ចក្រភពអង់គ្លេសបានបញ្ជាក់ថា មានករណីស្លាប់ដំបូងដោយសារវីរុសបំប្លែងថ្មី Omicron នៅក្នុងប្រទេសរបស់ខ្លួន ស្របពេលដែលប្រទេសនេះកំពុងតែពន្លឿនការចាក់ដូសជម្រុញជូនប្រជាជន។
នេះជាការបញ្ជាក់របស់លោកនាយករដ្ឋមន្ត្រី Boris Johnson នៅពេលដែលលោកបានទៅធ្វើទស្សនកិច្ចនៅមជ្ឈមណ្ឌលចាក់វ៉ាក់សាំងកូវីដ១៩ នាភាគខាងលិចទីក្រុងឡុងដ៍។
លោក Boris Johnson បានប្រាប់អ្នកកាសែតក្នុងចក្រភពអង់គ្លេសថា នេះគឺជារឿងសោកស្ដាយបំផុតដែលមានអ្នកជំងឺម្នាក់បានស្លាប់ដោយសារវីរុស Omicron។ លោកក៏បានព្រមានពីរលកនៃការផ្ទុះវីរុសបំប្លែងថ្មីនេះដែរ ដោយបានបញ្ជាក់ថា វីរុសពិតជាអាចបង្កហានិភ័យដ៏ធ្ងន់ធ្ងរបាន។
រដ្ឋមន្ត្រីក្រសួងសុខាភិបាលលោក សាជីត ចាវីត បាននិយាយថា បច្ចុប្បន្នចក្រភពអង់គ្លេសមានអ្នកឆ្លងវីរុស Omicron ចំនួន ១០នាក់ ហើយកំពុងតែសម្រាកព្យាបាលនៅក្នុងមន្ទីរពេទ្យ។ លោក ចាវីតបានបន្តថា អត្រានៃការរីករាលដាលវីរុសបំប្លែងថ្មី Omicron គឺជាអ្វីដែលយើងមិនធ្លាប់គិតថាជាវីរុសធ្ងន់ធ្ងរពីមុនមកនោះទេ។
ពេលនេះអង្គការសុខភាពពិភពលោក WHO បាននិយាយថា វីរុសបំប្លែងខ្លួនថ្មីនេះបានឆ្លងរាលដាលដល់ប្រទេសជាង ៦០ ប្រទេសនៅទូទាំងពិភពលោក។
អង្គការសុខភាពពិភពលោក WHO បន្តថា វីរុសនេះអាចបង្កហានិភ័យខ្ពស់ណាស់ចំពោះសាកលលោកទាំងមូល ដោយមានភស្ដុតាងមួយចំនួនបានបញ្ជាក់ថា វីរុសនេះអាចគេចផុតពីប្រសិទ្ធភាពការពាររបស់វ៉ាក់សាំងទៀតផង ប៉ុន្ដែទិន្នន័យពីការពិសោធន៍អំពីការឈឺធ្ងន់ធ្ងរគឺនៅមានកម្រិតនៅឡើយ។
ប្រភព៖ CNA