ និងឈ្មោះសឿន ជីងឈី ភេទប្រុស អាយុ ១៨ឆ្នាំ រស់នៅភូមិវត្តលៀប សង្កាត់ចំការសំរោង ក្រុងបាត់ដំបង រងរបួសធ្ងន់។
លោកវរសេនីយ៍ឯក ឈឿង គឹមសុង បានបញ្ជាក់បន្ថែមថា÷ នៅវេលារំលងអាធ្រាត ថ្ងៃទី ០៨ ខែ ធ្នូ ឆ្នាំ ២០២១ កន្លងមកនៅត្រង់ចំណុចមុខមន្ទីររៀបចំដែនដីនគររូបនីយកម្មសំណង់ និងសូរិយោដីខេត្ត ស្ថិតក្នុងភូមិកំពង់ក្របី សង្កាត់ស្វាយប៉ោ ជនសង្ស័យ និងបក្ខពួកបានធ្វេីសកម្មភាពយកកាំបិតកាប់ និងគប់ដុំថ្មទៅលេីជនរងគ្រោះបណ្តាលរបួសធ្ងន់ជាច្រើនកន្លែង។
ការិយាល័យជំនាញបានកសាងសំណុំរឿងបញ្ជូនជនសង័្សយទៅសាលាដំបូងខេត្តបាត់ដំបងដើម្បីចាត់ការបន្តតាមនីតិវិធី៕
ដោយ: ដំបងក្រញូង