នៅ ក្នុងចំណោមបេក្ខនារីបវរកញ្ញាមកពី៨០ប្រទេស ដែលបានឡើងឆាកប្រកួតបង្អួតសម្រស់ ដើម្បីដណ្ដើមតំណែងបវរកញ្ញាចក្រវាឡលើក ទី៧០ នាទីក្រុងអេឡាត់ ប្រទេសអ៊ីស្រាអែល យុវតីវ័យ២១របស់ឥណ្ឌាគឺជាម្ចាស់ជ័យលាភីចំណាត់ថ្នាក់លេខ១។ កញ្ញា គឺជាបវរកញ្ញាឥណ្ឌាទី៣ ហើយដែលបានឈ្នះមកុដនិងតំណែងបវរកញ្ញាចក្រវាឡជូនប្រទេសជាតិ។ តើយុវតីក្មេងខ្ចីរូបនេះមានប្រវត្តិយ៉ាងណា? សារព័ត៌មានត្រយងសូមជំរាបជូនដូចតទៅ ៖
«Harnaaz Sandhu» គឺជានារីឥណ្ឌាសម័យថ្មីដែលមានជំនឿចិត្តខ្ពស់លើខ្លួនឯង គួរឱ្យស្រលាញ់ និយាយពីរោះ និងពោរពេញទៅ ដោយសមត្ថភាព កញ្ញាកើតនៅ ក្រុងឆានឌិការ៍ (Chandigarh) ប្រទេសឥណ្ឌា។ កញ្ញាជានិស្សិតបញ្ចប់ការសិក្សានៅ សកលវិទ្យាល័យ Government College ដែលស្ថិតនៅ ក្នុងក្រុងឆានឌិការ៍នេះផ្ទាល់។ បច្ចុប្បន្ន Harnaaz Sandhu (ហារ៍ណាស សាន់ធូ) ក្រៅ ពីក្ដាប់តំណែងជាបវរកញ្ញាចក្រវាឡឥណ្ឌា និងបវរកញ្ញាចក្រវាឡអន្តរជាតិ កញ្ញាក៏ជាតារាសម្ដែង និងនារីម៉ូដែល ដ៏ល្បីល្បាញរបស់ប្រទេសឥណ្ឌាផងដែរ។
កញ្ញា ហារ៍ណាស តាំងចិត្តចង់ជំរុញនិងគាំទ្រឱ្យនារីៗទទួលបានជោគជ័យដូចជាម្ដាយរបស់កញ្ញា ព្រោះម្ដាយរបស់ម្ចាស់ជ័យលាភីរូបនេះគឺជាពេទ្យរោគស្ត្រីដ៏ល្បីល្បាញដែលចេញមុខតស៊ូមតិចំពោះប្រព័ន្ធគ្រប់គ្រងបែបប្រជាធិបតេយ្យមកជាយូរមកហើយ។ ចំណែកកញ្ញាវិញកញ្ញាក៏បានរួមការងារជាមួយនឹងម្ដាយនៅ ក្នុងជំរុំដែលផ្ដោតជាសំខាន់លើសុខភាពពិសេសសុខភាពស្ត្រីនិងអនាម័យប្រចាំខែ។
ម្ចាស់ជ័យលាភីបវរកញ្ញាប្រចាំឆ្នាំ២០២១នេះ យល់យ៉ាងច្បាស់ពីអ្វីដែលម្ដាយកញ្ញាតស៊ូពុះពារដើម្បីកញ្ញា ដូច្នេះសព្វថ្ងៃនេះកញ្ញាគឺជាមនុស្សចម្បងគាំទ្រនិងជួយដល់ស្ត្រីឥណ្ឌាជាច្រើននាក់ជាពិសេសគឺគាំទ្រដល់ស្ត្រីគ្រប់គ្នាឱ្យមានសិទ្ធិសេរីភាពតាមរដ្ឋធម្មនុញ្ញាយ៉ាងស្របច្បាប់ទាំងក្នុងការសិក្សា អាជីពនិងសេរីភាពក្នុងការជ្រើសរើស ដោយកញ្ញា ហារ៍ណាថ មានជំនឿចំពោះប្រយោគដែលពោលថា «វត្ថុដ៏អស្ចារ្យបំផុតនឹងកើតឡើងចំពោះមនុស្សដែលមានជំនឿ ព្យាយាម ខំសិក្សាស្វែងយល់ និងកត្តញ្ញូ»។
