អតីតបេក្ខភាពប្រកួតកម្មវិធី «America’s Got Talent» កញ្ញា Skilyr Hicks បានសម្រេចចិត្តបញ្ចប់ជី.វិតខ្លួនឯងត្រឹមអាយុ២៣ឆ្នាំប៉ុណ្ណោះ។ យុវតីក្មេងខ្ចីដែលជាអ្នកចម្រៀង-អ្នកនិពន្ធទំនុកច្រៀងរូបនេះគឺជាបេក្ខភាពប្រកួតរដូវកាលទី៨ ពោលគឺក្នុងឆ្នាំ២០១៣ ក្នុងខណៈដែលកញ្ញាកាលណោះមានវ័យត្រឹមតែ១៤ឆ្នាំ។ សពរបស់កញ្ញាត្រូវបានរកឃើញនៅក្នុងផ្ទះមិត្តភក្ដិនេះបើតាមការឱ្យដឹងរបស់ម្ដាយរបស់កញ្ញាបានប្រាប់សារព័ត៌មាន TMZ ។
មូលហេតុនៃមរណភាពនេះនៅមិនទាន់ត្រូវបានលាតត្រដាងឱ្យដឹងភ្លាមៗនោះទេ ម្ដាយរបស់កញ្ញា អ្នកស្រី Jodi គ្រាន់តែបង្ហើបថាតន្ត្រីករវ័យក្មេងរូបនេះធ្លាប់បានតស៊ូយ៉ាងខ្លាំងនឹងបញ្ហាផ្លូវចិត្ត ដែលបង្កឡើងដោយសារការរងនូវការធ្វើបាបនិងធ្លាក់ទឹកចិត្ត។ អ្នកស្រីបានបន្តទៀតថាកូនស្រីនឹងនៅមានជីវិតរហូតតាមរយៈចម្រៀងរបស់នាង។
នារីដែលមានដើមកំណើតនៅរដ្ឋកាលីហ្វ័រនីញ៉ាខាងត្បូងរូបនេះធ្លាប់ជាប់ពន្ធនាគារកាលពីកំឡុងខែមេសាឆ្នាំ២០១៧ ពីបទជេរប្រមាថសមាជិកគ្រួសារចំនួន៣នាក់ ហើយកញ្ញាក៏ធ្លាប់ត្រូវប៉ូលិសចាប់ខ្លួននៅក្នុងរដ្ឋ Ohio ដោយសារតែផឹកគ្រឿងស្រវឹងទាំងមិនទាន់ពេញវ័យ។
នៅក្នុងកម្មវិធីប្រកួត America Got Talent កញ្ញាបានសម្ដែងនិងបទចម្រៀងដែលតែងដោយខ្លួនផ្ទាល់ «Second Chance» ទោះជាក្មេងស្រីរូបធ្វើបានយ៉ាងល្អយ៉ាងណាក្ដីប៉ុន្តែគណៈកម្មាករទាំង៤រូបកាលណោះមាន៖ Mel B, Heidi Klum, Howie Mandel និង Howard Stern មិនបានអនុញ្ញាតឱ្យនាងបានឡើងទៅដល់វគ្គ Live Show នោះឡើយ។
នៅក្នុងសម្ភាសន៍ដែលបានផ្សាយកាលពីខែសីហាឆ្នាំ២០១៣ Hicks បាននិយាយថានាងបានបាត់បង់ឪពុកនៅពីរបីឆ្នាំប៉ុណ្ណោះមុននាងឡើងប្រកួត។ មរណភាពរបស់ Skilyr Hicks បានធ្វើឱ្យនាងចាកចេញពីបងប្អូនបង្កើតចំនួន៤នាក់ផ្សេងទៀត៕
.