វីដេអូមួយដែលត្រូវបានមហាជនអ្នកលេងបណ្ដាញសង្គមកំពុងផ្ទុះការចាប់អារម្មណ៍ខ្លាំង និងមិនធ្លាប់មាននៅក្នុងប្រទេសកម្ពុជានោះ គឺជាវីដេអូសុំរៀបការនៅក្រោមបាតសមុទ្រពីកូនកំឡោះ រ៉ាទី និងកូនក្រមុំឈ្មោះ លីន។ វីដេអូនេះដែរ ត្រូវបានបង្ហោះឡើងនៅក្នុងហ្វេសប៊ុកផេក នាយកដ្ឋានជំរុញទេសចរណ៍ក្នុងស្រុក និងអប់រំការយល់ដឹងជាសាធារណៈ នៃក្រសួងទេសចរណ៍ កាលពីថ្ងៃទី ១៤ ខែធ្នូ ឆ្នាំ ២០២១នេះ។
សំណើសុំរៀបការក្រោមសមុទ្រដំបូងបំផុតនៅកម្ពុជា ត្រូវបានកូនកំឡោះរៀបរាប់ប្រាប់ថា ក្រោយបានមើលចិត្តគ្នាអស់៥ឆ្នាំហើយ ដោយសារសម្ដីរបស់ភាគីខាងស្រី គិតថាលោកប្រហែលជាមិនចេះធ្វើរឿងបែបនេះសម្រាប់នាងទេ ទើបបានជាលោកសម្រេចធ្វើរៀបគម្រោងសុំរៀបការនៅបាតសមុទ្រនេះឡើង ដើម្បីឱ្យកូនក្រមុំភ្ញាក់ផ្អើលនិងរំភើបដល់ថ្នាក់បំភ្លេចមិនបាន។ លោកថា មិនមែនជារឿងងាយស្រួលនោះទេ ពីមនុស្សមិនចេះដកដង្ហើមក្នុងទឹកផង ទៅសុំរៀបការនៅក្រោមទឹកម៉េចនឹងបាន ហើយណាមួយត្រូវចំណាយពេលយូរដើម្បីលុតជង្គង់ចាំសុំនាងពាក់ចិញ្ចៀនរៀបការថែមទៀត។
នៅក្នុងវីដេអូសុំរៀបការក្រោមបាតសមុទ្រនេះ បានបង្ហាញពីទិដ្ឋភាពស្រស់ត្រកាល ក្រោមទឺកសមុទ្រព័ណ៌ខៀវស្រងាត់ មានហ្វូងសត្វត្រីចំរុះព័ណ និងជីវចំរុះជាច្រើននៅក្នុងក្រោមបាតសមុទ្រនៃកោះតាន់។ យ៉ាងណាមិញគេបានជឿថា វីដេអូសុំរៀបការក្រោមបាតសមុទ្រដំបូង ក៏បានជះសក្ដានុពលជំរុញដល់វិស័យទេចរណ៍ក្នុងស្រុក ឱ្យងាកមកចាប់អារម្មណ៍សម្រស់កោះតាន់ ដែលជាតំបន់ទេសចរណ៍ធម្មជាតិក្នុងប្រទេសកម្ពុជាផងដែរ៕