នៅ ក្នុងវគ្គ Top5 បវរកញ្ញាដែលសន្សឹមៗភាពលេចធ្លោរបស់កញ្ញាកាន់តែចាំងចិញ្ចែងចិញ្ចាចលើវេទិកាប្រកួត ព្រោះតែរូបសម្រស់ស្អាត ឆ្លាត និង រហ័សរហួន តាមរយៈការឆ្លើយសំនួរ ដែលបានសួរថា «មនុស្សជាច្រើនគិតថាវិបត្តិនៃបំរែបំរួលអាកាសធាតុគឺជារឿងបោកប្រាស់តើកញ្ញាមានវិធីបែបណា និយាយបញ្ចុះបញ្ចូលឱ្យគេគិតថានោះគឺជារឿងពិត» កញ្ញាបានឆ្លើយតបថា «ដោយសច្ចៈភាពបេះដូងរបស់ខ្ញុំប្រេះបែកដោយសារតែធម្មជាតិកំពុងតែជួបប្រទះនឹងបញ្ហា ហើយនោះគឺជាទំនួលខុសត្រូវរបស់ពួកយើង ខ្ញុំជឿថានេះគួរតែដល់ពេលវេលាដែលគ្រប់គ្នាត្រូវពួកដៃគ្នាធ្វើសកម្មភាព ហើយនិយាយឱ្យតិចជាងមុន ព្រោះរាល់សកម្មភាពទាំងអស់អាចជួយដល់ធម្មជាតិបាន ការមើលថែនិងការពារធម្មជាតិ គឺជារឿងល្អជាងត្រលប់មកដោះស្រាយបញ្ហាតាមក្រោយ ហើយនេះគឺជារឿងដែលខ្ញុំកំពុងតែព្យាយាមប្រាប់អ្នកក្នុងថ្ងៃនេះ»។
ងាកមកសំនួរសម្រាប់បេក្ខនារី៣រូបចុងក្រោយ បវរកញ្ញាទាំងអស់ត្រូវឆ្លើយសំនួរដូចៗគ្នាគឺ «តើអ្នកនឹងមានពាក្យណែនាំអ្វីដើម្បីផ្ដល់ទៅ កាន់នារីជំនាន់ថ្មីដែលកំពុងតែតាមដានទស្សនា តើពួកគេត្រូវធ្វើយ៉ាងណាដើម្បីឆ្លើយតបនឹងសម្ពាធដែលកំពុងជួបប្រទះក្នុងពេលបច្ចុប្បន្ននេះ?» ដោយចម្លើយរបស់កញ្ញាគឺ៖ «ខ្ញុំគិតថាសម្ពាធដែលយុវវ័យកំពុងជួបប្រទះគឺរឿងជំនឿជាក់លើខ្លួនឯង សូមដឹងថាពួកអ្នកគ្រប់គ្នាមានលក្ខណៈពិសេសរៀងៗខ្លួន នោះហើយគឺជាវត្ថុដែលធ្វើឱ្យអ្នកមើលទៅ ស្រស់ស្អាត សូមឈប់យកខ្លួនឯងទៅប្រៀបធៀបជាមួយនឹងអ្នកផ្សេង ហើយងាកមកនិយាយគ្នាពីរឿងហេតុសំខាន់ៗដែលកើតឡើងក្នុងពិភពលោកល្អជាង នេះគឺជាអ្វីដែលអ្នកត្រូវយល់ ឈានជើងចេញមកហើយហ៊ាននិយាយ ព្រោះអ្នកគឺជាអ្នកកំណត់ជីវិតរបស់អ្នក អ្នកគឺជាម្ចាស់សំឡេងរបស់អ្នកខ្លួនឯង ខ្ញុំជឿជាក់លើខ្លួនឯង ហើយនោះគឺជាហេតុផលដែលខ្ញុំមកឈរនៅ ត្រង់នេះ។»
គួរដឹងថាបវរកញ្ញាចក្រវាឡឆ្នាំ២០២១ ចំណាត់ថ្នាក់លេខ១បានទៅ លើកញ្ញា ហារ៍ណាថ សាន់ធូ បវរកញ្ញាមកពីប្រទេសឥណ្ឌា បវរកញ្ញាចំណាត់ថ្នាក់លេខ២បានទៅ លើកញ្ញា ណាឌៀ ហ្វឺរ៉ៃរ៉ា (Nadia Ferreira) បវរកញ្ញាប៉ារ៉ាហ្គាយ និងចំណាត់ថ្នាក់លេខ៣បានទៅ លើបវរកញ្ញា ឡាឡេឡា មីស្វាណេ (Latela Mswane) បវរកញ្ញាមកពីអាហ្វ្រិកខាងត្បូង៕
ទស្សនាវីដេអូព័ត៌មានខាងក្រោមនេះ៖
