កម្មវិធីអបអរសាទរការចេញអាល់ប៊ុមចម្រៀង «Red» របស់តារាចម្រៀងល្បី Taylor Swift បានក្លាយជាប្រភពចម្លងជំងឺកូវីដ-១៩ ចំនួន៩៧ករណី នេះបើយោងតាមការប្រកាសរបស់ក្រសួងសុខាភិបាលរបស់ប្រទេសអូស្ត្រាលី។ ប្រទេសជាច្រើននៅក្នុងពិភពលោកកំពុងតែប្រយុទ្ធប្រឆាំងយ៉ាងខ្លាំងនៃការផ្ទុះឡើងមេរោគបំប្លែងថ្មី Omicron ខណៈដែលរដូវកាលនៃការឈប់សំរាករយៈពេលវែងកាន់តែជិតមកដល់។
សារព័ត៌មាន New York Post បានផ្សាយថាកម្មវិធីអបអសាទរខាងលើនេះបានរៀបចំឡើងកាលពីថ្ងៃទី១០ ខែធ្នូ ដើម្បីអបអរសាទរការចេញលក់សារជាថ្មីអាល់ប៊ុមចម្រៀងដែលធ្លាប់ចេញរួចម្ដងមកហើយកាលពីឆ្នាំ២០១២ ប៉ុន្តែ Taylor ទ់ើបតែថតបញ្ចូលក្នុងអាល់ប៊ុមសារជាថ្មីក្រោយលោក Scooter Braun បានក្ដោបយកក្រុមហ៊ុនចាស់របស់ Taylor។ តាមពិត «Red» គឺជាអាល់ប៊ុមទីពីរដែលត្រូវបានថតឡើងវិញនិងបញ្ចេញមកខាងក្រៅ។
កម្មវិធី «On Repeat: Taylor Swift Red Party» មានភ្ញៀវកិត្តិយសចូលរួមច្រើនជាង៦០០នាក់នៅក្នុងមហោស្រព Metro Theatre នេះបើយោងតាមការបញ្ជាក់ពីក្រសួងសុខាភិបាល ប៉ុន្តែមន្ត្រីសុខាភិបាលបានឱ្យដឹងថាក្រសួងអាចទំនាក់ទំនងបានត្រឹមតែអ្នកដែលបានឆែក QR Code មុនចូលរួមក្នុងកម្មវិធីប៉ុណ្ណោះ ខណៈដែលអ្នកមិនបានឆែក QR ពិបាកនឹងស្វែងរកអត្តសញ្ញាណពិតប្រាកដ។
មន្ត្រីសុខាភិបាលបានបញ្ជាក់ដែរថាករណីកូវីដខ្លះអាចជាវីរុសបំប្លែងថ្មី Omicron ប៉ុន្តែនៅមិនអាចកំណត់ចំនួនបាននៅឡើយទេ ព្រោះកំពុងតែបន្តបើកការស្រាវជ្រាវអ្នកពាក់ព័ន្ធក្នុងកម្មវិធីនេះជាបន្តទៀត ព្រមទាំងព្រមានចំពោះអ្នកដែលបានទៅចូលរួមកម្មវិធីនោះ ក្រោយម៉ោង៩យប់ឱ្យប្រញាប់ទៅធ្វើតេស្ដសំណាកនិងដាក់ខ្លួននៅដាច់ដោយឡែកឬធ្វើចត្តាឡីស័កយ៉ាងហោចណាស់៧ថ្ងៃ។
ដើម្បីរឹតបន្តឹងនិងធ្វើយ៉ាងណាកាត់បន្ថយឱ្យចំនួនឆ្លងមានការថយចុះ ជនជាតិអូស្ត្រាលីអាចនឹងត្រូវផាកពិន័យពី៥ពាន់ដល់១ម៉ឺនដុល្លារអូស្ត្រាលី ប្រិសនបើមិនធ្វើចត្តាឡីស័ក ឃុំខ្លួនដាច់ដោយឡែក តេស្ដរកជំងឺកូវីដ-១៩ នៅពេលសាមីខ្លួនសង្ស័យថាខ្លួនអាចនឹងឆ្លងជំងឺកូវីដ-១៩។
គួរដឹងផងដែរថាថ្មីៗនេះប្រទេសអូស្ត្រាលីបានប្រកាសពីការរកឃើញករណីឆ្លងថ្មីជិត៤ពាន់ករណី (៣៨០០) នេះបើយោងតាមសេចក្ដីប្រកាសពីមជ្ឈមណ្ឌលផ្ដល់ប្រភពស្ដីពីវីរុសកូរ៉ូណា Johns Hopkins។ មកដល់ខណៈនេះប្រទេសអូស្ត្រាលីទើបតែរកឃើញមេរោគបំប្លែងថ្មី Omicron ចំនួន១៨៥ករណីប៉ុណ្ណោះ ប៉ុន្តែអាជ្ញាធរផ្នែកសុខភាពប្រទេសនេះ បានលើកទឹកចិត្តប្រជាជនខ្លួនឱ្យបន្តការពារនិងព្យាយាមតេស្ដរកមេរោគកូវីដ-១៩ ព្រោះតែបច្ចុប្បន្នប្រទេសកំពុងស្ថិតក្នុងដំណាក់កាលឈប់សំរាករយៈពេលវែង៕
