តារាចម្រៀងវ័យក្មេង និងជា Rapper ដ៏ល្បីល្បាញមួយរូបរបស់កម្ពុជាគឺ វណ្ណដា បានលេចវត្តមាននៅលើគម្របទស្សនាវដ្ដី LiFTED ASIA ដែលជាទស្សនាវដ្ដីនិងវែបសាយអនឡាញមួយដ៏ធំក្នុងពិភពលោកដែលបង្កើតឡើងដើម្បីផ្សព្វផ្សាយពីតន្ត្រី Hiphop នៅក្នុងទ្វីបអាស៊ី។
វណ្ណដា ត្រូវបានទស្សនាវដ្ដីនិងគេហទំព័រអនឡាញខាងលើជ្រើសរើសដាក់គ្របមុខប្រចាំខែធ្នូនេះ។ យោងតាមការបង្ហោះរបស់វណ្ណដា បានបង្ហាញពីចំណាប់អារម្មណ៍របស់ខ្លួននៅលើបណ្ដាញសង្គមថា៖ «ថ្ងៃនេះខ្ញុំពិតជាមានកិត្ដិយស ដែលបានក្លាយជាទំព័រមុខរបស់ទស្សានាវដ្ដី LiFTED Asia ប្រចាំខែ ធ្នូនេះ! នេះគឺពិតជាអស្ចារ្យសម្រាប់ខ្ញុំ ដែលអាចបញ្ចប់ឆ្នាំ២០២១ នេះ ជាមួយសមិទ្ធផលថ្មីមួយទៀត ដែលជាការឈរនៅលើទំព័រមុខទស្សនាវដ្ដីអន្ដរជាតិដំបូងបំផុតរបស់ខ្ញុំ…»។
ជាការពិត តារាចម្រៀង វណ្ណដា ត្រូវបានដាក់ក្នុងទំព័រមុខរបស់ទស្សានាវដ្ដី LiFTED Asia ជាលើកដំបូង បន្ទាប់ពីបទចម្រៀង «Time To Rise» បកស្រាយដោយលោកផ្ទាល់ ជាមួយព្រឹទ្ធាចារ្យចាប៉ីដងវែង គង់ ណៃ ទទួលបានចំណាត់ថ្នាក់កំពូលឈរនៅលេខរៀងទី១ ក្នុងចំណោមបទចម្រៀង Hip-Hop ទាំង១០នៅអាស៉ីសម្រាប់ឆ្នាំ២០២១ ប្រចាំ LiFTED Lists។
យោងតាមគេហទំព័រ mixmag ban បានផ្សាយឱ្យដឹងថា LiFTED គឺជាគេហទំព័រអន្តរជាតិមួយ ដែលផ្ដោតជាសំខាន់ទៅលើបទចម្រៀងនិងតន្ត្រីបែប Hip-Hop នៅតំបន់អាស៉ី ហើយបានចេញផ្សាយអត្ថបទទាក់ទងនឹងបទចម្រៀង Hip-Hop នៅក្នុងប្រទេសអាស៊ី ចំនួន ២០ នៅជុំវិញពិភពលោកក្នុងឆ្នាំ ២០២១នេះ។
សូមជម្រាបថា ឆ្នាំ ២០២១នេះ គេហទំព័រ LiFTED បានធ្វើការកំណត់ជ្រើសយកបទចម្រៀង Hip-Hop ដែលមានឥទ្ធិពល និងប្រជាប្រិយភាពខ្លាំងជាងគេទាំង១០ នៅអាស៉ី ដើម្បីប្រកាសបង្ហាញជូនអ្នកគាំទ្ររបស់ខ្លួន ជាលទ្ធផលបទ «TIME TO RISE» របស់ វណ្ណដា បានសាងប្រវត្តិសាស្ត្រដ៏អស្ចារ្យមួយ បានជាប់តំណែងទី១ ជាបទល្អដាច់គេប្រចាំឆ្នាំ លើគេហទំព័រមួយនេះតែម្តង៕
