នៅពេលមុននេះបន្ដិច អ្នកដឹកនាំរឿង កៅ សីហា ចែករំលែកនៅលើបណ្ដាញសង្គមហ្វេសប៊ុករបស់លោកឱ្យឃើញ រឿងភាគដែលបានថតនៅក្នុងសម័យបារាំង បានបញ្ចេញជា Poster និងចំណងជើងពិតហើយ។ រឿងភាគទូរទស្សន៍ហង្សមាសនេះ មានចំណងជើងថា «ឫស្យា» កំពុងទទួលបានការចាប់អារម្មណ៍យ៉ាងខ្លាំងពីសំណាក់អ្នកគាំទ្ររឿងភាគខ្មែរ។ រឿងនេះត្រូវបានគេដឹងថា ជាស្នាដៃនិពន្ធរបស់លោក យូ សុភា ពីអ្នកនិពន្ធរឿងភាគ «រាជិនីភូមិគ្រឹះ»។
យ៉ាងណាមិញ គេបានដឹងទៀតថា«ឫស្យា» បានប្រមូលផ្ដុំកំពូលតារាសម្ដែងល្បីៗមានឈ្មោះបោះសំឡេង និងមានខ្លះទៀតបាត់មុខច្រើនឆ្នាំមកហើយពីពិភពសិល្បៈភាពយន្ដដូចជា អ្នកនាង សឿ សុធារ៉ា លោក ញ៉ែម សុគន្ធ លោក ដួង វិរៈសិទ្ធ លោក សំ សុវណ្ណរ៉ាក់ កញ្ញា អាង សុជាតា លោក លី សុជន កញ្ញា ប៊ី សុធារី ( Miss Cham Cambodia ) និងតារាកិត្តិយសចូលរួមសម្ដែងជាច្រើននាក់ទៀត។ បើទោះបីជាបានបញ្ចេញ Poster មិនទាន់ដល់មួយម៉ោងផង តែគេមើលឃើញថា រឿងភាគទូរទស្សន៍ដ៏ទាក់ទាញមួយនេះ នៅមិនទាន់បញ្ចេញកាលវិភាគនៅឡើយទេ។
សូមជម្រាបជូនបន្ថែមថា រឿង «ឫស្យា» ត្រូវបានគេមើលទៅទំនងជាមានសាច់រឿងកូនភ្លោះ ដោយនៅលើ Poster រូបតារាសម្ដែងស្រី សឿ សុធារ៉ា មានតួ២ ដូចជាតួកាច១ និងតួស្លូត ។ ហើយងាកមកមើល រូបតារាសម្ដែងស្រី អាង សុជាតា វិញក៏មានតួ២ដូចគ្នា ដែលអាចនិយាយបាន ជាតួកូនភ្លោះជំនាន់កូន។ សាច់រឿងទាំងមូលមានភាពកាច់កុង ឈ្នានីស ឫស្យា គគ្រឺតដាក់គ្នាយ៉ាងនោះ មានតែរង់ចាំតាមដានទស្សនាទាំងអស់គ្នា៕
