ជាទូទៅមុនពេលចាប់ផ្ដើមដំណើរការថតភាពយន្ដ គេតែងតែរៀបចំពិធីក្រុងពាលីរឿងជាមុនសិន ដើម្បីធ្វើការសុំបើកផ្លូវពីបណ្ដាបារមី ម្ចាស់ទឹកម្ចាស់ដី និងវត្ថុស័ក្ដសិទ្ធ ឱ្យមកប្រសិទ្ធិពរជោគជ័យនិងថែរក្សាការពារដល់ក្រុមការងារថត តួសម្ដែង និងអ្នកដឹកនាំរឿង ទទួលបានផ្លែផ្កាល្អនិងមិនមានឧបសគ្គនានារាំងស្ទះក្នុងពេលថត។ ហើយបើនិយាយពីរឿងថតភាពយន្ដ ពាក់ព័ន្ធជាមួយអបិយជំនឿដូចជា ខ្មោច ព្រាយ បិសាច និងអាបធ្មប់ ភាគច្រើនណាស់ ខ្មែរយើងតែងតែអុជធូបសុំខមាទោសពីម្ចាស់ទឹកម្ចាស់ដី ខ្មោច ព្រាយ អារក្សអ្នកតា ជាមុនសិន ប្រសិនបើការសម្ដែងនោះមានភាពលើសលោះ ឬប៉ះពាល់ដោយអចតនា ដើម្បីសុំឱ្យលោកកុំប្រកែប្រកាន់។
ជាក់ស្ដែងខ្លាំងណាស់ កន្លងមកនេះ គេឃើញមានហេតុការណ៍ចម្លែកៗជាច្រើន នៅអំឡុងពេលថតកុន ដូចជា វិញ្ញាណចូលសណ្ឋិតក្នុងរាងកាយតួសម្ដែងពិតៗ ព្រលឹងព្រាយខ្មោចឱ្យសំឡេង ជួបហេតុប្លែកៗខុសប្រក្រតី ហើយមានខ្លះទៀតជួបខ្មោចលងពិតៗតែម្ដង។ ហេតុការណ៍ទាំងអស់នេះ តែងតែកើតមានចៀសមិនផុតទេ រហូតមានពេលខ្លះ អ្នកដឹកនាំរឿង តួសម្ដែង និងក្រុមការងារថត ធ្លាក់ខ្លួនឈឺដោយមិនដឹងខ្លួន ក្រោយជួបហេតុការណ៍ចម្លែកៗនាពេលថតថែមទៀត។ ការលើកពីហេតុការណ៍កន្លងមក យកមករៀបរាប់នៅក្នុងថ្ងៃនេះ គឺសារព័ត៌មានត្រយងចង់បង្ហាញមហាជនអ្នកអានថា ជំនឿអរូបីរបស់ខ្មែរ គឺមានតាំងពីបុរាណកាលមកម្ល៉េះ បើទោះបីយើងកំពុងតែរស់នៅក្នុងស្ថានភាពសម័យបច្ចេកវិទ្យាទំនើបយ៉ាងក៏ដោយ ក៏យើងមិនអាចមើលរំលងការជឿមួយនេះបានដែរ ដូចជាចាសៗលោកតែងតែលើកឡើងថាបើមិនជឿសូមកុំប្រមាថឱ្យសោះ។
តើមានហេតុការណ៍ចម្លែកអ្វីខ្លះកើតឡើងនៅពេលថតកុន? មានតារាណាខ្លះបានជួបរឿងហេតុព្រឺសម្បុរបះសក់ទាំងអស់នេះ? តោះតាមដានខាងក្រោមនេះ៖
១. នី មុនីនាថ បះសក់ពេលជួបខ្មោចលងពិតៗ ម្ដងជាពីរដង
តារាសម្ដែងស្រី នី មុនីនាថ មានស្នាដៃសម្ដែងក្នុងវិស័យភាពយន្ដជាច្រើនរឿង ហើយហេតុការណ៍ដែលកញ្ញាបានជួបប្រទះគឺអំឡុងពេលថតរឿង «ខ្មោចនាងនាថ» នៅលើទឹកដីខេត្តបាត់ដំបងនៅអំឡុងឆ្នាំ២០១។ កញ្ញាធ្លាប់បានរៀបរាប់ប្រាប់មហាជនថា ឃើញមានខ្មោចបុរាណស្លៀកក្បិន មកលេងជាមួយនាងមួយយប់ទល់ភ្លឺមុនថតកុន១ថ្ងៃ ខណៈនាងទៅសុំបន់ស្រន់ឱ្យថតបានល្អ។ តារាស្រីរូបនេះបានព្រលយសម្តីថា «លើកទី១ ហើយ ដែលបានឃើញខ្មោចខ្លាចភ័យឡើងញ័រដៃ។ និយាយទៅ អ្នកខ្លះគិតថា គ្រាន់តែជារឿងអបីជំនឿស្រមើលស្រម៉ៃ តែកាលថតរឿងមុនហ្នឹង ម៉ាក់ខ្ញុំគាត់ឃើញមែន ហើយឥឡូវឱ្យខ្ញុំទៀត »។
លុះក្រោយមកទៀត តារាស្រីរូបនេះក៏ជួបរឿងពិតទៀត នៅពេលថតក្នុងកណ្ដាលព្រៃភ្នំ សម្ដែងជាតួអាបវិញម្ដង។ តារាស្រី នី មុនីនាថ បានអះអាងថា នៅអំឡុងពេលរឿង «ម៉ែអាបចិញ្ចឹមកូន» គឺមានវិញ្ញាណចូលសណ្ឋិតក្រុមការងារថត ដោយនិយាយថា ខ្លួនប្រកាន់ខឹង ដែលក្រុមយើងមកអុកឡុកកន្លែងពួកគាត់។ កញ្ញាថា នៅពេលនោះម្នាក់ៗស្លន់ស្លោរខ្លាំងមែន និងបានអញ្ជើញអាចារ្យនៅតំបន់នេះ មកធ្វើពិធីបន់ស្រន់អស់កន្លះថ្ងៃថែមទៀតផង។
២. ហេតុការណ៍កញ្ញា ផាត់ ផាន់ណា ត្រូវវិញ្ញាណសណ្ឋិតខណៈពេលកំពុងថតកុន
កាលពីឆ្នាំ២០១៩ តារាស្រី ផាត់ ផាន់ណា បានចូលរួមសម្ដែងរឿង «ទឹកនិងប្រេង» ឱ្យស្ថាននីយទូរទស្សន៍ប៉ុស្តិ៍លេខ ៥ ។ ហេតុការណ៍នៅពេលនេះ កញ្ញាអះអាងថា កំពុងតែថត ស្រាប់តែបារមីម្ចាស់ដំណាក់ លោកម្ចាស់កថាថនឈុំ មកលេងក្រុមការងារ។ បើតាមរយៈវីដេអូនោះ គេក៏ឃើញថា កញ្ញាផាន់ ផាត់ណា និយាយស្ដីលែងដឹងអី ហើយបង្ហាញនៅអាការៈប្លែកប្រកាច់។ មានខ្លះថា អាចមកពីក្រុមការងារ មុនពេលថតមិនបានសុំការអនុញ្ញាតពីម្ចាស់ទឹកម្ចាស់ដីថែរក្សា កន្លែងនោះឱ្យបានត្រឹមត្រូវ ទើបបានជាកើតមានរឿងហេតុបែបនេះ ព្រោះទីតាំងថតនេះ គឺជាអតីតភូមិគ្រឹះលោកម្ចាស់កថាថនឈុំ និងក្រោយមកក្លាយជាពេទ្យខេត្ត ហើយបន្ដមកទៀតជាសាលាខេត្ត។
៣. លោក ផាត់ តាភូ ជួបរឿងបាត់កាបូប អំឡុងពេលថតរឿងខ្មោច
តារាសម្ដែងប្រុសឈ្មោះ ផាត់ តាភូ បានជួបហេតុការណ៍នឹកស្មានមិនដល់មួយកាលពីប៉ុន្មានថ្ងៃមុន ដោយសារតែលោកត្រូវបានវិញ្ញាណខ្មៅបានចូល អំឡុងពេលលោកថតរឿងខ្លីមួយ ហើយមកទល់ឥឡូវហេតុការណ៍នោះតែតាមលងបន្លាចតារាប្រុស រហូតដល់ទៅរត់មកស្នាក់នៅវត្តរកព្រះសង្ឃឱ្យជួយ។ ក្រោយជួបហេតុការណ៍នោះ លោកបានធ្វើការ Live នៅលើហ្វេសប៊ុក រំលឹកទាំងស្រក់ទឹកភ្នែកព្រោះភ័យខ្លាចថា ហេតុការណ៍នេះបានកើតឡើងនៅវេលាដែលក្រុមតារាសម្ដែងមួយក្រុម បានទៅថតរឿងអប់រំខ្លីនៅឯតំបន់អរិយក្សត្រ នៅក្នុងវត្តមួយដែលគេមានជំនឿថា ជាទីមានបារមីស័ក្តិសិទ្ធិ។ នៅគ្រានោះ ផាត់ តាភូ អះអាងថា មុនពេលកើតហេតុ អំឡុងពេលក្រុមការងារកំពុងដំណើរការថត ពួកលោកបានទទួលទូរស័ព្ទពីគ្រូស្នងបារមីមួយរូប ទូរស័ព្ទមកប្រាប់ថា ក្រុមការងារលោក នឹងកើតមានរឿង ព្រោះតែបានធ្វើឱ្យប៉ះពាល់ដល់បារមី។ ក្រោយមក ផាត់ តាភូ ក៏បានជួបរឿងបាត់កាបូប ដែលក្នុងនោះរួមមានទូរស័ព្ទ iPad លុយមួយចំនួន អត្តសញ្ញាណប័ណ្ណ ប៉ាស្ព័រ និងកុំព្យូទ័រ MacBookមួយគ្រឿងរបស់ព្រះសង្ឃមួយអង្គដែលបានផ្ញើក្នុងបាបូបរបស់លោកនោះដែរ។ ការបាត់រកមូលហេតុមិនឃើញទាល់តែសោះ លុះដល់ភ័យខ្លាំងពេក និងមានវិញ្ញាណចូលសណ្ឋិតផងនោះ ផាត់ តាភូ ក៏បានរត់មកសុំព្រះសង្ឃស្នាក់នៅក្នុងវត្តដើម្បីបណ្ដោះគ្រោះ។
៤. Peypey Dy ជួបរឿងរ៉ាវប្លែកៗពេលថតរឿង «ព្រាយកន្ទោងខៀវ» វង្វេងរកច្រកផ្លូវចេញពីព្រៃថតមិនឃើញ
លោក Peypey Dy បានរៀបរាប់ហេតុការណ៍ប្លែកៗនៅពេលថតរឿង «ព្រាយកន្ទោងខៀវ» ថា ក្រុមការងារបានខុសមាត់ខុសក និយាយថា ព្រៃកន្លែងថតមានអាកាសធាតុត្រជាក់គួរឱ្យចង់រស់នៅណាស់។ លុះដល់ថតចប់ ក៏មានម្នាក់នៅក្នុងក្រុមតួសម្ដែង វង្វេងផ្លូវ ជិះទៅជិះមករកផ្លូវចេញមកវិញមិនរួចពីក្នុងព្រៃ។ Peypey Dy ថា លោកសម្រេចចិត្តបើកឡានបកមកក្រោយវិញ ដើម្បីមកមើលក្រុមតួសម្ដែងនោះ ព្រោះលោកបានចាំផ្លូវអស់រយៈពេលយ៉ាងយូរ និងសង្ស័យខ្លាចខូចឡាននៅពាក់កណ្ដាលផ្លូវក៏មិនដឹង។ ចុងក្រោយលោកក៏រកមូលហេតុឃើញ ហើយនាំក្រុមការងារ និងអ្នកសម្ដែងទាំងអស់ ទៅកាន់ដំបូក ហើយអុជធូបសំពះសុំខមាទោស សុំផ្លូវត្រឡប់ទៅភ្នំពេញវិញ។
៥. សមាជិកក្នុងក្រុមសម្ដែងរបស់ សុគន្ធ ដេវីត ត្រូវវិញ្ញាណចូលសណ្ឋិត ហើយទារសំណែន
តាមរយៈវីដេអូដែលតារាចម្រៀង សុគន្ធ ដេវីត បានបង្ហោះកាលពីកន្លងមកនេះ គេមើលឃើញថា ម្នាក់នៅក្នុងក្រុមសម្ដែងរបស់លោកគឺកញ្ញា ឡាទី ត្រូវបានវិញ្ញាណចូលសណ្ឋិតទាំងកណ្ដាលថ្ងៃត្រង់ ហើយនិយាយស្ដីមិនដឹងរឿង កាច់ខ្លួនប្រកាច់ៗ និងពោរពេញដោយកំហឹង ជាពិសេសចេះតែពោលពាក្យដដែលៗថា ឃ្លាននេះឃ្លាននេះ ចង់ឱ្យគេសែនសំណែនឱ្យ។ វិញ្ញាណអាក្រក់ដែលបានចូលរាងកាយប្អូនស្រី ឡាទី ត្រូវបានគេដឹងថា ជាវិញ្ញាណតែងតោលអនាថានៅក្នុងបរិវេណវត្ត។ ក្រុមការងារតារាចម្រៀង សុគន្ធ ដេវីត បាននិមន្ដព្រះសង្ឃមកសូត្រ និងប្រោះទឹកមន្ដបណ្ដេញវិញ្ញាណអាក្រក់នោះចេញ តែវិញ្ញាណនោះពិតជាខ្លាំងណាស់មិនព្រមចេញនោះទេរហូតទល់តែប្អូនស្រីសន្លប់បាត់ស្មារតី។ បន្ដមកទៀត ហេតុការណ៍នេះ មិនមានការបង្ហោះវីដេអូ ឬបញ្ជាក់អះអាងណាមួយថា វិញ្ញាណអាក្រក់នោះ បានចេញពីរាងកាយប្អូនស្រីដោយវិធីណាទេ។